Read Chang Naga NAHUM 2 Bible Online

NAHUM 2 - Chang Naga bible

NAHUM 2

¹Aoei netla yeiko phetnyintida hao ka thedanga longa; wapyobü peisilei lamleashi, lamnyu khonei thoashi! kaibü shembe kaiashi! kaibü hau pendou jangngaiashi!

²Aishanga Israel yaangenbü tegü BUNYUBOUei Jakob yaangenbü nyibou sungbada; aishanga soshausoyungbü shuongei haoen kongenkua, hoba semlüh bhek leilukua.

³Haoeibü lakjaibü shuong aih saklangbü ki, maangkaangbü mütshuong nakthüngan saklangbü neisimei leakei; hao lamlebü chaloua kailong shuong son ponponda hoba hatlamoklabü che aubu shuong kho lepda.

⁴Kailong shuong khonga pongyoda, cheei che to kakyoko khongthua haoen hau longei dogo leda, haoen chühla wanthung tegü, langpon tegü haoen laangyoda.

⁵Sonenbü shuong haoei ngashaida, haoen paijinei phaiyetda, kümthang to haoen panteida hoba namlang tokshang kho lamlesapan phoda.

⁶Shumang koukhün shuong ipda hoba Chobaeibü chem kho hatbü mokbüa kida.

⁷Huzzab mütkong kia; sao langsena, hoba saoeibü medei shuongei guduru wibü tegü khukua jangko mang haapda.

⁸Lausikei shangied ka Ninevi thimdei che phatko kia, khei yingasikei haoen satda, “Loashi! Loashi!” dogo haoenei ngekda; lausikei aoeikei sepeian achühda.

⁹Kanei chandinam soletbü kho sungashi! hon soletbü kho leashi! aishanga namsek peisilei pendou ayingsi nyaksinam thon akiko ki!

¹⁰Sao kongkong, ai aki, hoba maangpon tühnyinan hoba youkük püpyoan, küksiho pendou haian, thenyek pendou phaklaktham yeida!

¹¹Molosaonyu paangshou samshang, molosaonyu paang hoba molosaonyu nyunyu paishang shoushou hanbü kishang lanei ki?

¹²Molosaonyu paangei jembü shou shanga shausiyung souko jitnyinkua hoba nyunyu shanga haitibü meisiau nyatettikukei; haoei haoeibü laangbob haitibü meisiauei hoba haoeibü laangchem phe shaknyinbüei shentikei.

¹³Chühashi, “Ngo ka khulimbo kia,” dogo lakjaibou BUNYUBOUei lauda; hoba ngei saoeibü kailong shuong wankhük longko jiklabü hoba inei kaibü molosaonyu paang shuong suilabü kibü ngei kaodak ka wapan aplabü, hoba kaibü ngühlang künbü shuong ngühlang touje aditlabü.