Read Chang Naga ZEKHARIA 5 Bible Online

ZEKHARIA 5 - Chang Naga bible

ZEKHARIA 5

¹Tokei ngei thükae chühan angtikei hoba chühashi, seengeibü phekhon tulai che hapbei.

²Hobaje haoei kü to laukei, “Nyi ai hapda?” Hobaje ngei jongaikei, “Ngei seengeiko kibü tulai che hapda; khoeibü süng kho iknop an.”

³Kheijinei haoei kü to laukei, “Ho kaonyek pendou thedangto haubü saüsimaü shuong ki; aieilausi aoei kokda hao khüka wapan aplabü hoba aoei thedalanda hao khüka wapan aplabü.

⁴Ngei ho hautilabü dogo Thükenbou BUNYUBOUei lauda, hoba kokbü chem hoba ngeibü nyena amlangbüa theyolanyobü chem weko to atlabü hoba kho haoeibü chema kilabü, hoba busilaang yoan mautilabü.”

⁵Kheijinei kü to joyobü khuthük hangangbüei kü to laukei, “Tou kaibü nyekei chühan angtiashi hoba thedang aeto haubü kho ai yingkeije chühashi.”

⁶Hobaje ngei laukei, “Ho ai?” Hobaje haoei laukei, “Ho thedang aeto haubü seret haubü efa ki.” Haoei tokei laukei, “Kaonyek pendoua ho shedshonbü ki.”

⁷Hobaje chühashi, khünei nam- phet nam tongtongbü che tonenkei hoba kam khünei yaksa che setan kikei.

⁸Hobaje haoei laukei, “Ho kümsilei amaibü hoba haoei sao kho kam khüto phaika jangan jinkei hoba atsheibü khoei saoeibü sembung sühko küplepbei.

⁹Kheijinei ngei thükae to chühan angtikei, hoba chühashi, khünei yaksa müt nyi thedang aeto loukei hoba haoeneibü kaaka yei kikei, hoba kaodak si müh kanglanga haoenei seret haubü kam kho tonenkei.”

¹⁰Kheijinei kü to joyobü khuthük hangangbü to ngei laukei, “Seret haubü kam kho haoenei lae aeto jungan hauda?”

¹¹Hobaje haoei kü to laukei, “Shonar kaodaka sao shanga chem che dangkula shanga hoba ladang kho yeilaje jembü kishanga sao phoyolabü.”