Read Chang Naga HAGAI 2 Bible Online

HAGAI 2 - Chang Naga bible

HAGAI 2

¹Lit nyetboubü chalou saotoche bounyeta thuseibou Hagai danko BUNYUBOUeibü ngüh ho hai loukei.

²Jihudaa governor Shealtieleibü shou Zerubabel, hoba thükkabou ungshedbou Jihuzadakeibü shou Joshua to, hoba jouletbü mütli shuong to ong ho hai lenshi:

³Kan yoa ho chem shaangla soneikangbüa hapbü ao hanei jouan ki? hoba tou kanei ai chühenda? Ho kan thea ai aying yingkao lo?

⁴Khei yingasikei hau kiashi, O Zerubabel, dogo BUNYUBOUei lauda, hoba hau kian kishi, O Joshua, thükkabou ungshedbou Jihozadakeibü shou, hoba hau kiko kishi, kaonyeka kan mütli pendou dogo BUNYUBOUei lauda, hoba kümashi, aishanga ngo kan yoa kia, dogo Thükenbou BUNYUBOUei lauda.

⁵Kan Ijep ka longjinei ngei kan yoa theyolanyobü ngüh damenashi, hoba ngeibü soushou kan yoa kia, kan tehüt.

⁶Aishanga Thükenbou BUNYUBOUei ho tegü lauda, “Toukei longche kian, ngei müh si kao, kao si yungnyu nyakeilabü.

⁷Hobaje ngei phang pendou nyakeilabü, hoba phang pendouei maangdühbü loulabü, hoba ngei ho chem soneikangbüei shentilabü, dogo Thükenbou BUNYUBOUei lauda.

⁸Chandinam ngeibü hoba hon ngeibü, dogo Thükenbou BUNYUBOUei lauda.

⁹Shaangbou toje phaibou soneikangbü yaangbou kilabü dogo Thükenbouei lauda, hoba kho kishanga ngei hakso naangmai kulabü, dogo Thükenbou BUNYUBOUei lauda.”

¹⁰Lit güboubü chalou saoto leiboua Darias po nyiboubüa thuseibou Hagai danko BUNYUBOUei ngüh ho hai loukei.

¹¹Thükenbou BUNYUBOUei ho hai lauda: “Ungshedbou shuong to ngühkhüm shanga ho hai pheashi:

¹²‘Atei jembü shembe kaibüa saopobü phe künalonga hoba haoeibü shembe kaibü khoei wentek to, ayingsi senbütakbü ayingsi ih ayingsi onang, ayingsi phe at to meitia longa kho saopobü yeilep sai?’ Kheijinei ungshedbou shuongei jongaiko laukei, ‘Aying.’”

¹³Kheijinei Hagaiei laukei, “Haibü mang to meitibü danko asaopobüei khübü to meitia longa kho asaopoko yeilep sai?” Hobaje ungshedbou shuongei jongaiko laukei, “Kho asaopobü kilabü”.

¹⁴Kheijinei Hagaiei laukei, “Kho tegü ho mütli kia, hoba kho tegü ho phang kü thea kia, dogo BUNYUBOUei lauda, hoba kho tegü haoeneibü ikkümiklei pendou kia, hoba haoenei lauda khonei asaopobü kia.”

¹⁵“Lausikei tou ngei kan to sudajada, tat ka hoba tou ka jaüanje daman chühashi, BUNYUBOUeibü lembü chema laang che thüka che tenan akibü chalou ka tou sühkoa kanei lai kümbei?

¹⁶Ladang cheei takletbü lilabü saoche phoshang to haukei, khonei an ong kikei, ladang cheei ih phoshang to takletbü anjin sem sungenla loukei, khonei saoche ong kikei.

¹⁷Kaibü ikkümikleia senlaang hoba nindei hoba shatsinyat yangbemei ngei ka to ngümbei, khei yingasikei nyi kü jungto asepei dogo BUNYUBOUei lauda.

¹⁸Daman chühashi, ngei kan to sudajada, ho chalou ka hoba thedang to lit güboubü chalou saoto leibounyet ka BUNYUBOUeibü chem huongbü chalou ka daman chühashi.

¹⁹Toukei punga lilabü kia sai? hoba semlüh, bhuk hoba chilang long hoba oliv long shuongei tou sühko aikei ahekkuda lo? Tat chalou ka jaüanje ngei kan haükulabü.”

²⁰Hobaje BUNYUBOUeibü ngüh nyibou Hagai jungto chalou saoto leibounyeta ho hai loukei:

²¹“Jihudabü governor Zerubabel to ho hai joyoashi: Ngei mütshuong hoba kaodak nyaakeilabü;

²²hoba ngei Choba sangle shuong, Choba setshang apbulabü, hoba ngei phangshuongeibü Choba sangle hau leilutikulabü.

²³Kho chaloua, Thükenbou BUNYUBOUei lauda, O Zerubabel, ngo khangenbou, Shealtieleibü shou, ngei no lelabü, dogo BUNYUBOUei lauda; hoba ngei no tükdebü ikjikhap tegü yeitilabü, aishanga ngei no pienkei,” dogo Thükenbou BUNYUBOUei lauda.