Read Chang Naga ZEKHARIA 11 Bible Online

ZEKHARIA 11 - Chang Naga bible

ZEKHARIA 11

¹O Lebanon, kaibü cedar bulong shuong wanei suilabü lele kaibü koukap shuong ipashi.

²Lemenyoashi, O fir bulong shuong, aishanga cedar bulong to ngakei, aieilausi maibou shuong leiluakei, lemenyoashi, O kan Bashanbü yembulong shuong, aishanga lamang chengshema.

³Ditashi, sanlombü shuong, lemenbü ngühlang che; aieilausi haoeneibü soneikangbü leiluakei; Ditashi, molosaonyu paang ngühbü che, aishanga Jordan nyenhang leiluakei.

⁴Ho tegü BUNYUBOU ngeibü Mühghaüei lauda, “Haitilabü sanshuong samashi,

⁵jekbü shuongei haoen wapetda hoba haoen lolo shedbü aki dogo kida, haoen kibü shuongei lauda, ‘BUNYUBOU haübou yingshi,’ aieilausi ngo keibü ki; hoba haoen jembü sanlombü shuongei haoen to asanouda.

⁶“Aishanga kaonyeka kibü to touje sanou akaklabü dogo BUNYUBOUei lauda, lausikei ditashi mütshuong weko ngei haoeneibü lepbü sangmangeibü ika hoba haoeneibü Chobaeibü ika khümbo kulabü, hoba haoenei kaonyek kho lelabü hoba haoeneibü hau ka ngei kan khümenlabü.”

⁷Hibü ngei haitilabü sanshuong, maimaitham aao la lebü san dan ngei sambei, hoba ngei julo penyi tegü che to ngei onoubü dogo ngakei, hoba che to thangjambü dogo ngakei, hoba ngei san dan kho sambei.

⁸Hobaje lit chenei ngei sanlombü sem haitian apbei, aieilausi ngeibü soushouei haoen to anatenko apbei, hoba haoeneikei ngo amangsüh.

⁹Kheijinei ngei laukei, “Ngei kan apangteilabü; ai hailabü ki, haila thükkei, ai maulabü ki maula thükkei hoba jouan kibü shuong wekoei jembü lepboueibü phe shaulabü.”

¹⁰Hobaje ngei ngeibü julo hemaibüei mütli pendou to ngeibü theyolanyobü kümbü ngei leilula shanga kho ngei penyi la yeiko thongokkei.

¹¹Hobaje kho chaloua kho leilukei, hoba kho tegü aao la lean kibü san dan kü to ngüha leko kibü san shuongei kho BUNYUBOUeibü ngüh dogo ngean kikei.

¹²Hobaje ngei haoen to laukei, “Kanei maia dogo damalonga ngeibü mukei kü la labü hoba kho khei ayinglonga kho khei apyoshi.” Hibü haoenei ngeibü mu shanga chandinam shekel khujin takkukei.

¹³Hobaje BUNYUBOUei kü to laukei, “Haoenei ka la munam yaang kubü kho thanshanga jinkushi.” Hibü ngei chandinam shekel khujin kho BUNYUBOUeibü chem thanshanga jinkukei.

¹⁴Kheijinei Jihuda si Israel kanglanga bukjambü leilutila shanga ngeibü nyiboubü julo “Thangjam,” ngei penyi la yeiko thotetkukei.

¹⁵Hobaje BUNYUBOUei kü to laukei, “Tokei nyi hangalongbü sanlombü shuong shangabü peisilei nyi lolo sungashi.

¹⁶Aishanga ditashi, ngei sanlombü che kaonyeka longtilabü aishanga laobou mauan ki haoei alamlabü laobou aan ki kho haoei chühko lambo ohaulabü ayingsi laobou ong maian ki haoei asamlabü, lausikei haoei netbü phe shaulabü, hoba haoeneibü youdem netla yeiko leilutikulabü.

¹⁷Sanshuong apyobü amubü sanlombou ügütü! Haoeibü phem hoba haoeibü mae ae nyek thüka in kilabü, haoeneibü phem lemailela linan aplabü hoba haoeibü mae ae nyek khümbo thuan aplabü.”