Read Chang Naga ZEKHARIA 8 Bible Online

ZEKHARIA 8 - Chang Naga bible

ZEKHARIA 8

¹Hobaje Thükenbou BUNYUBOUeibü ngüh kü jungto ho hai loukei.

²Thükenbou BUNYUBOUei ho hai lauda, “Zion shanga maangdüh yaangei ngei maangdühda,

³BUNYUBOUei lauda, ngo Zion jungto sepeinyu longeiakei, hoba Jerusalema kilabü hoba Jerusalem to tükdebü sangnyu dogo laulabü, hoba Thükenbou BUNYUBOU shongh to saopobü sangnyu dogo ngalabü.

⁴Ho tegü BUNYUBOUei lauda, khünei baushi shuong hoba noushou shuong Jerusalem khongnyua kilabü mütpem weko jembü lolo ika jungan chalou juong kilabü.

⁵Hobaje sangnyu khongnyu shenko bousu shou si yaksa shousi shuong khünei louyoko kilabü.

⁶“Ho tegü Thükenbou BUNYUBOUei lauda, khübü chaloua ho mütli jouan kibü thedanga kho maangpanglabü yingalonga kho tokei kü thea maangpanglabü yinglep sai? dogo BUNYUBOUei lauda.

⁷Thükenbou BUNYUBOUei lauda: Chühashi, ngei kü mütli chanyu angbou kaodak ka hoba chanyu nepbü kaodakka püetlabü.

⁸Hobaje ngei haoen leian loulabü, hoba Jerusalema kilabü hoba haoen ngeibü mütli yinglabü, hoba ngühmaia hoba saopobüa ngo haoeneibü Mühghaü yinglabü.”

⁹Thükenbou BUNYUBOUei hai lauda, “Khei lembüchem dangenlabü shanga thuseibü shuong aoyou Thükenbou BUNYUBOUeibü chem huongbü chaloua kikei, haoeneibü sembung ka habü ngüh khübü chaloua ditbü shuong kaneibü ik hau kiashi.

¹⁰Aieilausi khübü chalou thedangto mütpem weko ayingsi meisiau shanga munam lebü akitei, ayingsi dangbou labou kibü haangjung hau longei dogo paila shanga hakso akitei, aieilausi ngei mütpem weko cheei che khulimbo phokukei.

¹¹Lausikei touje shangiedbü chalou shuong tegü joubü ho mütli shuongei ajungeilabü dogo Thükenbou BUNYUBOUei lauda.

¹²Aishanga haksobü hek kilabü, semlüh longei jembü hek kulabü hoba kaonyuei jembü ka longbü kulabü hoba mühshuongei haoeneibü nindei kulabü hoba joubü ho mütli la ngei habü pendou phet phantilabü.

¹³O Jihuda chemdang hoba Israel chemdang, phangshuong yoa kan shedsikhau baubü che la yeian kikei, hibü ngei kan khümenlabü hoba kan haülabü che yinglabü, tehüt lausikei kaneibü ik hau kiashi.”

¹⁴Aishanga Thükenbou BUNYUBOUei hai lauda, “Kaneibü pisibousi shuongei ngo khauangko maangto shattijinei ngei kan to amaibü kümla dambü tegü Thükenbou BUNYUBOUei lauda, ngo maangpon asepei.

¹⁵Lausikei tou nyibouaje ngei Jerusalem si Jihuda chemdang to maibü kümla daman kia, kan tehüt.

¹⁶Habü ho kanei kümlabü kümsilei ki, kan mütpem wekoei jembü lepbou to ngühmaia lenyoashi, matjemshanga tükdebü matjem ngüh jungeiashi.

¹⁷Hobaje kan aoeikei jembü lepbü sangmang khulimbo maangpona amaibü tedam hoba amlangbü nyen phongko teki, aishanga ngei mangsenbü khübü kümsilei pendou kia dogo Thükenbou BUNYUBOUei lauda.”

¹⁸Hobaje Thükenbou BUNYUBOUeibü ngüh kü jungto ho hai loukei.

¹⁹“Ho tegü Thükenbou BUNYUBOUei lauda, lit leiboubüa mühei nyengbü hoba lit ngaoboubüa nyengbü kho hoba lit nyetboubüa mühei nyengbü kho hoba lit anboubüa nyengbü kho Jihudabü mütli shanga olinbü hoba maanga mailabü hoba lemlembü lemsilang kilabü, hibü ngühmai hoba sangmai sanouashi.”

²⁰Hobaje ho tegü Thükenbou BUNYUBOUei lauda, “Tokei ho haüthükjung loulabü, khei phangshuong hoba sangle yaangbü shuonga kibü müt juong loulabü.

²¹Hobaje sangnyu chenei kibüei ho hai lauko lubü che to satlabü, ‘BUNYUBOUeibü onou sulajala hoba Thükenbou BUNYUBOU lamla sen panteiko haukho, ngokei haulabü.’

²²Haü, müt juongei hoba hau yaangbü phangshuongei Jerusalema Thükenbou BUNYUBOU lamlabü hoba BUNYUBOUeibü sangle sulajala loulabü.

²³Hai Thükenbou BUNYUBOUei lauda: Khübü chaloua kho khei haüthüklabü, phangshuong ngühyem pendou ka müt anei Jihudabü che to neia senetan laulabü, ‘Kün kan yoa haulabü aishanga Mühghaü kan yoa kia dogo künei dida.’ ”