Read Chang Naga MIKA 2 Bible Online

MIKA 2 - Chang Naga bible

MIKA 2

¹Aoyouei shedbü shabü daman chühda hoba yepshanga amaibü huon takda haoen shanga ügütü! Ngeyang lang ngejinei haoenei kho kümda, aieilausi kho haoeneibü ikeibü haua ki.

²Haoenei sek maangdühda, hoba khübü kho soda; hoba chem shuongkei sunglangkuda. Haoenei sekmoubü hoba haoeibü chem, müt che hoba haoeibü phetphan soda.

³Khoei BUNYUBOU Mühghaüei lauda, “Chühashi, ngei kho chemdang thükto khonku sungbala huongda hoba kan khüka asatenlabü. Kan hopashoule paila athüklabü, aieilausi kho khonku chalou yinglabü.

⁴Kho chalou sühjinei mütshuongei kan shang- abü tetlatala leko laueikulabü, hoba ho waangbü manghaap chia laulabü: Kün lemailela lusaka! BUNYUBOUei küneibü kao sunglangkua. Hobaje kho kün langsenbü shuong la kuan apa.”

⁵Hibü ladang kaonyu kho BUNYUBOUeibü mütshuong la kungaila jih sühlaje, khonei kan aoeibü phejankei akiteilabü.

⁶Mütshuongei hai lauko kü la songlenda, “Kün la song telenbü.” Habü pendou shangabü song telen. Mühghaüei kün ihimoutilabü.

⁷Israel mütshuong shedsikhau che phanga kia dogo nyi damda lao? BUNYUBOUei anatenko apa si? Maimaitham haoei habü kümsilei kümlep lo? Janbümubü kümbü dan to haoei sanouko ajoyoda lo?

⁸BUNYUBOUei jongaida, “Kanei kü mütli dangbouei tegü khulimbo meimeikei, semetametnyu kibou ka nyi neisimei khokan phokuda; wapyoshanga aikei adambo haoenei maanglem kian nyangko danbü ka haoen ka khokan sungda.

⁹Kü mütli yaksa shuong kanei haoen chem maibü ka shian sattida; haoeneibü shousi shuong ka ponpen shanga ngeibü soneikangbü kanei sunglangda.

¹⁰Kan pianlemashi hoba hauashi; aishanga ho kaneibü hakso shanga aying, aieilausi ihinseibü haangjung, kan maang nganglabü maubüei maulabü.

¹¹“Müt cheei yepeijaweko hoba ngüh phakphak lauko, ‘Ngei ka la ih si nyakidei shangabü thusei ngüh lenlabü,’ dogo laualonga khübü kho ong mütlieibü thuseibou la lelabü!

¹²“O Jakob, kan pendou, ngei maimaitham kamshaitilabü, maimaitham ngei Israel joubü leishailabü; Bozra sanshuong tegü ngei haoen liko phokulabü. Hobaje sanshuong kibü lamshaushang tegütham mütshang yaang ngühbüei ngei kaonyek shentilabü.”

¹³Haoen thedangto leilutibou anga, haoenei bakhün tuyetlabü hoba khoto satlabü, haoen thedangto BUNYUBOU lamleibou danda, haoeneibü Choba haoen thedangto danjung hauda.