Read Chang Naga MATHI 11 Bible Online

MATHI 11 - Chang Naga bible

MATHI 11

¹Ladang Jisuei jembü eik Anthüknyi to sakkuko lenbü thonkei, kheijinei haoen sangnyu shuonga lenla hoba songlenla shanga haoei khüka banglangkei.

²Johanei thüngdanga kijinei Khrista shangabü kümsilei shuong ditkei. Hibü haoei hao eikshuong hautiko lentikei,

³“Loula kibou kho no sai, si künei lubü che shanga chüheila?”

⁴Jisuei haoen to jongaikei, “Kan ngaiashi hoba kanei ai ditda hoba hapda Johan la lenashi:

⁵nyekthubü shuongei hapda, sokebü shuong paida, imbü shuong saüenda, hoba obangbüei ditda, hoba haibü shuong langngaitida, hoba shalebü la Ngühlangmaibü songlenda;

⁶hoba aoei kü to phaiyetshang ai ühüplaje hao haübou.”

⁷Khübü mütshuong ngaitoua Jisuei noknyüh to Johan shangabü lenla khangkei, “Ai to chühla kan yam to koukei? Yeiei thakdu soueibü chühla si?

⁸Lausikei kan aito chühla haukei? Inyaibü neisimei lebü müt che to chühla sai? Aoyouei inyaibü neisimei leda haoen Choba chema ki.

⁹Lausikei kan ai chühla haukei? Thuseibü che sai? Haü, ngei kan to lenda, thuseibü che to khaibou.

¹⁰Laishibaei lenbü ho hao shangabü ki: ‘Chühashi, ngeibü ngühlang künbou, aoei ka thedanga ka lamnyu lamlelabü, hao ka thedangto ngei hautida.’

¹¹Ngühmaia ngei kan la lenda, yaksaei bukbü yoa Johan to yaangbou aki; lausikei Mühghaü Sanglea hanbou kho hao to yaangbou ki.

¹²Hobaje Johan Baptibou chalou ka tou sühko Khuthük Sangle soyoda, hoba sekbülakbü shuongei soletda.

¹³Aishanga Thuseibü shuong pendou hoba Ngühkhümei Johana sühko tetenkei;

¹⁴hoba kanei sungletla maangangko kisije, Johan ho loula kibou Elija ki.

¹⁵Ao nou yembei haoei ditashi.

¹⁶“Lausikei ai to ngei ho meten mütshuong takteila? Hoaen namyakshanga atei lubü shuong ngako

¹⁷hoba ‘Künei chia teibü lauko kan la pithung metkukei, hoba kanei atom! Künei manghaap chia laukei hoba kanei haapbo khuku to ajang!’ dogo lauko setbü nashousi shuong phatkei.

¹⁸Aishanga Johanei ashauko hoba ayungko loukei, hoba mütshuongei, ‘Hao to shabü soushou kia’ dogo lauda.

¹⁹Müteibü Shou shaukoyungko loukei, hoba haoenei ‘Chühashi, shaumüt yungmüt, ih yungbou, khüm hebü shuong si shabü shuongeibü thangbou’, dogo lauda. Lausikei songsihon kho saoeibü kümsilei loushedbüei aukabü kuenda.”

²⁰Kheijinei laobou sangnyu shuonga haoeibü kümsilei yaangbü juongbou kümbei, khübüei maangpon asepei, haoei haoen hakeiko laukei,

²¹“Khorazin, ka shanga ügütü! Bethsaida, ka shanga ügütü! Aishanga ka to kümbü seikümseilei shuong ho Sidon si Tair to kümbei laubü tegüje, haoen mütshuongei neikek sean haapbo khuto tap mokan jinko maangpon sepeian kikhoulabü.

²²Lausikei ngei kan to lenda, matjemnyet kan toje Tair si Sidon to natenla soshangbou yinglabü.

²³Hobaje no, Kapernaum, no khuthüka sühko tonenlep lo? No molowan sühko sungyanlabü. Aishanga laobou kümsilei yaang ka to kümbei ho Sodom to kümbei laubü tegüje, kho tat sühko kikhoulabü.

²⁴Lausikei ngei kan to lenda, matjemnyet katoje, Sodom kaodak thu natenla sobou yinglabü.”

²⁵Kheijinei Jisuei laukei, “Abou, khuthük hoba kaodak Bunyubou, ngei ka nyen sangda, aieilausi nyi habü ho songbüdobü hoba hapbüngebü thedang ka huan phokei, hoba nyi nasak shuong thedanga tang khittikei.

²⁶Haü, Abou, ngei ka nyen sangda, aieilausi kho ka maanghaibü kiteikei.

²⁷“Kübouei kü la pendou nongkua: hoba Bou to liman Shou aoeikei angekei; ayingsi Shou hoba aoyou to Shouei hao tang khitkula maangangda haoen to liman, Bou aoeikei angekei.

²⁸Kan hübümangbü hoba onat künbü shuong pendou kü jungto kaiya, hoba ngei kan la hakso kukho.

²⁹Kanei kü bulenga peashi, hoba kü ka ditletashi, aishanga ngo eaaoabü hoba sensimaang inyaishoule, hoba kanei kaneibü soushou shanga hakso haplabü;

³⁰aishanga kü buleng sosotham, hoba kü on songoktham.”