Read Chang Naga MIKA 3 Bible Online

MIKA 3 - Chang Naga bible

MIKA 3

¹Hobaje ngei laukei, Sanoudambo ditashi, kan Jakobeibü leiyeibü hoba Israel chemdang kabü songdakbü shuong. Kanei ngühmai ngejan aying lo?

²Kanei maibü mangsenda hoba amaibü sanouda. Kanei mütli langkeia khon oda hoba lo ka phejak oda.

³Kanei kü mütli phe shauda, kanei haoeneibü khon oda, lo nyintida hoba chaka thunglabü phe tegü netla yeiko jemnyinda.

⁴Kanei BUNYUBOU to ngeklabü, lausikei haoei kan to ajongailabü. Kanei welaubü to aditkulabü, aishanga kanei amaibü küma.

⁵Kü mütli ayinglamto leibü thuseibü shuongei, haoen la okbü inbü shuong la hakso theletkuda, lausikei haoen la akubü dan laje lasonei hatlenda. Khübü thuseibü shuong to BUNYUBOUei hai lauda:

⁶“Thuseibü shuong, kan shanga chalou dankhümda; kan thükto mangsang akiko nangnak loulabü hoba yem ashanenlabü lele nakthüh kaangbü loulabü.”

⁷Thulenbü shuong himou shaulabü hoba yemshanbü shuong maang- panglabü. Haoen pendou sembung yemleplabü, aieilausi Mühghaüei haoen to ajoyolabü.

⁸Lausikei Jakob chemdang to haoeibü ngühkhüm leilubü hoba Israel to haoeibü shabü shanga ngetila BUNYUBOUeibü soushouei hoba ngühmai hoba hauei ngo shenakei.

⁹Ho sanoudambo ditashi, kan Jakob chemdang leiyeibü shuong, Israel chemdang songdakbü shuong, kan ngühmai mangsenbü hoba tükdebü koletko songdakbü shuong.

¹⁰Kanei siiei Zion hoba shedbüei Jerusalem dangda.

¹¹Leiyeibü shuongei besa shanga mat jemda, hoba ungshedbou shuongei mu kubüei songlenda hoba haoeibü thuseibü shuongei nam shanga lauda. Khei yingankei BUNYUBOU to nongda hoba lauda, “Sen yoa BUNYUBOU akisi? Thu amaibü aieikei sen thükto asühlabü.”

¹²Hibü kan laüa Zion sek tegü laünyinlabü, hoba Jerusalem leilubü tokenbü che yeilabü hoba lembüchem shongh kho lamang shongh tegü kilabü.