Read Chang Naga MALAKHI 1 Bible Online

MALAKHI 1 - Chang Naga bible

MALAKHI 1

¹BUNYUBOUeibü ngüh Malakhi danko Israelbü la onat lentibü.

²“Ngei kan to sanoukei” dogo BUNYUBOUei lauda, khei yingsikei haoenei lauda, “Ainei ong nyi kün to sanoukei?” BUNYUBOUei jongaida, Esau si Jakob jaisinanyi, lausikei ngei Jakob si haoeibü thensilen to sanoukei,

³hoba Esau si haoeibü thensilen to mangsenkei. Hobaje haoeibü shongh shuong sangli- phang la yeitikei, hoba haoeibü phet yama selong shuong la phokukei.

⁴Esaueibü thensilen Edomei, “Kün tuongakei, lausikei künei leilubü kho nyibou kümetlabü,” dogo laua tegükei, Thükenbou BUNYUBOUei hai lauda, “Haoenei kümetlabü lausikei ngei tuongtilabü, hoba mütshuongei haoen to, Shedbükhaubü Kao, hoba haoen khulimbo BUNYUBOU khauang longbü ponpen kibü mütshuong dogo ngalabü.”

⁵Hobaje kaneibü nyek shuongei haplabü, hoba kanei Israel leilang danko hauan kibü shuongei “BUNYUBOU yangenashi” dogo laulabü.

⁶“Shouei haoeibü bou hoba sambüei BUNYUBOU hangenda, ngo bou che yinga longa, ngeibü nyenhang lanei ki? Hobaje ngo bunyu che yingalonga kü to souhatbü lanei ki? dogo Thükenbou BUNYUBOUei kan to lauda, O ngeibü nyen shatibü ungshedbou shuong, hoba kanei lauda, ‘Ainei künei ka nyen shatikei?’

⁷Kanei ngeibü lemshanga shabü wentek lemda. Hobaje kanei lauda, ‘Ainei künei no shatikei?’ Khünei kanei lauda, BUNYUBOUeibü khümsok nakleplabü ki.

⁸Ladang kanei haitibü lembüsabü shanga nyekthubü meisiau lemlaje kho amaibü aying lo? hoba ladang kanei sokebü hoba shatbüei lemlaje, kho amaibü aying lo? Tou kho kaneibü governor la kuashi, khoei hao olinlep sai? ayingsi haoei no sungletlep sai?” dogo Thükenbou BUNYUBOUei lauda.

⁹Hobaje tou, ngei kan to sudajada, Mühghaüei sen to onouko kienlabü lole shanga haoeibü sangle lenla suajaashi, ho kaneibü ika ki, haoei kan to onouko kilep lo? dogo Thükenbou BUNYUBOUei lauda.

¹⁰“O kanei ngeibü lemshanga amlanga wan asapla shanga kan yoa cheei koukap shuong kapa tegükei ngei kan to olinbü aki, ayingsi ngei kaneibü ik ka lembü asungletlabü,” dogo Thükenbou BUNYUBOUei lauda.

¹¹“Aishanga chaangbou ka chanep sühko küksithang yoa ngeibü nyen yaang kia, hoba pendou aenei ngeibü nyen shanga ponlem hilabü hoba hinseibü lembüsabü lemda; aishanga küksithang yoa kü nyen yaang kia,” dogo Thükenbou BUNYUBOUei lauda.

¹²“Lausikei kanei ngo shatida khünei kanei lauda, ‘BUNYUBOUeibü khümsok totnyinakei, hoba kho ka longbü buhek khei haoeibü shausiyung nyikulabü ki.’

¹³Tokei kanei lauda, ‘Ho ai olanonglabü che ki!’ hoba kanei kü to kung nyunglabü dogo Thükenbou BUNYUBOUei lauda, hoba kanei maangei thamtham sokebü hoba shatbü sungbakei, kho tegü kanei lembü jungda, ngei kho kaneibü ik ka sungletlep lo?” dogo BUNYUBOUei lauda.

¹⁴“Khüpettibou aoei haoeibü sanlon yoka paang che phoan ki, hoba haoei kho theletnyu phoda, lausikei haitila kapnakbü che BUNYUBOU la haitian lemda, hao shedsikhau yingshi; aieilausi ngo Choba yaangbü che ki hoba küksithang yoa ngeibü nyen kho hatlamoklabü che ki” dogo Thükenbou BUNYUBOUei lauda.