Read Chang Naga ZEKHARIA 13 Bible Online

ZEKHARIA 13 - Chang Naga bible

ZEKHARIA 13

¹Thükenbou BUNYUBOUei lauda, “Kho chaloua Dawid chemdang shanga hoba Jerusalema kibü shuong shanga deikük che shabü shanga hoba asaopobü sakla shanga ipan kilabü.

²Hobaje kho chaloua ho haüthüklabü dogo BUNYUBOUei lauda, khei heangsho shuong nyen kaonyek ka wapan aplabü hoba haoen touje adamenlabü hoba tokei ngei thuseibü shuong hoba ihinseibü soushou shuong kaonyek ka satan aptilabü.

³Hobaje tokei müt atei thusei ngüh laualonga kheijinei haoeibü bukbü nyusibouei hao to laulabü, ‘No lang akilabü, aishanga BUNYUBOU nyena nyi amlang lauda’; hoba haoeibü bukbü nyusibouei haoei tetenko laujinei hao hanettilabü.

⁴Hobaje kho chaloua thuseibü wekoei haoei tetenbü ngüh laujinei jembü mangsang shanga himouko kilabü, ayingsi mütshuong khü- pettila haoen winei aneilabü.

⁵Lausikei haoei laulabü, ‘Ngo thuseibü aying, ngo sekmoubü ki, aishanga ngo nashoudang ka thama sekmoubü la yeian ki.’

⁶Lausikei müt atei hao to, ‘Kaibü khüklanga ai mou lekei?’ dogo laualonga, kheijinei haoei jong- ailabü, ‘Kho kü thangbou chema kü la aktikei.’ ”

⁷“O inlou, ngeibü sanlombou, ao ngeibü maangjambou ki, hao khulimbo pienashi, dogo BUNYUBOUei lauda. Sanlombou haitiashi, hoba sanshuong linlabü; hoba hanbü shuong thükto ngei ngeibü ik sepeilabü.

⁸Hobaje ho hai haüthüklabü dogo BUNYUBOUei lauda, kaonyek pendoua khünei phejan penyi wapan aplabü hoba hailabü.

⁹Hobaje phejan semboubü wan danko sungbalabü, hoba chandinam saüenbü tegü haoen saüenkulabü, hoba hon takteibü tegü haoen takteilabü; haoenei ngeibü nyena ngalabü hoba ngei haoen to ditkulabü. ‘Ngei laulabü, ho ngeibü mütli shuong ki,’ hoba haoenei laulabü, ‘BUNYUBOU ngeibü Mühghaü ki.’”