Read Chang Naga MIKA 4 Bible Online

MIKA 4 - Chang Naga bible

MIKA 4

¹Phaianyu ho tegü haüthüklabü, khei BUNYUBOUeibü chem shuong suokboua shongh onko danglabü, hoba phangshuong khüto kamshailabü.

²Hobaje phang juong loulabü hoba laulabü, “Kaiya, BUNYUBOU shongh hoba Jakob Mühghaü chem to angkho; hoba haoei haoeibü lamnyu shuong sen la lenlabü, hoba haoeibü lamnyua sen pailabü. Aishanga Zion ka ngühkhüm hoba Jerusalem ka BUNYUBOUeibü ngüh phinthonlabü.”

³Hobaje haoei phang juong yoa mat jemlabü hoba saabüa hau kibü phangshuong shanga janenkulabü. Hobaje haoenei jembü inei shap yaülabü hoba aubu laangku la janglabü, phangei phang khulimbo in atuoklabü, ayingsi touje haoenei wapyobü aditletlabü.

⁴Lausikei haoen mütpem weko jembü semlüh long hoba bhuklong phanga setlabü; hoba aoeikei haoen ühüttilabü, aishanga kho Thukenbou BUNYUBOU sembungei laua.

⁵Aishanga phang pendouei lulueibü mühghaü nyena paida, lausikei sen seneibü Mühghaü BUNYUBOU nyena ponpen thon akiko pailabü.

⁶BUNYUBOUei lauda, “Kho chaloua ngei sokebü leishailabü, hoba aoyou shian sattian ki hoba aoyou ngei khonkutikei haoen kamshaitilabü;

⁷hoba sokebü shuong kho ngei jouletbü yeitilabü, hoba shian sattian kibü shuong kho hau kibü phang che yeitilabü, hoba tou ka, hoba ponpen thon akibü shanga haoen thüka Zion shongha BUNYUBOUei song daklabü.”

⁸Hobaje no, O sanshuongeibü lapheishon, Zion nouyangshoueibü shonghshou, shaangbü Choba sangle songdakbou, Jerusalem nouyangshou sangle ka jungto loulabü.

⁹Tou no aila ngüh angko kaang haapda? Kan yoa Choba akisai? Ayingsi na hapjinei tegü khonkuei kan sühlabü lele kan la songsido maibü kubü maukei sai?

¹⁰O Zion nouyangshou, yaksa na hapjinei khonkubü tegü menei- ashi hoba wiashi, aishanga tou no sangnyu ka satlabü, hoba khongthua kilabü hoba no Babilon sühkokei haulabü; khünei no khümenlabü, khünei BUNYUBOUei no dangbou ik ka angthetlabü.

¹¹Hobaje tou phang juong no khulimbo kamshailabü hoba lauda, “Sao asaopoko yeitishi, hoba seneibü nyekei Zion to tangko chühtiashi!”

¹²Lausikei haoenei BUNYUBOUeibü dambü angekei; haoenei haoeibü lamthen aditen, aishanga haoei amshang kabü youshang tegü haoen thanshaian kia.

¹³“Meimeiashi, hoba ngünashi, O Zion nouyangshou! Aishanga ngei kaibü laang namkung la yeitikulabü, hoba ngei kaibü youdem chisak nam la yeitikulabü hoba nyi müt juong jeinyinlabü.” Nyi haoeneibü peisilei soletbü shuong kho BUNYUBOU la, hoba haoeneibü nyaksinam kaodak pendoueibü BUNYUBOU la khümbo kulabü.