Read Chang Naga ZEKHARIA 14 Bible Online

ZEKHARIA 14 - Chang Naga bible

ZEKHARIA 14

¹Chühashi, kan yoa soletbü peisilei shuong janlabü, BUNYUBOUeibü chalou che louada.

²Aishanga lason wapyola ngei phang pendou Jerusalem khulimbo leishailabü, hoba sangnyu kho lelabü, hoba haoeneibü chem shuong netla yeiko leilutikulabü hoba yaksa shuong shoeinakeilabü hoba sangnyu jamde laplanglabü hoba jouan kibü mütshuongje sangnyu ka wapan üplabü.

³Kheijinei BUNYUBOUei wapyo chaloua wapyojinei tegütham hao thedang aeto haulabü, hoba khübü phang khulimbo wapyolabü.

⁴Hobaje chaangbou aenei Jerusalem thedanga kibü Oliv shongh thüka kho chaloua haoeibü youei lolabü, hoba oliv shongh kho chaangbou ka chanep sühko pholi aeibou yaangbü cheei penyi la yeiko janyinlabü hoba shongh jamde yungkük ae hoba jamde yungthang aeto kuklabü.

⁵Hobaje Hinom pholi kho thangetan aplabü, aieilausi Hinom pholiei Azel sühlabü, haü, Jihudabü Choba Uzzia chaloua selo nyibü thedangto kan satbü tegü kan satlabü, hoba BUNYUBOU ngeibü Mühghaü hoba saopobü shuong pendou hao yoa loulabü.

⁶Hobaje kho chaloua khambü ayingsi shakbü akilabü,

⁷ayingsi nakthüh ai akilabü. Khünei ponpendou, khei metuphanga mangkei ngesakbü kilabü. Ladang ho loushedla BUNYUBOUei ong ngekei.

⁸Hobaje kho chaloua langkeibü dei shuong Jerusalem ka paklabü, haoen jamde chaangbou aeto yungnyu aeto hoba haoen jamde chanep yungnyu aeto hoba kho poang sulanga athakko kilabü.

⁹Hobaje kaodak pendou thüka BUNYUBOU Choba yinglabü, kho chaloua BUNYUBOU che hoba haoeibü nyen che yinglabü.

¹⁰Geba ka Jerusalem yungthang ae Rimmon sühko, kaonyek pendou Araba tegü yeilabü hoba hao tonenlabü, hoba hao kishang bakhün ka shaangbou bakhün kishang sühko kaonyek bakhün sühko hoba Hananel laangbob ka Chobaeibü semlüh nitshang sühko hao kilabü.

¹¹Hobaje khünei müt kilabü, hoba touje khükbü uokbü akilabü akilabü, lausikei Jerusalem khümenan kilabü.

¹²Hobaje BUNYUBOUei aei shieikoeei Jerusalem khulimbo wapyoei mütshuong to ngümlabü, kho ho lim kilabü. Haoen jembü youei loan kian haoeneibü phe nyaületlabü, hoba haoeneibü lishang haoeneibü sembunga nyaületlabü, hoba haoeneibü nyek haoeneibü nyekkhop phanga nyaületlabü.

¹³Hobaje kho chaloua BUNYUBOU ka oyolemen yaang haoen yoa kilabü, hoba haoen mütpem wekoei jembü lepboueibü ika hatleplabü hoba haoeibü ik jembü lepboueibü ik limbo toklabü.

¹⁴Hobaje Jihudaei Jerusalem khulimbo wapyolabü; hoba kaijembo kibü phang pendoueibü nyaksinam, hon hoba chandinam hoba neisimei juong liko yoshailabü.

¹⁵Hobaje kho tegü kho shieinangei phatko shieinangeiko koli, gadu hoba kishanga meisiau ai ong kilaje pendou thüka kilabü.

¹⁶Hobaje phang pendou jouan kibü mütpem weko aoyouei Jerusalem khulimbo loukei, po weko Thükenbou BUNYUBOU Choba lemla hoba lemshang neichem lem lila anglabü.

¹⁷Hobaje ho tegü kilabü, kaodak mütli dan aoyouei Thükenbou BUNYUBOU Choba lemla Jerusalem to üangda haoen thükto lang aloulabü.

¹⁸Hobaje Ijepbü shuongei angan haoen lolo ayolonga haoen thüktokei BUNYUBOUei lemshang neichem lem lila aloubü shuong shieinangeibü khoei shieinangeilabü.

¹⁹Ho Ijepbü shieinangei hoba lemshang neichem lem kila üangbü phang pendou shieinangei kilabü.

²⁰Kho chaloua koli shuongeibü nüngnünga BUNYUBOU TO SAOPOBÜ dogo doan kilabü, hoba BUNYUBOUeibü chema chak shuong kho lemshanga phauyaang shuong tegübü kilabü.

²¹Jerusalema hoba Jihudaa chak weko Thükenbou BUNYUBOU thedanga saopobü kilabü. Hobaje haitian lembü kulabü dan pendou loulabü hoba khübü ka sunglabü hoba khonei lembüsabü phe thunglabü. Hobaje khünyet Thükenbou BUNYUBOUeibü chema namyak namseibou akilabü.