Read Chang Naga ZEKHARIA 7 Bible Online

ZEKHARIA 7 - Chang Naga bible

ZEKHARIA 7

¹Dairas Choba po leiboubü lit gü boubü chalou leibounyet Kislev lita BUNYUBOUeibü ngüh Zekharia jungto loukei.

²Tou haoen Bethela kibüei Sherezer hoba Regemelek hoba haoen mütshuong BUNYUBOU jungto sangle sulajala hautikei,

³hoba Thükenbou BUNYUBOUeibü chemdang ungshedbou shuongto hoba thuseibü shuong to hai laulabü, “Tou ngei po juong kümbo loubü tegü ngo lit ngaoboubüa haaplabü hoba mühei nyenglep lo?”

⁴Kheijinei Thükenbou BUNYUBOUeibü ngüh kü jungto ho hai loukei;

⁵“Kaonyeka mütli pendou to hoba ungshedbou pendou to ho hai joyoashi: Danbü po anjinlei sühkoa lit ngaoboubü hoba nyetboubüa ladang kanei mühei nyengkei hoba mang haapbei kho kü shanga kanei kaangkhühtham mühei nyengkei sai?

⁶Hobaje kanei ladang shaula yunglaje kanei lulu lolo shauda yungda ayinglo?”

⁷Ladang Jerusalema müt kikei hoba naangmaiko kikei hoba sao kaijembo sangnyu shuong yungthang ae hoba pholi kaoa müt kikei, hoba shangiedbü thuseibüei BUNYUBOUeibü ngüh ngekbü kanei adit lo?

⁸Hobaje BUNYUBOUeibü ngüh ho hai Zekharia jungto loukei.

⁹Ho tegü Thükenbou BUNYUBOUei lauda, “Ngühmai matjem kümashi, hoba mütpem wekoei jembü jaisina to üeisanou hoba onou lenashi.

¹⁰Latnyu ayingsi bou akibü, yenbou ayingsi shalebü khon tekuti hoba kan aoeikei jembü jaisina khulimbo kaneibü maangpona amaibü tedamei.

¹¹“Lausikei Haoenei ngüha ale, hoba üh dogo ngaikei hoba aditla shanga noua sakkei.

¹²Haü, haoenei ngühkhüm kho hoba Thükenbou BUNYUBOUei haoeibü soushouei shangied thuseibü shuong danko hautibü ngüh shuong ditakei dogo haoenei jembü maangpon laang tegü yeitikei. Hibü Thükenbou BUNYUBOU ka khauang maangpok yaang loukei.

¹³Ngei ngakei hoba haoenei ngüha alelabü dogo Thükenbou BUNYUBOUei laukei.

¹⁴Lausikei haoenei angebü phang pendou yoa ngei haoen yeiei shian lintilabü, khünei mütpem che ongkei adantilabü, ayingsi sepeinyu alongeiko haoen phaineije kaonyek kho sangliphang la yeikei, aishanga kaonyek maibü kho kaoshed yeitikei.”