Read Chang Naga MIKA 5 Bible Online

MIKA 5 - Chang Naga bible

MIKA 5

¹Tou kan shuong kamshaiashi, O sepai tan nouyangnyu, haoei sen khulimbo komlepan kia, haoenei Israel matjembou to amlanga namjuei ngümlabü.

²Lausikei no, O Bethlehem Efrata, no Jihuda chung lühbaka wean jinla yongko hansikei ka ka kü shanga Israel thüka songdakbou che longlabü, aoeibü thensilen pijihboujiha thama ki.

³Hibü ao na hapla khonkuda, saoei bukbü jih asühshongko haoei haoen khei apyolabü kho Israel jungto sepeinyu loulabü.

⁴Hobaje hao loulabü hoba BUNYUBOUeibü haua hoba BUNYUBOU haoeibü Mühghaü thükenbü yaangbü phanga haoei jembü sanshuong samlabü, hoba haoen athakko kilabü; aieilausi touje hao kaothon sühko yaangbü kilabü.

⁵Hobaje ho seneibü solo yinglabü, ladang Assiriabü seneibü kaonyek to lotlaje, ladang haoei seneibü Choba chem to youei naketlaje, kheijinei hao khulimbo senei sanlombü nyet hoba leiyeibü set phonlabü.

⁶Hobaje haoenei inei Assiriabü kaonyek leilutikulabü, hoba Nim- rod kaonyek in japan lomlabü, hoba ladang Assiriabü sen kaodak to lotlaje hoba seneibü leilanga naksühlaje haoei sen khümenlabü.

⁷Hobaje Jakobeibü jouletbü müt juong yoa BUNYUBOU ka nindei tegü hoba sang thüka lang loubü tegü kilabü, laobouei ong müt shanga haiyeiko akida.

⁸Hobaje Jakob jouletbü phangshuong yoa müt juong yoa yamkabü meisiau yoa molosaonyu tegü hoba sanshuong yoa molosaonyu paang che tegü kilabü aoei hao danko paithetda, khümenlabü aokei akiko nakan yantida hoba netla yeiko jitnyinda.

⁹Kaibü dangbou shuong thüka kaibü ik tuoktiashi, hoba kaibü dangbou pendou wapan apbuashi.

¹⁰Hobaje kho chalou ho kühshuoklabü dogo BUNYUBOUei lauda, “Khei ngei ka ka kaibü koli shuong wapan apbulabü hoba kaneibü kailong shuong leilutikulabü.

¹¹Hobaje kaneibü sangnyu shuong wapan aplabü hoba kaneibü lapheishon shuong tuongtikulabü.

¹²Hobaje kaibü ik ka seibüyaübü ngei wapan apbulabü hoba no touje thusei kümsilei kümbü shuong akilabü.

¹³Hobaje ka ka ngei kaibü kümbü noksa hoba kaibü saopobü thaonyu shuong wapan apbulabü, hoba touje kaibü ikküm iklei nyi alemlabü.

¹⁴Ka ka ngei kaibü Ashera koikoi lühan aplabü, hoba kaibü sangnyu shuong ngei mautilabü.

¹⁵Hobaje ngüha alebü phangshuong thükto ngo khau angbü hoba khau lotbüei phoklamlabü.”