Read Chang Naga WEJAKBÜ 9 Bible Online

WEJAKBÜ 9 - Chang Naga bible

WEJAKBÜ 9

¹BUNYUBOUei Mosa to haoen Ijep kaodak ka longan nyibou po shaangbou lita Sinai lamanga joyoko laukei,

²“Israelbüei Püetbü Lem jih tükdea noujan.

³Kho lita anthük leibounyet chasemlamto jih tükdea kanei kho kijan; kho song hoba ngühkhüm pendou tegütham kanei ho lelabü.”

⁴Hobaje haoenei Püetbü Lem lilabü dogo Mosaei Israel shousi shuong to lenkei.

⁵Hobaje Sinai lamanga chasemlamto haoenei shaangbou lit chalou anthük leibounyet Püetbü lem likei; BUNYUBOUei Mosa la sakkubü pendou khümbo Israel shousi shuongei kümbei.

⁶Hobaje müt atje müt haibü mang to meitibüei asaopoko kisije kho chaloua Püetbü lem akien, hibü khoei khübü kho chaloua Mosa si Aron jungto loukei;

⁷hoba khübü müt shuongei hao to laukei, “Müt haibü mang che to meitibüei kün asaopoko apa, Israelbü yoa jih tükdea BUNYUBOU to lemla aila kün senetnyu phoda?”

⁸Mosaei haoen to laukei, “BUNYUBOU ka kan shanga ai sakkulaje ngei adit shongko kanei haiteishi,”

⁹Hobaje BUNYUBOUei Mosa to laukei,

¹⁰“Israel shousi shuong to lenshi: Kan müt at ayingsi kaneibü shousi at haibü mangto meitibüei asaopoko kialonga, ayingsi yento saako hauan kisi khei yingsikei haoei BUNYUBOU shanga Püetbü lem phojan.

¹¹Nyiboubü lit chalou anthük leibounyet chasemlamto haoenei kho kijan, haoenei kho tokai ajinbü wentek hoba khauekbü yoan kho shaujan.

¹²Kho haoenei ngeyang sühko ai aphojan, ayingsi lo aikei aleilutijan; Püetbü lem song tegü haoenei kho jungeijan.

¹³Lausikei müt ao saopoan kian ayingsi yento ohauko ki, khei yingsikei Püetbü lem ajungeida, kho jembü mütli ka wapan aplabü aishanga kho mütei jih tükdea haoei jembü lembü BUNYUBOU la aku, kho mütei jembü shabü künlabü.

¹⁴“Küksithang at ka yoa louan thüngan kialonga hoba BUNYUBOU Püetbü lem mangsühalonga Püetbü lem hoba khoeibü ngühkhüm tegü haoei kümlabü. Küksithang hoba sangbüshou ham shanga song jetei ong kilabü.”

¹⁵Hobaje lemshang neichem yeibü chaloua lemshang neichem sangmeiei khuilepbei hoba chasemlamtoje lemshang neichem thüka wan tegü ngeyang sühko kikei.

¹⁶Ponpen kho tegü kikei; chaloua sangmeiei khuilepan kikei, lausikei nangnakje wan tegü kikei.

¹⁷Ladang ong neichem ka sangmei kho tonenlaje kheijinei Israel shousi shuong meimeijung haukei; hoba lanei ong lemshang neichem thüka sangmei otlaje khülokche haoen shaikei.

¹⁸BUNYUBOUei sakkubüa Israel shousi shuong meimeijung haukei, hoba BUNYUBOUei sakkubüa Israel shousi shuong haoen shaikei; lalokche lemshang nei- chem thüka sangmei kho kilaje khülokche haoen shaian kikei.

¹⁹Hobaje ladang sangmei kho lemshang neichem thüka chalou lounyu kilaje kheijinei Israel shousi shuongei BUNYUBOUei sakkubü jungeiko meimeijung ohau.

²⁰Hobaje checheje sangmei kho lemshang neichem thüka chalou shijo kikei; kheijinei BUNYUBOUei sakkubü tegü haoenei meimeijung haukei.

²¹Che- cheje sangmei kho chasem ka ngeyang sühko kikei, hoba ladang sangmei kho tonenlaje haoen meimeijung haukei, ayingsi kho chajih ka nangnak sühko kialonga, ladang sangmei kho tonenlaje, kheijinei haoen meimeijung haukei.

²²Chalou nyi yingsikei ayingsi lit che yingsikei ayingsi po che, sangmei kho lemshang neichem thüka nyengan kijinei Israel shousi shuong shaian kikei, hoba meimeijung ohau.

²³BUNYUBOUei sakkubüei haoen meimeijung haukei. Mosa danko BUNYUBOUei sakkubü haoenei jungeiko kikei.