Read Chang Naga ZEKHARIA 9 Bible Online

ZEKHARIA 9 - Chang Naga bible

ZEKHARIA 9

¹Tetenan kibü onat, BUNYUBOUeibü ngüh Hadrak kaodak khulimbo ki hoba kho Damaska to nonglabü, aishanga müteibü nyek hoba Israel phang pendou BUNYUBOU aenei kia.

²Tair hoba Sidon, haoen aeibou sangsidosikei, Hamath kei leilanga kibü yoa yoakei.

³Hobaje Tairei hao lolo lapheishon kümbei hoba thamngu hima chandinam thanshaikei hoba khongkabü thim hima hon tansheikei.

⁴Chüh- ashi, BUNYUBOUei hao alelabü hoba haoeneibü nyaksinam yungnyu to ngüman attikulabü, hoba hao wanei mautilabü.

⁵Ashkelon haaplabü hoba hatko kilabü, Gaza kei maang aeibou shaleko kilabü; tokei Ekron, aieilausi haoeibü maanglem himou yeitilabü hoba Gaza ka Choba maulabü, Ashkelona müt akilabü.

⁶Hobaje Ashdoda khei- yobü phang che kilabú, hoba ngei Filistiabü yonglam lilibü wapan aplabü.

⁷Hobaje ngei haoeibü sembung ka haoeibü sii hoba haoeibü hau kanglang ka mangsenlabü sunglanglabü; hoba tokei hao seneibü Mühghaü shanga jouletbü yinglabü hoba Jihuda hao lajamleibou hoba Ekron Jebusbü tegü yeilabü.

⁸Hobaje aokei hauko longeiko dogo apailabü shanga ngeibü chem nyangko ngei lombou tegü setshang kümlabü; hoba touje shieinangeibü aoeikei haoen danko apailabü; aishanga touje ngei ngeibü nyekei hapa.

⁹O Zion nouyangshou, aeibou olinko kishi; O Jerusalem nouyangshou shuong ngekashi, chühashi, Kaibü Choba ka jungto louada. hao ngühmaang lanbü hoba khümenbü ki. Eaaoa khei gadu shoushou thüka setan ka jungto louada.

¹⁰Hobaje Efraim ka ngei kailong wapan aplabü; hoba Jerusalem ka koli, hoba lason lau wapan aplabü; hoba phangshuong to haoei hakso ngühlang phinlabü. Hobaje haoeibü sangle yungnyu ka yungnyu sühko hoba shumang ka kaodak thonbü sühko kilabü.

¹¹Tokei ka shanga no kaibü theyolanyobü lembüsabü sii shanga kaibü langsenbü shuong dei adangbü püngkhün ka litilabü.

¹²Kan maanglem kibü langsenbü shuong lapheishon lambo sepeiashi, tattham ngei kan la phejan kungaila ngetilabü.

¹³Aishanga ngei Jihuda lau tegü büha, hoba Efraimei laujinei shentia, O Zion, kaibü shousi shuong khulimbo meimeitilabü, O Grikbü; no sekbülakbü in tegü yeitilabü.

¹⁴Hobaje haoen thüka BUNYUBOU haplabü, hoba haoeibü laujin langpon tegü haulabü; hoba BUNYUBOUei teklaang metlabü hoba yungthang aekabü Mühghaüeibü yei yoa haulabü.

¹⁵Thükenbou BUNYUBOUei hao khümenlabü, hoba haoenei suilabü; hoba laangwenjina litibü laanga nakeilabü, hoba haoenei ih tegü yunglabü hoba phauyaang tegü shenko kilabü, lemshang to yeian jinbü tegü kilabü.

¹⁶Hobaje BUNYUBOU haoeneibü Mühghaüei kho chaloua jembü mütli sanshuong tegü haoen khümenlabü, aieilausi Chobaeibü khun namsek laang tegü haoeneibü kaonyeka soneikangko haoen kilabü.

¹⁷Aishanga hao maibü lai yaangkei hoba hemaibü lai yaangkei. Heshou shuong youshouei hoba medei shuong ih haanbüei hau kitilabü.