Read Chang Naga MALAKHI 2 Bible Online

MALAKHI 2 - Chang Naga bible

MALAKHI 2

¹“Hobaje tou, O kan ungshedbou shuong, ho sakkubü kan shanga ki.

²Kanei ngeibü nyena soneikangbü kula kanei teditkho laualonga hoba kanei maangpona thanan tephokho laualonga kheijinei kan jungto shedsikhau hautikulabü, hoba ngei kaneibü haülabü to khükla uoklabü, haü, ngei haoen la shedsikhau kua, aishanga kho kanei maangpona thanan apho”, dogo Thükenbou BUNYUBOUei lauda.

³“Ditashi kan shanga ngei youyik to haklabü hoba kaneibü thenyeka meisiaueibü set, khei kanei lembüa set phinan jinkulabü hoba kan kho to leian haulabü.

⁴Hobaje ngeibü theyolanyobü Levi yoa kia, kho sakkubü ngei kan jungto hautiakei dogo kanei ngela shanga,” dogo Thükenbou BUNYUBOUei lauda.

⁵“Ngeibü theyolanyobü hao yoa langkei hoba sangmai haksoa kikei, haoei souhat kula shanga khübü kho ngei hao la kukei, haoei kü to soumo hatkei, hoba ngeibü nyen shanga souhatko lokei.

⁶Maimaitham ngühkhüm haoeibü sembunga kikei, hoba haoeibü sembung khopa asaopobü akitei, haoei sepeitikei.

⁷Aishanga ungshedboueibü sembung khopa hapbü ngebü songsido phoan kijan, hoba haoeibü sembunga haoenei ngühkhüm jungeijan, aishanga hao Thükenbou BUNYUBOUeibü ngühkhüm jungbou ki.

⁸“Lausikei kan lamnyu ka sepeinyu ngaian kia, kaneibü ngühkhüma müt juong phaiyettia kanei Levi theyolanyobü leilutikua”, dogo Thükkenbou BUNYUBOUei lauda.

⁹“Khei yingsije ngeikei kanei ngeibü kümsilei shuong ajungeibü thüng hoba kü mütli to maangthük maangphang kümbo lenbü shanga, Israel mütli kan khulimbo yeitilabü.”

¹⁰Sen pendou bou che ong ki ayinglo? Mühghaü cheei ong sen kümbei aying lo? Aila sen mütpem wekoei jembü jaisina khulimbo lepbolangko hoba pisibousi shuongeibü thebülanbü shatiko jungeida?

¹¹Jihudaei lepbolangko jungeiakei, hoba Israela hoba Jerusalema mangsenlabü jungeiakei aishanga Jihudaei BUNYUBOUei sanoubü lemshang shatikei, hoba mütshuongei küksithangeibü mühghaü lembü nou- yangshou shuong yakla leakei.

¹²Jakobeibü neichem ka ho hai kümbü müt, ao pida hoba aoei jongaida, hoba aoei Thükenbou BUNYUBOU la lembü kuda, BUNYUBOUei wapan aplabü.

¹³Hobaje ho kanei nyibou kümashi, haapbü hoba wibüei shentiashi, aieilausi touje lemshang aikei achühda, ayingsi kaneibü ik ka aikei olinko asungletda.

¹⁴Khei yingsikei kanei lauda, “Ai yingbü ka?” Aieilausi no hoba no heshouabü yak kanglanga BUNYUBOU aukabü yingla sao kaibü maangjam hoba kaibü thebülanbü yak yingasikei nyi sao khulimbo lepbolangko jungeikei.

¹⁵BUNYUBOUei haoeibü yingla haoen phe hoba soushou che yeila kümbei aying si? Mühghaü to soumohatbü youyik Mühghaü shousi yeitila shanga. Hibü kan kaneibü soushou shanga maangsangashi, hoba aoeikei haoeibü heshouabü yak khulimbo lepbolangko tejungeiti.

¹⁶Aishanga aoei maang asangda hoba bangda, Israel Mühghaü BUNYUBOUei lauda, jembü neisimei maangei thamtham küplepda dogo BUNYUBOUei lauda, hibü kanei lepbolangko ajungeiko kaneibü soushou langkei shanga maangsangashi.

¹⁷Kaneibü ngühshuongei BUNYUBOU hütia, khei yingankei kanei lauda, “Ainei künei hao hütikei?” Khünei kanei lauda, “Amaibü kümbü mütpem weko maibü ki, hoba haoei haoen to olinda.” Ayingsi “Ngühmai Mühghaü lanei ki?” dogo kanei pheda.