Read Chang Naga ZEKHARIA 1 Bible Online

ZEKHARIA 1 - Chang Naga bible

ZEKHARIA 1

¹Darias nyibou po lit setboubüa thuseibou Iddoeibü shou Berekiaeibü shou Zekharia jungto BUNYUBOUeibü ngüh loukei.

²“Kaneibü pisibou to BUNYUBOU aeibou khauangko kikei.

³Hibü nyi haoen to lenashi, Thükenbou BUNYUBOUei hai lauda, ‘Kü jungto sepeiashi’ dogo BUNYUBOUei lauda, hoba ngo kan jungto sepeilabü, dogo BUNYUBOUei lauda.

⁴Kaneibü pisibou tegü kan teki, aoyou to shangied thuseibü shuongei ho hai ngekko laukei: Ho tegü Thükenbou BUNYUBOUei lauda, tou kan amaibü lamnyu shuong ka hoba amaibü kümbü shuong ka sepeiashi, lausikei haoenei adit, ayingsi kü la maang aku, dogo BUNYUBOUei lauda.

⁵Kaneibü pisibousi shuong haoen lanei ki? hoba thuseibü shuong haoen pon- pen kida sai?

⁶Khei yingasikei ngeibü ngühshuong hoba ngeibü ngühkhüm deikhüm laobouei ngei ngeibü khangenbü shuong thuseibü shuong la sakkukei, khübü khoei kaneibü pisibou si shuong alaphet lo? Hibü haoen sepeikei hoba laukei, ‘Thükenbou BUNYUBOUei seneibü lamnyu shuong hoba senei kümbü kümsilei thüng, sen to kümla dambü tegü haoei sen to jungeikei.’ ”

⁷Lit anthükche boubü chalou saoto leiboubüa laobou Shebat lit, Darias po nyiboubüa thuseibou Iddoeibü shou, Berekiaeibü shou Zekharia jungto BUNYUBOUeibü ngüh loukei.

⁸Ngei nangnak hapbei hoba chühashi, ngei müt che koli thupaibü chenei setan hapbei, hoba hao mertel bulong yoa loan pholi kokkhüna hapbei, hao phainei saklangbü, monjungbü hoba thupaibü koli shuong kikei.

⁹Khünei ngei laukei, “O kü bunyu, habü ho ai?” Kheijinei kü to jongaiko khuthük hangangbüei kü to laukei, “Habü ho ai ong yingkeije ngei ka la lenkho.”

¹⁰Hobaje mertel bulong yoa loan kibou mütei jongaiko laukei, “Habü ho BUNYUBOUei kaodak khümbo pean chühla hautibü shuong ki.”

¹¹Kheijinei haoenei mertel bulong yoa loan kibou BUNYUBOUeibü hangangbü to laukei, “Künei kaodak khümbo senyühshembo küpjeman kia.”

¹²Kheijinei BUNYUBOU khuthük hangangbüei laukei, “O Thükenbou BUNYUBOU, Jerusalem si Jihuda sangnyu shuong, laobou to nyi po anjinlei sühko khauangko kikei, khüto nyi lalokche üeisanou akiko kila?”

¹³Hobaje khuthük hangangbü, aoei kü to joyoko kikei hao to BUNYUBOUei ngüh maibü hoba inyaibüei jongaikei.

¹⁴Hibü kü to joybou khuthük hangangbouei kü to laukei, Nyi hai ngekashi, Thükenbou BUNYUBOUei lauda: “Ngei Jerusalem si Zion shongh shanga aeibou nyekto shatda.

¹⁵Hobaje nyibutham kibü phangshuong to ngo aeibou khauangda, aishanga ladang ngo hansho ong khau angko kikei, haoenei aei amaibou yeitikei.

¹⁶Hibü BUNYUBOUei hai lauda, Ngo Jerusalem to üeisanoua longeilabü lele chem khünei danglabü dogo Thükenbou BUNYUBOUei lauda, hoba Jerusalem thüka tetsida che kümlabü.”

¹⁷Nyibou ho hai phinthonashi, “Ho tegü Thükenbou BUNYUBOUei lauda: Ngeibü sangnyu shuong nyibou naangmaibüei soplabü hoba BUNYUBOUei nyibou Zion thüka onou kilabü hoba nyibou Jerusalem pienlabü.”

¹⁸Hobaje ngei ngeibü nyek müh aeto chühan angtikei, hoba hapbei, hoba chühashi, khünei masupongsu laang lei kikei.

¹⁹Kheijinei kü to joyoko kibou khuthük hangangbü to ngei laukei, “Habü ho aiai?” Haoei kü to laukei, “Habü ho Jihuda, Israel hoba Jerusalem phinnyintibü laang shuong ki.”

²⁰Kheijinei BUNYUBOUei kü la namyaübü müt lei lenkei.

²¹Khünei ngei laukei, “Habü ho ai kümla louda?” Hobaje haoei jongaikei, “Habü ho Jihuda lintibü laangshuong ki, khei yingsije müt cheei ongkei kho aphonen, hoba phangshuong laobouei Jihuda kao khulimbo lintila shanga laangshuong phonenkei khübü to wapyola tekan aplabü.”