Read Chang Naga ZEKHARIA 4 Bible Online

ZEKHARIA 4 - Chang Naga bible

ZEKHARIA 4

¹Hobaje kü to joyobou khuthük hangangbü kü jungto nyibou loukei, hoba müt che ngakbü ka pitibü müt tegütham ngo pitikei.

²Hobaje haoei kü to laukei, “Nyi ai hapda?” Hobaje ngei laukei, “Ngei honeibü wanthung denshang che, honthung nyet ngei hapda; hoba chühashi, wanthung weko ihshep che che kia, kho khübüeibü khua lonan kia.

³Hobaje kho nyangko oliv bulong penyi che phaueibü mae aenei hoba che khoeibü nanaenei.”

⁴Hobaje kü to joyobü khuthük hangangbü to ngei jongaikei hoba joyoko laukei, “Habü ho ai yingkei, Yaangbou?”

⁵Kheijinei kü to joyobü khuthük hangangbüei jongaikei, “Habü ho ai yingkeije nyi angekei lo?” Hobaje ngei laukei, “Angekei, Yaangbou.”

⁶Kheijinei haoei kü to laukei, Zerubabel jungto BUNYUBOUeibü ngüh ho ki: “‘Hauei aying, ayingsi seiei aying, lausikei ngeibü Soushouei,’ dogo Thükenbou BUNYUBOUei lauda.

⁷No ao, O shongh yaangbü? Zerubabel thedanga no yomang che yeilabü hoba khüto, Onoushi, onoushi!, dogo ngekbüei tangkabü laang shuong kho haoei sunglanglabü.”

⁸Tokei BUNYUBOUeibü ngüh ho hai lauko kü jungto loukei:

⁹“Zerubabeleibü ikei ho chem chemshang huonglabü tokei haoeibü ikei ho yeilabü; hoba Thükenbou BUNYUBOUei ngo ka jungto hautikei dogo nyi ngelabü.

¹⁰Aishanga aoei kümsilei hanbü shanga chalou aweasüngda, haoen olinlabü, hoba Zerubabeleibü ika thangtet takbü peisilei haplabü, khei khübü nyet kho BUNYUBOUeibü nyekshuong ki; kaodak pendou paithetko haoen hau longei dogo paida.”

¹¹Kheijinei ngei jongaikei hoba hao to laukei, “Wanthung mae hoba nanaenei oliv bulong shuong kho ai?”

¹²Hobaje nyiboubü ngei jongaikei hoba laukei, “Oliv bu- hek penyi laobou honeibü ihshep penyiei hon onang haoen lolo yeian jinda khübü kho ai yingla?”

¹³Hobaje haoei kü to jongaiko laukei, “Habü ho ai yinglaje nyi angekei lo?” Hobaje ngei laukei, “Angekei, Yaangbou.”

¹⁴Kheijinei haoei laukei, “Kaodak pendoueibü BUNYUBOU nyangko loan onang naangkubou penyi habü ki.”