Read Chang Naga HABAKUK 3 Bible Online

HABAKUK 3 - Chang Naga bible

HABAKUK 3

¹Habakuk thuseibüei Shigionota welaubü che:

²O BUNYUBOU, ngei ka shangabü dida, hoba kaibü kümsilei to ngo hatko loda. O BUNYUBOU, po kanglanga kaibü kümsilei haan khangettiashi; po kanglanga kho ngetiashi. Maangpokjinei onou damenashi.

³Teman ka Mühghaü loukei hoba Paran shongh ka Saopobou loukei. Haoeibü soneikangbüei müh, hoba haoeibü nyensangei kaodak shenan kikei.

⁴Ngesakbü tegü haoeibü soneikangbü kikei, haoeibü ik ka jayou longkei; hoba khünei haoeibü sei huan phokei.

⁵Hao thedang to limsilang satkei, hoba haoeibü you junga wan tegü shieikoe haukei.

⁶Hao lokei hoba kaodak takan chühkei. Haoei chühkei hoba phangshuong nyaakeikei. Ponpen thon akinyu shongh shuong lintikei; Ponpen kibü shonghshou shuong phangjung koukei; haoei kümbü ponpen thon aki.

⁷Ngei Kushan neichem shuong khonkua hapbei; Midian kaodaka thangtet nei lühkei.

⁸Yungnyu shuong khulimbo BUNYUBOU aolinko kikei sai? Kaibü khauang longbü shumang shuong khulimbo kikei sai? Ayingsi yungnyu khulimbo no maangshat kikei sai? khei koli shuong thüka, hoba thükbü kailong thüka, setlabü lele?

⁹Kaibü laujin khek ka laujin sungenkei, hoba lüha laujin khipbü phangshuong to laubü maimaitham kikei. Nyi shumang shuongei kaodak janyinda.

¹⁰Shongh shuongei no hapbei hoba hatko kikei; deinyu yeinak yaangbü danjung haukei. Haülangbüei jembü ngühlang longtikei, hoba haoeibü ik thükae to tonan angtikei.

¹¹Kaibü laujin shuong pijung haujinei no lailaibü kaibü aubu sona chanyu si litnyuei jembü kishanga atopeiko loyoan khüpbei.

¹²No khau lotan kaonyek danko paikei, nyi phangshuong khauang lotbüa nakeikei.

¹³Kaibü mütli khümenbü shanga kaibü pienbü shuong shanga no haukei; Amaibou chem ka nyi ju ngümnyinkukei, youshi ka ngüm sühko mütkong phokukei.

¹⁴Haoeneibü lakjaibü shuong khu nyi jembü aubuei sepyetkukei. Ngo lintila haoen kü jungto mühghaü yei tegütham loukei; haoen olinyobü kho huphanga shalebü shuong suila shanga kiteikei.

¹⁵Nyi kaibü koli shuongei yungnyu deilo yaangbü to nakeikei.

¹⁶Ngei ditkei hoba ngeibü mang lühkei. Ngühlangei ngeibü sembung khop lühda; ngeibü lo to shat longda hoba ngeibü kishanga ngo lühkei, khei haoen shila mütli shuong khulimbo loubü khonku chalou shanga ngei haiyeilabü.

¹⁷Aishanga bhuklonga pon aponsikei, semlüh longa hek akisikei, Oliv bulongei lang ahekkusikei; sanlon shuong ka sanlon wapan apbusikei, hoba masu chema masu tan tan akisi dogokei.

¹⁸Khei yingsikei ngo BUNYUBOUa olin angko kilabü, ngei ngeibü khümenbü Mühghaü to olinlabü.

¹⁹Mühghaü BUNYUBOU kho ngeibü hau ki; hoba haoei ngeibü you meishieibü you tegü yeitikuda, hoba ngo ngeibü shongha paitida.