Read Chang Naga MIKA 7 Bible Online

MIKA 7 - Chang Naga bible

MIKA 7

¹Kü shanga ügütü! Aishanga sulang buhek heshaikhümbü tegü hoba semlüh seka shen maabü tegü ngo ki; shaulabü shen aki, kü soushouei shaang sembü buhek maangdak aki.

²Mühghaü to hatbü kaodak ka maua, hoba ngühmaang lanbü aokei aki. Haoen pendouei sii angtila haiyeida, haoen mütpem wekoei sung jungan jembü jaisina shieida.

³Amaibü kümlabüa sokosepbo haoenei ikphen lamakei, leiyeibü shuong hoba matjembü shuongei besa hida, hoba yaangenbü mütshuongei amaibü mangsühda lauda, kho tegü haoenei kho liko hokshaida.

⁴Haoen yoa maiboutham kho bijak tegü ki; pendou to tangbou kho ba lebü jaklong amaibou him. Kaibü lapheibou chalou süha kaibü kayang lousüha; tou haoen panglang phenyembüa kilabü.

⁵Lepbou to ayingsi lamshuok yen to maang telem; kaibü koukhüna sao thedanga kaibü sembung küpjemshi.

⁶Aishanga jayangshouei bou ühangenda, nouyangshouei nyu khu limbo, hoba namshaunyuei nyu khulimbo meimeida. Müt cheeibü dangbou shuong kho jembü chemdang kabü mütshuong ki.

⁷Lausikei ngeije BUNYUBOU to chühlabü, ngei ngeibü Mühghaü khümenbou shanga chüheilabü, kü Mühghaüei kü to ditlabü.

⁸Kü khu limbo tüolinyo, O ngeibü dangbou shuong, ngo tuongsikei ngo loenlabü, ngo nakthüha setsikei BUNYUBOU kü shanga ngesakbü kilabü.

⁹Haoei kümat ajemshongko hoba kü shanga ngühmai aküm shongko ngei BUNYUBOU khauangbü natenko künlabü, aieilausi ngei hao khulimbo shabü shonkei, haoei ngo ngesakbü to sungbalabü hoba ngei haoeibü khümenbü haplabü.

¹⁰Kheijinei ngeibü dangbouei kho haplabü, hoba aoei BUNYUBOU kaibü Mühghaü lanei ki? dogo laukei sao himouei shenlabü, ngeibü nyekei sao haplabü; touje khonga thim tegü sao naknyinlabü.

¹¹Kaibü ba kümthang kümetlabü chalou! Kho chaloua leilang lounyu hoba tham yeitilabü.

¹²Kho chaloua Assiria ka Ijep sühko hoba Ijep ka shumang sühko, hoba shongh ka shongh sühko, haoen ka jungto loulabü.

¹³Khei yingasikei mütshuong hoba haoenei kümenbü buhek shuong shanga kaodak kho sangliphanga kilabü.

¹⁴Kaibü phetphan sanlon shuong ka mütli aoyou bamang kao jenyua lamanga chem kida khübü kho lambo kaibü juei leiyeiashi; shangiedbü jihsiphai tegü haoen Bashan hoba Gileada samtishi.

¹⁵No Ijep kaodak ka longbü chaloua tegü ngei hao to seikümseilei lenlabü.

¹⁶Phangshuongei haplabü hoba haoeneibü hau pendou shanga himouan aplabü; haoenei jembü ikei sembunga yemlabü, haoen obanglabü.

¹⁷Pinyuei tegü haoenei thamngu selabü; kaoa paibü yangsikok meisiau tegü haoenei saklepan kibü jembü kishang ka sensentham lühko longlabü, haoen hatbü lühbüei BUNYUBOU seneibü Mühghaü jungto loulabü hoba haoen hatlabü.

¹⁸Jembü phetphan joubü shanga hoba ngühkhüm leilubü inletnyu phokulabü lele shedbü shabü apbubü no phatbü Mühghaü ao ki? No ponpen jembü khauanga akida, aishanga no üeisanoua olinda.

¹⁹No nyibou sepeilabü hoba kün thükto onou kilabü, hoba küneibü shedbü nyi you phanga naklepnyu apyolabü; pendou yungnyu haübüa jinan apbulabü.

²⁰Hobaje shangiedbü chaloua nyi küneibü pisibou to thekubü tegü Jakob la maanglembü hoba Abraham la üeisanou kulabü.