Read Chang Naga MATHI 13 Bible Online

MATHI 13 - Chang Naga bible

MATHI 13

¹Khünyet Jisu chem ka satkei hoba yungkoa setkei,

²hoba hao jungto noknyüh yaang takshatkei, hibü hao long che to atan setkei. Hobaje noknyüh pendou yungkoa lokei.

³Hobaje haoei haoen la ngühphatbüei ngüh juongnyu lenko laukei, “Youli saakbü che youli saakla koukei.

⁴Hobaje haoei saakjinei, youli at lamkoa shatkei, hoba aushuong louan kho shaukhümbei.

⁵Youli at kaomai juong akishang laangpünga shatkei, hoba kaomai shangko akisije kho enyu yembei.

⁶Ladang chanyu longkei khüto juokko haukei, hoba khüto li üatsije linan apbei.

⁷Lubü youli shuong jaklaaka shatkei; jaklong chingenkei hoba kho naülepbei.

⁸Lubü youli kaomaia shatkei hoba youkung weko saongao, saosem, ayingsi khujin onko youman hekkei.

⁹Aoto nou yembei haoei ditshi.”

¹⁰Hobaje hao eikshuongei Jisu jungto louan laukei, “Nyi aila haoen to ngühphatbüa lauda?”

¹¹Haoei jongaikei, “Kan laje Mühghaü Sangle huphang ngüh ngela kuakei, lausikei haoenlaje ho akukei.

¹²Aishanga aoei ki hao la aei kuyolabü, hoba haoei apsileko kilabü; lausikei aoei aki, haoei ai ki khokei hao ka ngailanglabü.

¹³Khoei ngei haoen to ngühphatbüa lauda, aieilausi haoenei chühkokei ashenda hoba ditkokei aditouda hoba aditenda.

¹⁴Hobaje Isaiaei laubü loushetda, ‘Kanei maimaitham ditlabü lausikei aditenlabü; kanei maimaitham haplabü lausikei achühenlabü;

¹⁵aishanga ho mütshuongeibü maangpon ngouan apa, hoba haoeneibü noukhen ditla shangan apa, hoba haoenei haoeneibü nyek muakei. Khei aying tegüje, haoenei haoeneibü nyekei haplabü, haoeneibü nouei ditlabü, haoeneibü maangponei ditenlabü hoba sepeilabü hoba ngei haoen maitikulabü.’

¹⁶Lausikei kan maimaitham olinbou, aieilausi kaneibü nyekei hapda, hoba kaneibü nouei ditda.

¹⁷Ngühmaia ngei kan to lenda, thuseibü juongnyu hoba saopobü müt juongei kanei hapbü ho hapmang sühkei, hoba haoenei ühüp, hoba kanei ditbü ho ditmang sühkei, hoba haoenei adit.”

¹⁸“Khülonga kanei youli saakbü ngühphatbü ditashi.

¹⁹Ladang mütei khuthük Sangle ngühlang ditda hoba kho aditenda, kheijinei amaibou louda, hoba haoeibü maangpona ai phinkei kho solangda. Hoei lamkoa saakbü ngühtet lenda.

²⁰Laangpünga saakbü youli tetlabü kho ngüh kho ditan kheijineitham olinko sungletda.

²¹Hao to li aki, lausikei longche shanga yemda, hoba ladang ngüh kho laüa khonsak ayingsi shieikoe loulaje kheijineitham hao atetda.

²²Hobaje aoei ngüh kho ditda hoba kaodak shangabü maangmau hoba nyekdüh maangdühei kho naülepda, hoba haoei mai ehekda, ho jaklaaka wenbü youli kho ki.

²³Hobaje aoei ngüh kho ditda, hoba ditenda, hao kho kaomaia saakbü youli ngühtet ki. Haoei youkung weko ka saongao, saosem ayingsi khujin onko youman hekda.”

²⁴Haoei haoen to tokei ngüh- phatbü che lenko laukei, “Khuthük Sangle müt cheei jembü seka youli maibü wenbü phatkei;

²⁵lausikei ladang müt pendou nyeket shikei, haoeibü dangbou loukei hoba youshou yoa yousangkei phinkuan satkei.

²⁶Ladang youli khitan yembei hoba youman hekkei, kheijinei yousangkei hekkei.

²⁷Hobaje bunyu sambü shuongei hao jungto louan laukei, ‘Yaangbou, nyi ka seka youli maibü awen si? Khei yingsije yousang ho lakabü?’

²⁸Hobaje haoei haoen to laukei, ‘Dangbou cheei ho kümbei.’ Kheijinei sambü shuongei hao to laukei, ‘Khülonga kün hauan khübü kho yoshaitimang sühda sai?’

