Read Chang Naga NAHUM 3 Bible Online

NAHUM 3 - Chang Naga bible

NAHUM 3

¹Ho yepeijawebü hoba soshausoyungbü peisilei shanga kia, wapyosuyobü thonan achühda!

²Lühei sembü ngühlang hoba kailong langh, koli toman shatko laangbü, kailong saiyeiko paibü;

³Koli sepai setbü in lepbü hoba aubu lepbü hoba haitibü mangjim juong thanshaian kibü hoba haibü mang thonbü thakbü aki, haoen haibü mang thüka haoen phaiyetda.

⁴Hobaje pendou kho asangalanbü shuong thüka asangalanbü thedüh maangdüh hoba seibüyaübü kakbü aoei phangshuong la asangalanbü shuongei huonettida hoba mütshuong saoeibü themai maangmai lenko khüpettikei.

⁵“Chühashi, Ninevi, ngo kakhu limbo kia!” dogo Thükenbü BUNYUBOUei lauda. “Kaibü ikset kaibü thenyek to himenkulabü, ngei phangshuong la kaibü mütkongbü himou to chühtilabü.”

⁶Ngei ka la mak hambulabü hoba no awealauko jungeilabü hoba no nyek pükshang che yeitilabü.

⁷Ka to chühbü pendouei ka ka satlabü, hoba laulabü, “Ninevi leiluan inleda, sao shanga aoei mang haapbula? ngei laka sao la haksotibou lambula?”

⁸Saoeibü kümthang kho dei hoba saoeibü lapheishon kho yungnyu che, dogo sao kaijembo dei Nail nyangko tenan kibü Thebes toje maibou sai?

⁹Saoeibü hau Ethiopia si Ijep kikei, hoba kho thon akitei, Put si Lubia saoeibü khangenbou kikei.

¹⁰Khei yingasikei sao sunglangkei, sao thüngshang to haukei, saoeibü shousi shuong khonga lambheka netla yeiko phetnyinkei hoba saoeibü yaangenbü shuong shanga haoenei phaang pakkei hoba saoeibü yaangbü müt pendou namlühei khühkei.

¹¹Tokei no jaaklabü, no hulabü, labou shuong ka nyi satetshang lamlabü.

¹²Lapheishon pendou shaang sembü bhuk hekbü bhuklong tegü kilabü, haoen nyaakeia longa shaubou sembung to khübü kho atda.

¹³Chühashi kaibü sepai shuong shanga kaneibü kaodak bakhün hopatham ipakei, wanei kaibü koukhin suia.

¹⁴Sang shibü shanga dei khushaiashi, kaibü la- pheishon shuong hau kingaiashi, shungkung kao khüto atashi shungkung kao kho dotashi, juoklaang yaüenbü khünei ik- phen lamashi!

¹⁵Khünei wanei no suilabü, inei no wapan attilabü, koksüng pühbüei tegü khoei no suian aplabü, no lolo koksüng tegü haashi, koksüng tegü no lolo juong yeiashi.

¹⁶Nyi kaibü namseibü shuong müha khanshoulitshou shuong tokei juongbou haatikei, koksüngei leilutikuda hoba pijung satda.

¹⁷Kaibü leiyeibü shuong koksüng phatko kia, kaibü dobou shuong kham chaloua ba youa onshaian kibü koksüng shuong phatko ki, hoba ladang chanyu longlaje haoen pijung satda; haoen lan ki kishang angeda!

¹⁸O Assiria Choba, kaibü sanlombü shuong yepakei, kaibü yaangbü shuong ngakda, kaibü mütli shuong shongha phinnyinan kia, hoba khübü leishaila ao aki.

¹⁹Ka la akbü haksotilabüje aki; kaibü moukhün yaangsepa. Kaibü ngühlang ditbü pendouei ka la ik ipbuda. Aishanga ao thüktoje kaibü thonsithak akibü amaibü kümsileiei asühko ki?