Read Chang Naga HABAKUK 2 Bible Online

HABAKUK 2 - Chang Naga bible

HABAKUK 2

¹Ngo ngeibü lapheishona lolabü hoba ngo lolo lapheishona kilabü, hoba haoei kü to ailai jo- yolaje, hoba ngei maang ühaibüa haoei ai jongailaje ngei chühko haiteilabü.

²Hobaje BUNYUBOUei kü to jongaiko laukei, “Mangsang kho doashi, hoba aoei welaje hao laanglabü lele laangkhüha shangashatko phokuashi.

³Aishanga mangsang kho toukei jih pienbü jihsiphai shanga ki, hoba kho thonbü aeto panteida, hoba ayepeilabü, kho phaia tegükei, kho shanga haiyeiko kishi, aieilausi kho loulabü.

⁴Chühashi, haoeibü soushou yonglamda hao mang atang, lausikei saopobü shuong mailemei lang kilabü.”

⁵Maimaitham haü, ih kho khü- pet langettiko jungeibü ki, lilisese müt, ao chema akida, aoei jembü maangdak yemlam tegü yaangtida, hoba haibü tegü hao ki, hoba senyühshembo hao jungto phang pendou leishaida, hoba hao jungto müt pendou takshattida.

⁶Habü pendouei hao khulimbo ngüh- phatbü che hoba hao khulimbo haklabü tetenbü leko ho khei alaulep lo? “Ao müt jembüeibü ayingbüei aei kiko keiko yeilaje hao ügütü! Lalokche keila? hoba kho hao lolo thebülanbü shuongei manko künda.?”

⁷Ka to takla haoen mangde ong loulabü, hoba no seneila lakseplabü, hoba haoen thedanga no leilubü peisilei yeilep aying lo?

⁸Aieilausi nyi phang juong leilutisije hoba mütshuong sii angtisije kaonyeka hoba sangnyu hoba khünei kibü pendou to phang pendouei no leilutikulabü.

⁹Aoei jembü chemdang shanga amaibü ku sungbada, khei amaibü ik ka khümenla jembü hap thükaenei kümda, hao ügütü!

¹⁰Phang juong wapan apbüei nyi kaibü chemdang to himou huonsiyou takkei, hoba ka soushou khulimbo shed shonkei.

¹¹Aishanga kümthang ka laangei ngeklabü, hoba bu ka phemei kho jongailabü.

¹²Aoei sii angtibüei sang sangda hoba shedbüei sangnyu kümda hao ügütü!

¹³Chühashi phangshuongei wan shanga kümbü kho hoba phangshuong amlangbü shanga hübü mangbü kho Thükenbou BUNYUBOU ka aying lo?

¹⁴Aishanga deiei yungnyu sopbü tegütham, BUNYUBOU soneikangbü hapbüngebüei kaodak shenlabü.

¹⁵Aoei müla haoeneibü himou chühla shanga yunglabü laoboua kaibü khauang yeian jinkuan kuda, hoba toukei jaaktida hao ügütü.

¹⁶Soneikangbü jeiko no himouei shenlabü, nyi yungashi hoba kipan üpbü che tegü kishi! BUNYUBOUeibü mae ik kabü thung ka jungto sepeilabü, hoba kaibü soneikangbü thükto himou loulabü.

¹⁷Aishanga Lebanon to ik shatbüei no küpleplabü hoba meisiau shuong mautibüei haoen hattilabü; mütshuong sii phinbü kaonyeka ik shatyobü, hoba sangnyua hoba khünei kibü pendou to kümbü haangjung khoei no küpleplabü.

¹⁸“Heangsho noksa kümbüei kümbü ayingsi tühnyinbü heangsho, khüpbülangbü lenbou kho ai ku? Aishanga aoei ladang ngoubü heangsho kümda, haoei khünei maanglemda.

¹⁹Aoei bu to, ‘Piashi!’ dogo hoba ngoubü laang to, ‘Laksepashi!’ dogo lauda, hao ügütü; khoei tang khitbü kulep sai? chühashi, kho hon si chandinamei naanglepan kia, hoba khonei hak aki.

²⁰Lausikei BUNYUBOU hao saopobü lembü chema kia; kaodak pendou hao thedanga ngüh üangko kishi.”