Read Chang Naga ZEFANIA 1 Bible Online

ZEFANIA 1 - Chang Naga bible

ZEFANIA 1

¹Jihudabü Choba Amoneibü shou Josia haanga BUNYUBOUeibü ngüh Kushieibü shou Zefania jungto loukei. (Zefania kho Kushi, Gedalia hoba Amaria danko thenbü Hezekia Choba thensilen ka loubü kikei.)

²“Kao thüka ngei pendou lepde mautilabü, dogo BUNYUBOUei lauda.

³Ngei müt si meisiau shemtilabü, müh kabü aushuong hoba yungnyu kabü ngau shuong shemtilabü, hoba ngei amaibü shuong tuongtilabü, hoba kaonyu ka ngei müt wapan aplabü, dogo BUNYUBOUei lauda.

⁴“Jihudabü thükto hoba Jerusalema kibü shuong thükto ngei ngeibü ik shinglabü, hoba ho kishang ka ngei Baal thon leko joubü hoba heangsho lembü ungshedbou shuong nyen,

⁵hoba chemdaka müh kabü chanyu, litnyu hoba khanshoulitshou to khüpetbü shuong, hoba aoyouei BUNYUBOU to khüpetda lausikei Molekei theyolanyoda,

⁶hoba aoyouei BUNYUBOU phaito sembü ka sepeinyu satkei, hoba aoyouei BUNYUBOU alam ayingsi hao to aphe haoen wapan aplabü.”

⁷BUNYUBOU Mühghaü thedanga no sangsembo kishi, aishanga BUNYUBOUeibü chalou nyangko kia; aishanga BUNYUBOUei haitibü lembü che lamleakei, haoei haoeibü medei shuong saüenan phoakei.

⁸BUNYUBOUeibü haitibü chaloua ho hai yinglabü, khei ngei leiyeibü shuong hoba Chobaeibü shousi shuong hoba küksithangeibü neisimei lebü mütpem weko shieinangeilabü.

⁹Aoyouei khonga sai- yeida hoba haoeneibü bunyu chem ik shatyobü hoba khüpbü langbüei shentida haoen pendou ngei kho chaloua shieinangeilabü.

¹⁰BUNYUBOUei lauda, “Kho chaloua ngei koukhün ka ngekbü ngühlang che kilabü, hoba nyiboubü kishang ka lemenbü hoba shonghshou shuong ka leilubü ngüh yaang kilabü.

¹¹Lemenashi, kan Mortara kibü mütshuong pendou maulabü; chandinam kümbü pendou wapan aplabü!

¹²“Hobaje kho chaloua ngei hantin jungan Jerusalem lamlabü, aoyou ho phatan sangsemetnyu ki, khei aoyoueibü maangpona BUNYUBOUei maibü akümlabü ayingsi amaibü akümlabü.

¹³Hobaje haoeneibü nyaksinam mauto janlabü, hoba haoeneibü chem shuong sangliphang la yeilabü; haü, haoenei chem danglabü lausikei khübünei akilabü, hoba haoenei semlüh sek moulabü lausikei khüka haoenei semlüh ih ayunglabü.”

¹⁴BUNYUBOUeibü chalou yaangbü nyangko kia, khei BUNYUBOUeibü chalou ngüh kho nyangko kia hoba aeibou panteiko louada, khünei lakjaibü shuongei aeibou ngekda.

¹⁵Kho chalou kho maangpokbü chalou, khonkulabü hoba maangto shatlabü chalou leilubü hoba maushangdanglabü chalou, sangmei hoba nakshou naknyu chalou.

¹⁶Lapheishon kümbü sangnyu shuong hoba lapheishon suokbü shuong khulimbo teklaang metbü hoba lason uihinbü chalou ki.

¹⁷BUNYUBOUei lauda, “Hobaje mütshuong thükto nyekthubü shuong phatko paila ngei maangto shatlabü sungbakulabü; aieilausi haoenei BUNYUBOU khulimbo shed shonkei hoba haoeneibü sii thaonyu tegü hoba haoeneibü phe phetla yeilabü.”

¹⁸BUNYUBOU khauang maang- pok chaloua haoeneibü chandinam ayingsi honei haoen khümenla athüklabü. Lausikei kaonyek khümbo hao khauang maangpok wanei suian aplabü, aishanga kaonyeka kibü haoen pendou haoei thonbü, khei hatlamoklabü thonshang che to loutilabü.