Read Chang Naga ZEKHARIA 6 Bible Online

ZEKHARIA 6 - Chang Naga bible

ZEKHARIA 6

¹Nyibou ngei müh aeto chüh- angtikei hoba chühashi, khünei shongh penyi kanglang ka kailong lei longkei; hoba shongh shuong kho chisak nam shongh kikei.

²Shaangbou kailong koli saklangbü shuong hoba nyiboubüa koli nakhübü shuong kikei.

³Hobaje semboubü kailonga koli thupaibü, hoba leiboubü kailonga kapnakbü shuong kikei.

⁴Kheijinei kü to joyobü khuthük hangangbü to ngei laukei, “Habü ho ai ai ngeibü BUNYUBOU?”

⁵Hobaje khuthük hangangbüei kü to jongaiko laukei, “Habü ho mühkabü yei lei ki, hoba kaodak pendoueibü BUNYUBOU thedanga haoen lolo lenan phaia satda.”

⁶Kailong laoboua kopli nakhübü ki yungkük kaodak aeto hauda; hoba haoen phaito thu- paibü hauda, hoba kapnakbü shuong yungthang kaodak aeto hauda.

⁷Hobaje ladang hau kibü koli shuong haukei, hoba haoenei kaodak shoongko hau longei dogo paila lambei, hoba haoei laukei, “Kan hauan kaodak shoongko hau longei dogo paiashi.” Hibü haoen kaodak shoongko hau longei dogo paikei.

⁸Kheijinei haoei kü to ngekkei, hoba kho khei kü to laukei, “Chühashi, yungkük kaodaka BUNYUBOUeibü soushoua hakso kulabü.”

⁹Hobaje BUNYUBOUeibü ngüh kü jungto ho hai lenko loukei,

¹⁰“Langsenbü shuong ka, Babilon ka louan kibü Heldai, Tobija hoba Jedaia ka lembü sungashi, hoba kho chalouatham no kai, hoba Zefaniaeibü shou Josiaeibü chem to atashi.

¹¹Hobaje chandinam si hon sungashi hoba Chobaeibü khun che kümashi, hoba kho thükkabou ungshedbou Jehozadakeibü shou Joshuaeibü khua hankushi.

¹²Hobaje hao to lenshi, ho tegü Thükenbou BUNYUBOUei lauda: Chühashi, müt cheeibü nyenei bhek; hoba hao jembü kishanga ka yemlabü hoba haoeibü BUNYUBOUeibü lembü- chem danglabü.

¹³Khei haoei BUNYUBOUeibü lembüchem kho danglabü, hoba haoei nyenhang kuan haoeibü Choba setshanga setan song daklabü, kho tegü ungshedbou Joshua haoeibü Choba setshanga kilabü hoba haoen ham kanglanga hakso songsido maibü kilabü.

¹⁴Hobaje BUNYUBOUeibü chema damenlabü shanga Chobaeibü khun shuong kho Helem shanga hoba Tobia shanga hoba Jedaia shanga hoba Zefaniaeibü shou Josia shanga kilabü.”

¹⁵Tokei kanei ngo Thükenbou BUNYUBOUei ngo kan jungto hautikei dogo ngela shanga aoyou saabüa ki haoen loulabü hoba BUNYUBOUeibü lembüchem dangetlabü. Hobaje kanei BUNYUBOU kaneibü Mühghaü ngüh sonanepbo ditalonga ho haüthükko loulabü.