Read Chang Naga MIKA 6 Bible Online

MIKA 6 - Chang Naga bible

MIKA 6

¹BUNYUBOUei hai lauda, kanei tou ditashi, meimeiashi, hoba shongh shuong thedanga nyi suajaashi hoba shonghshou shuongei kaibü ngüh dittiashi.

²O kan shongh shuong, hoba lo leko kibü kaodak chemshang, BUNYUBOUei oyolemenbü ditashi, aishanga BUNYUBOU jembü mütli to oyolemen che kia, hoba haoei Israel to ngühmat che kia.

³O kü mütli, ngei ka to ai kümbei? Kü khu limbo aukabü kuashi.

⁴Aishanga Ijep kaodak ka ngei no leiyenkei, hoba aao chem ka no angthetkei, hoba ka thedangto Mosa, Aron hoba Miriam hautikei.

⁵“O kü mütli, Moab Choba Balakei ai huonkei hoba Beoreibü shou Balaamei hao to ai jongaikei; tou damenashi, khei BUNYUBOUeibü saopobü kümsilei kanei ngela shanga Shitim ka Gilgal sühko haüthükbü damenashi.”

⁶Ai jungan ngo BUNYUBOU jungto loula, hoba ngo lolo Thükkabou Mühghaü junga lai khüpetla? Ngei juokbü lembü yoa po cheeibü masu shoushou sungbalep sai?

⁷Sanlon paang hajar juongei ayingsi onang shumang koubü hajar anei BUNYUBOU olintilep sai? Ngei ngühkhüm lulimbü shanga kü shou jayangshou hoba kü shabü shanga kü mang kabü hek lemla kulep sai?

⁸O müt, ai maibü ki kho haoei ka to lena. Ngühmaang lanko kümla hoba üei sanoula hoba ka Mühghaü yoa eaaoa pailabü to liman BUNYUBOUei ka ka ai khamda?

⁹BUNYUBOU to hatlabü kho songsihon. Haoei sangnyu to ngako lauda, “Ditashi, kan sangnyua kambü shuong!

¹⁰Amaibü mütshuongeibü chema haoenei maang alanko thanshaibü nyaksinam ki. Haoenei ngei mangsenbü yepeijawebü seret takbü jungeida.

¹¹Amlangbü takbü hoba seret aonko haubü mütshuong la ngei lai amai apbula thükkei?

¹²Kaneibü keijeibü danei shale jonglebü khüpettida, hoba kan pendou yepeibü ong ki.

¹³Hibü ngei kaneibü shedbü shabü laüa kan shemtila hoba leilutila khanga.

¹⁴Kanei shaulabü lausikei senyüh ashemlabü; kan mühei haiko ong kilabü. Kanei peisilei thanlabü lausikei yoshaian apholabü; kanei ai ong thanshailaje kho ngei wapyoa khümtilabü.

¹⁵Kanei wenlabü lausikei youman alatlabü; kanei oliv buhek semlabü lausikei onang nyi ladangkei anaangoulabü.

¹⁶Aieilausi kanei Omrieibü ngühkhüm hoba Ahab chemdang kümsilei pendou jungeida, hoba haoeneibü huona kan paida. Hibü ngei no sangliphang la yeitilabü, hoba ka mütshuongei hüi, dogo laulabü lele yeitilabü, kho tegü phangshuongei nyikubü kanei kümlabü.”