Read Chang Naga MALAKHI 3 Bible Online

MALAKHI 3 - Chang Naga bible

MALAKHI 3

¹“Chühashi ngei ngeibü hangangbü hautida hoba haoei kü thea lamnyu lamlekulabü hoba BUNYUBOU ao kanei lamda mangde haoeibü lembü chem to loulabü hoba thebülanbü youkobou ao to kanei olinda, chühashi, hao louada” dogo Thükenbou BUNYUBOUei lauda.

²Lausikei aoei hao loubü chalou sühko natenko kila hoba hao loujinei ao loenla? Aishanga hao hinseiko saüenbü wan tegü hoba nei sakbü sapon moli tegü kilabü.

³Hobaje chandinam saüenbü hoba hinseitibou tegü hao setlabü hoba Levi shousi shuong saüenlabü. Haoei haoen hon si chandinam tegü hinseitilabü hibü BUNYUBOU shanga haoen saopobüa lemla jungan loubü mütshuong yeilabü.

⁴Kheijinei piaboua hoba miet shangied tegü Jihuda si Jerusalembüeibü lembü kubü kho BUNYUBOU to olinlabü kilabü.

⁵“Kheijinei ngo kan jungto matjemla shanga nyangko loulabü, hoba seibütakbü shuong, hoba asangalanbü shuong khulimbo hoba aoyouei amlanga theyolan- yoda hoba aoyouei chalou eiknam lambü shuong haoeneibü munama khonkutida, latnyu hoba aaomüt aoyouei küksithang yenbou to khüpbolangko jungeida, hoba kü to ühütda haoen khulimbo ngei panteiko aukabü kulabü, dogo Thükenbou BUNYUBOUei lauda.

⁶“Ngo BUNYUBOU ajakshaida; hibü kan, O Jakob shousi shuong, amautiko kia.

⁷Kaneibü pisibou chalou ka kanei ngeibü ngühkhüm deikhüm khulimbo meimeikei hoba khübü kho ajungei, ngo kan jungto sepeila shanga kü jungto sepeiashi dogo Thükenbou BUNYUBOUei lauda. Lausikei kanei lauda, ‘Künei lai sepeila?’

⁸Mütei Mühghaü soshau soyunglep lo? Khei yingsikei kanei ngo soshau soyungda. Lausikei kanei lauda, ‘Künei no ailai soshau soyungda?’ An phejan hoba lembü yoshaibüa!

⁹Shedsikhau cheei khükauoka, aishanga kan phang pendouei ngo soshau soyungda.

¹⁰Ngeibü lembüchema shausiyung kilabü lele an phejan pendou thanshang to sungba hoba ngei kan shanga khuthük koulom ipbuan haülabü sopbo akou shongko jonan koutikuasaoje ngo takteiashi, dogo Thükenbou BUNYUBOUei lauda.

¹¹Kheijinei ngei kaneibü langle künkubou to haklabü hibü kan shanga khoei kao ka longbü amautikulabü hoba seka semlüh longei kan shanga semlüh hek hekkulabü dogo Thükenbou BUNYUBOUei lauda.

¹²Hobaje phang pendouei kan to haübou dogo ngalabü aishanga kan olinlabü kaodak yinglabü dogo Thükenbou BUNYUBOUei lauda.

¹³“Ngo khulimbo kanei ngüh yaang laukei,” dogo BUNYUBOUei lauda, “No khulimbo künei ailai laukei?”

¹⁴Kanei lauda, “Mühghaü khangenla kümsilei aki; hoba haoei sakkubü jungeila hoba Thükenbou BUNYUBOU thedanga haapbo pailabü ho ai ku ki?

¹⁵Hibü yonglam lilibü thu maia dogo senei weeida, maimaitham amaibü kümbü shuong haako yaangko kidakeida, hoba tokei haoenei Mühghaü takteida hoba satenda.”

¹⁶Aoyouei BUNYUBOU to soumo hatda, ho tegü cheei che to joyoda, BUNYUBOUei haoen to ngüha lekei hoba haoen to ditkukei hoba haoeibü nyen thedanga aoyouei BUNYUBOU to soumo hatda hoba haoeibü nyen daman chühda, haoen shanga damenlabü le che doan kikei.

¹⁷“Hibü ngei kümbü chaloua ngei ngeibü nyaksinam tegü haoen kü shangabü yinglabü, dogo Thükenbou BUNYUBOUei lauda, hoba khei müt aoei hao khangenbou jembü shou püet angetan phokuda kho tegü ngei haoen khümenan pholabü.

¹⁸Kheijinei saopobü hoba amaibou kanglanga aoei Mühghaü khangenda hoba aoei hao akhangenda kanglang kanei janthetlabü.”