Read Chang Naga ZEKHARIA 12 Bible Online

ZEKHARIA 12 - Chang Naga bible

ZEKHARIA 12

¹Israelbü shanga BUNYUBOUeibü ngüh onat, ho tegü BUNYUBOU aoei sengan phoda, hoba kaodak nyonglepan phoda hoba müt pendou la hao jembü soushou yeitida, haoei lauda,

²“Chühashi, kaijembo kibü phang pendou to ngei Jerusalem jaakbü thung che yeitilabü hoba Jihuda thükakei Jerusalem khulimbo komlepbü to kho khei kilabü.

³Hobaje kho chaloua müt pendou shanga ngei Jerusalem laang atsheibü yeitilabu, aoyouei kho tonenla haujemlaje haoen lolo kaang leilulabü hoba phang pendou kho khulimbo kamshailabü.

⁴BUNYUBOUei lauda: Kho chaloua koli weko to phenyembüei hoba hao to setbou to dalabüei sühtilabü, hoba ngei Jihuda phang shuong koli phobü weko nyek thutilabü.

⁵Hobaje Jihuda lajamleibou danei haoeneibü maangpona laulabü, ‘Jerusalem kabü mütshuong hau kia, aieilausi Thükenbou BUNYUBOU kho haoeneibü Mühghaü ki.’

⁶“Kho chaloua Jihudabü lajamleibü shuong yama wan che phatko hoba youthep yoa wanthung che phatko ngei yeitilabü hoba haoeneibü müt pendoueibü ik maeei hoba nanaeei suian aplabü, khei yingasikei Jerusalem je jembü kishanga, khei Jerusalema ong kilabü.

⁷“Hobaje Dawid chemdang soneikangbüa kibü shuong Jihuda thüka yongko ayaangenla shanga BUNYUBOUei tokei shaangla Jihuda neichem shuong khümenlabü.

⁸Kho chaloua BUNYUBOUei Jerusalema kibü shuong khümenan pholabü hoba kho chaloua ao phaiyetlaje Dawid phatko kilabü hoba Dawid chemdang kho haoen thedanga BUNYUBOU khuthük hangangbü phatko kilabü.

⁹Hobaje kho chaloua Jerusalem khulimbo loubü phang pendou ngei mautila lamlabü.

¹⁰“Hobaje Dawid chemdang thükto hoba Jerusalema kibü thükto üeisanou hoba welaubü soushou khüpan jinkulabü; hibü ladang haoenei sepbü khüto chühlaje haoenei jayangshou che ong kibü shanga mang haapbü tegü hao shanga mang haaplabü; hoba shoubuk khangbü aeibou khonkubü phatko, hao shanga aeibou khon kulabü.

¹¹Kho chaloua Jerusalema Megiddon pholia Haddrimmoni mang haapbü tegü mang haapbü yaang kilabü.

¹²Hobaje lepbü sangmang wekoei lulu lolo hoba Dawid chemdang chempen shuongei denche hoba haoeneibü yaksi shuongei denche, Nathan chemdangei denche hoba haoeneibü yaksi shuongei denche,

¹³Levi chemdangei denche, hoba haoeneibü yaksi shuongei denche, Shimait chempen shuongei den- che, hoba haoeneibü yaksi shuongei denche,

¹⁴hoba jouan kibü chempen pendouei chempen wekoei lulu lolo hoba haoeneibü yaksi shuongei denche, kaonyek mang haapbei.”