Read Chang Naga HABAKUK 1 Bible Online

HABAKUK 1 - Chang Naga bible

HABAKUK 1

¹Ho BUNYUBOUei Habakuk thuseibou danko hautibü ngühlang.

²O BUNYUBOU, ngei lalokche ngekla, hoba nyi aditla? Ngei ka to ikshatyobü shanga ngekkei, hoba nyi akhümenda.

³Aila shedbü kümbü nyi kü la haptida? hoba kü la khonsak haptida? Aishanga leilutibü hoba ikshatyobü küthedanga kia, hoba tokyobü kia, hoba senyobü longda.

⁴Hibü ngühkhüm nyungakei hoba ngühmai alongtida, aishanga amaibü shuongei saopobü shuong komlepda, hibü matjembü ayingbü to longda.

⁵Kheijinei BUNYUBOUei hao mütshuong to laukei, “Phangshuong thükto chühan hautishi hoba chühashi, hoba aeibou phenyembo kishi, aishanga ngei kan thükto denche kümda, laobou kan to lensi dogokei kho kanei maialemlabü.

⁶Aishanga ditashi, ngei Khaldibü amaibü hoba sobüsepbü phang phonlabü, hoba kishang laobou haoeneibü aying kho sungla kaodak shoongko haoen paida.

⁷Haoen hatlamoklabü matjem hoba yaangenbü haoen jembü lolo ka longtida.

⁸“Haoeneibü koli kongkhü tokei you sobou hoba chasembü sho shuong tokei aei sekokbou hoba haoeneibü koli sepai shuong haoen lolo sodasepda haü, haoeneibü koli sepai shuong saabü ka louda, hogonei suila panteiko haubü tegü haoenei seengeida.

⁹“Haoen pendou ikshatyola louda; haoeneibü thedang ae yeiko chanyu angbou aei yeian kia hoba haoenei langsenbü shuong kho phetsen tegü leishaida.

¹⁰Hobaje haoenei Choba shuong nyikuda hoba songdakbü shuong haoen thedanga ekyola leda, hoba lapheishon pendou haoenei nyikuda, aishanga haoenei kao ongenan mailemda hoba kao leda.

¹¹Kheijinei haoenei yei tegü souda hoba danda hoba shedbü mütshuong yuktila haoeneibü hau kho jembü mühghaü la yeitida.”

¹²O BUNYUBOU, ngeibü Mühghaü, ngeibü Saopobü ao thonbü thakbü akibü ka aying lo? Kün ühailep, O BUNYUBOU, nyi haoen matjemla yotilabü, hoba no, laang thangsheitila shanga hao kümbei.

¹³Amaibü to chühla kaibü nyek yongko hinseikei hoba shedbü kümbü to nyi chühla athük, khülonga nyi aila khüpbo langko jungeibü shuong to ong chühda, hoba amaibüei müt ao hao tokei saopobü ki, hao sujinei aila ngüh üangda?

¹⁴Aieilausi nyi yungnyu ngao hoba shoongaibü meisiau aoyou thüka songdakbü aki haoen tegü mütshuong yeitida.

¹⁵Haoei haoen pendou ngauyaüjinei tegü senenda, hoba haoei haoeibü taka haoen lapda, hoba haoeibü taka senshaida hibü hao olinda hoba yaangenda.

¹⁶Hibü haoei haoeibü tak la haitibü lembü kuda, hoba haoeibü tak la ponlem juokbü kuda, aieilausi khübü danko haoeibü phejan yaangbü hoba shausiyung apsileko ki.

¹⁷Hibü haoei phangshuong haitila shanga tak kho athakko kongan pholep lo?