Read Chang Naga MALAKHI 4 Bible Online

MALAKHI 4 - Chang Naga bible

MALAKHI 4

¹“Aishanga chühashi, wanhap tegü juokko chalou kho loulabü hoba yonglam lilibü pendou hoba amaibü kümbü weko youho la yeilabü, hoba loulabü chalouei khübü kho juokan aplabü, khei khoei khübü kho li yingsikei bhek yingsikei üpyolabü dogo Thükenbou BUNYUBOUei lauda.

²Lausikei kan ngeibü nyen to soumo hatbü shuong shanga saopobü chanyu haoeibü kaaka maitibü yoan jungan loulabü, hoba masu chem ka masu shoushou shuong tegü kan saiyeiko longlabü.

³Hobaje kanei amaibou thüka nakeilabü, aishanga ngei kümlabü chaloua kaneibü you phanga ngei haoen thamngu la yeitilabü dogo Thükenbou BUNYUBOUei lauda.

⁴“Ngo khangenbou Mosaeibü ngühkhüm laobou ngei hao la Horeba Israelbü pendou shanga sakkukei, khei ngühkhüm deikhüm hoba matjembü kho kanei damenashi.

⁵“Chühashi, BUNYUBOUeibü chalou yaangbü hoba hatlamoklabü kho aloujinei ngei kan jungto Elija hautilabü.

⁶Hobaje ngei louan kaonyek shedsikhauei sühtikusi amaibula bousi shuongeibü maangpon shousi shuongeibü maangpon la, hoba shousi shuongeibü maangpon bou shuongeibü maangpon la yeiko jeileikulabü.”