Read Chang Naga ZEFANIA 3 Bible Online

ZEFANIA 3 - Chang Naga bible

ZEFANIA 3

¹Songdak khulimbo lobü hoba shaan apbü, shieinangeibü sangnyu sao shanga ügütü!

²Saoei ngüha ale; tangtikubü saoei asunglet, saoei BUNYUBOU to maialem, saoei saoeibü Mühghaü nyangko alou.

³Saoeibü songdak leiyeibü shuong sao thedanga ngühko kibü molosaonyu shuong ki; saoeibü matjembü shuong nangnakbü selong shuong ki; haoenei ngeyang sühko aikei joutian aphokuda.

⁴Saoeibü thuseibü shuong pejapela hoba mailem akibü mütshuong saoeibü ungshedbou shuongei lemshang shatikei; ngühkhüm akibü mütshuong; ngühkhüm to haoen ik atda.

⁵Hao to BUNYUBOU saopobü ki; haoei shedbü akümda; nge- yang weko haoei jembü matjem sungbada haoei athük amin ühüpda; lausikei ngühmaang alanbüeije himou angeda.

⁶BUNYUBOUei lauda, “Ngei phangshuong wapan apa haoenei wapyo lapheishon leiluakei; aokei apailabü lele ngei haoeneibü khong leilutikuakei, haoeneibü sangnyu shuonga aokei akilabü lele leiluakei.”

⁷Ngei laukei, “Maimaitham haoei kü to hatlabü, haoei ngei tangtibü sungletlabü; hibü sao kishang aleilulabü; lausikei ngei sao shieinangeilabü, lausikei haoenei tongde meimeikei hoba haoenei kümbü pendou totnyinkukei.

⁸“Hibü shieinangeibü ngo meimeibü chalou asüh shongko kanei kü shanga haiyeiko kishi” dogo BUNYUBOUei lauda, “aishanga ngei maangangenbü kho phangshuong leishaila, ngei sangle shuong yoshaitilabü, khei ngeibü hatlamoklabü khauang longbü haoen thükto ngeibü janbü khauang longbü khüpan jinkula shanga ki; aishanga kaodak pendou ngeibü nyek to shatbü wanei suilabü.

⁹“Aishanga kheijinei ong chikung ngühkung cheei hao khangenlabü, khei haoen pendouei BUNYUBOU nyena ngalabü, ngei mütli shuongeibü ngüh hinseitham yeitikulabü.

¹⁰Ethiopia shumang shuong danjung hauan, yungkük kao saabü ka phinthon- an kibü ngeibü nouyangshousi shuongei kü jungto lembü jungan loulabü.

¹¹Kho chaloua ainei ong nyi kükhu limbo ngühkhüm leilukei, nyi kümbü pendou shanga no himouko akilabü; aishanga kheijinei ngei kan yo ka yonglambo yaangenbü shuong sungan aplabü, hoba touje kanei ladangkei ngeibü saopobü shongha yaangenko hoba lilisesea akilabü.

¹²Aishanga ngei kan yoa eaaoabü sembüambü mütshuong hoba shalebü mütli phokulabü hoba haoenei BUNYUBOU nyena mailemlabü.

¹³Jouan kibü Israelei shedbü akümlabü ayingsi amlang ngüh alaulabü, ayingsi haoeneibü sembunga khüpettibü lishang ühüplabü, aishanga haoenei shaulabü hoba leketnyu yeplabü, hoba aoeikei hao ühüt amoktilabü.”

¹⁴O Zion nouyangshou chia lauashi, O Israel! Ngekashi, maangpon pendouei olinashi hoba olinangko kiashi, O Jerusalem nouyangshou!

¹⁵BUNYUBOUei kaibü matjem sunglanga, haoei kaibü dangbou shian apbua; Israel, Choba khei BUNYUBOU ka yoa kia; touje nyi amaibü to ühütlabü.

¹⁶Kho chaloua Jerusalema laulabü; “No tehüt, O Zion, kaibü ik nyibutham tekima.

¹⁷BUNYUBOU kaibü Mühghaü kala thükbü kula ka yoa kia; haoei khümenlabü; olinbüei ka thüka olin angko kilabü, haoei haoeibü sanoua hakso kilabü, ka thüka haoei chia lauko olinlabü.

¹⁸Kaneibü lemalanga maangmau tetletbü, ngei kuktikulabü; kan la nyikubü ngei sungan apbulabü.

¹⁹Chühashi, kho chaloua kan shieinangeibü pendou to ngei kümlabü. Ngei sokebü khümenlabü, hoba shian apbü shuong leishailabü. Hobaje kaodak pendoua himoua kibü ngei haoen nyenshen yeitilabü hoba nyen sangtilabü.

²⁰Kho chaloua ngei kan leingailabü, hoba kho chaloua ngei kan leishailabü. Aishanga ladang kan thüngshanga kaneibü thea ngei nyibou leingailaje, ngei kan nyenshen yeitilabü hoba kaodakbü mütli pendou yoa nyen sangtilabü,” dogo BUNYUBOUei lauda.