Read Chang Naga ZEFANIA 2 Bible Online

ZEFANIA 2 - Chang Naga bible

ZEFANIA 2

¹Kan lolo liko kamshaiashi; haü, chela takshatashi, O himou akakbü phang;

²youshou sho tegü souan aplabü chalou alousühjinei, kan thükto BUNYUBOU hatlamoklabü khauang longbü chalou aloujinei, BUNYUBOUeibü khauang maangpok kan thükto aloutoua.

³Kaodaka sembüambü kan pendou aoyouei haoeibü sakkubü ngühkhüm jungeida, BUNYUBOU lamashi, saopobü phanashi, sembüambü phanashi, ai ngenyu BUNYUBOU khau lotbü chaloua kan huletlabü.

⁴Aishanga Gaza inletlabü hoba Ashkelon mauto janlabü, changea haoenei Ashdod shian aplabü, hoba Ekron li ka pheian aplabü.

⁵Yungkou nyangko kibü mütshuong Karetbü phang ügütü! BUNYUBOUeibü ngüh kan khulimbo kia, O Kanan, Filistiabü kaodak, khonei müt akilabü lele, ngei no mautilabü.

⁶Hobaje yungko kho lamshaushang, sanlombü shuong shanga laangbob hoba san shuong shanga chem yinglabü.

⁷Hobaje yungko kho joubü Jihudabü mütli shanga kilabü, khonei haoeneibü shatsinam lamshautilabü. Ashkelon mütli haoen chasemlamto leketnyu yepan kilabü; aishanga BUNYUBOU haoeneibü Mühghaüei pean chühlabü hoba nyibou haoen langsenbü shuong leingailabü.

⁸Moabei hakbülaubü, Ammon shousi shuongei awealaubü, laobouei haoenei jembü mütli to hakkei hoba haoeneibü leilanga kibü khulimbo jembü lolo yaangenkei, ngei dida.

⁹Hibü Israel Mühghaü, Thükenbou BUNYUBOUei thekolanko lauda, “Maimaitham Sodom tegü Moab si Gomora tegü Ammor shousi shuong yeilabü, senou hoba jem khünyet, hoba ponpen shanga sangliphang; joubü kü mütli shuongei haoen ka soshau soyunglabü hoba jouan kibü kü phangshuongei haoen lelabü.”

¹⁰Haoen yonglam lilibü shanga haoeneibü thu ho yinglabü aieilausi Thükenbou BUNYUBOUeibü mütli shuong khulimbo haoenei aweasüng hoba haoen lolo yaangenkei.

¹¹Haoen khulimbo BUNYUBOU hatlamoklabü yinglabü, aishanga kaodakbü mühghaü pendou haoei müheinouei shemtilabü, hoba mütshuongei hoba müt weko jembü kishang, khei yungkoa kibü phang pendouei hao to khüpetlabü.

¹²Kan Ethiopiabükei ngeibü inei wapettilabü.

¹³Hobaje yungkük ae khulimbo haoeibü ik shinglabü hoba Assiria mautilabü, hoba haoei Ninevi sangliphang phetsen kao hoba ulangbü tekan apbü che tegü yeitilabü.

¹⁴Hobaje sao jenyua meisiau shuong pendou lekeitilabü, hogon si san saoeibü sangnyua thünglabü; ukhoungbaei kouloma wilabü, koukhüna aukhomakmakei wilabü, aishanga saoeibü cedar bu kho lengtian phokulabü.

¹⁵Jembü lolo ong, “Ngo kia, kü to limbo ao aki,” dogo laubü olinbü sangnyu kho ho ki. Sao lai sangliphang yamkabü meisiau thüngshang la yeian ki! Sao nyangko danbü wekoei sao la nyikuda hoba jembü ik semyoan jungda.