²⁹Hobaje haoei haoen to laukei, ‘Tou, aingenyu kanei yousang yoshaijinei, khübü yoa youkungkei yoshaioulabü.

³⁰Youlat jih asüh shongko ham liko yemtiashi, hoba youlatjinei, shaangla yousang yoshaiashi, hoba khübü kho jikan apla shanga thepshaiashi, lausikei youshouje kü bunga yoshaiashi,’ dogo ngei youlatbü shuong to lenlabü.”

³¹Tokei ngühphatbü che haoei haoen to laukei, “Khuthük Sangle müt cheei yongkoshik youli sungjung hauan jembü seka wenbü phatkei.

³²Ho youli pendou to hanbou, lausikei ladang ho chingenda, kesiong pendou to yaangbou, hoba ho bunyu la yeida, hibü mühkabü aushuong louan haoeibü bheka laangda.”

³³Tokei haoei haoen la ngühphatbü che lenkei, “Khuthük Sangle ho yaksa cheei tokai sungan wenchak sema dotan pendou pujung along shongko phobü phatakei.”

³⁴Jisuei noknyüh to khübü pendou ngühphatbüa lenkei; hoba ngühphatbü ayoko haoei haoen to ai alen.

³⁵Ho thuseibüei laubü loushedtila yingan kiteikei, “Ngei ngühphatbüa kü sembung iplabü; Kaopakjinei huan kibü ngüh shuong ngei kaangbang laulabü.”

³⁶Kheijinei haoei noknyüh apyokei hoba chem to atkei, hoba hao eikshuong hao jungto louan laukei, “Seka yousang shangabü kün la wanan lenshi.”

³⁷Hobaje haoei jongaikei, “Youli maibü wenbou kho Müteibü Shou.

³⁸Sek kho kaodak. Youli maibü kho Sangle shousi shuong ki; hoba yousang kho amaiboueibü shousi shuong ki;

³⁹hoba kho wenbou dangbou kho shabü mühghaü ki; youlat jih kho kaodak thonbü ki; hoba youlatbü shuong kho khuthük hangangbü shuong ki.

⁴⁰Hibü yousang kho yoshaian wanei lai jikan apda, kho tegü kaodak thonbüakei kilabü.

⁴¹Kheijinei Müteibü Shouei jembü khuthük hangangbü shuong hautikulabü, hoba haoenei haoeibü Sangle ka phaiyettibü shuong pendou,

⁴²hoba amaibü jungeibü shuong leishailabü, hoba sekbülakbü wanlonga lapan jinlabü; khonei haapbü hoba hauh uyobü kilabü.

⁴³Kheijinei saopobü shuongei jembü Boueibü Sanglea chanyu tegü haulabü. Ao nou yembei haoei ditashi.

⁴⁴“Khuthük Sangle seka nam hubü phatkei; laobou müt cheei hapbei hoba hukei. Hobaje olinbüa ngaikei, haoei kibü khümbo yakkei hoba sek kho phoukei.

⁴⁵“Tokei Khuthük Sangle phülem maibü lambü namseibü müt che phatkei.

⁴⁶Haoei namton phülem che hapsi hao ngaian haoei kibü pendou yakkei hoba kho jekkei.

⁴⁷“Tokei, Khuthük Sangle yungnyua tak sanan ngau phang pendou lapbü phatkei.

⁴⁸Ladang kho shenkei haoenei kho deiko to senbakei, hoba setan haoenei maibü shuong qheka yoshaikei, lausikei amaibü kho haoenei apbei.

⁴⁹Kaodak thonbüa khei kilabü. Khuthük hangangbü shuong loulabü hoba saopobü shuong yoka ka amaibü shuong pinyinlabü,

⁵⁰hoba haoen sekbülakbü wanlong to lapan jinlabü; khonei haapbü hoba hauh uyobü kilabü.”

⁵¹Jisuei laukei, “Kanei habü pendou ditenakou lo?” Haoenei hao to laukei, “Haü.”

⁵²Haoei haoen to laukei, “Hibü Ngühkhüm lenbou shuong aoyou Khuthük Sangle eik la yeia, jembü kibü ka haanbü hoba hangbü sungenbü chem che phatkei.”

⁵³Hobaje ladang Jisuei khübü ngühphatbü laukhümbei, haoei kho kaoen apyokei.

⁵⁴Hobaje jembü sangnyu to louan haoei haoen to haoeneibü sinagoga lenkei, kho khei lensi haoenei maangpangko laukei, “Ho songsihon, hoba habü thusei kümsilei ho mütei ai ka hapbei?

⁵⁵Mistri shou kho ho aying si? Haonyu Mari nyenkei aying lo? Hobaje haonasi shuong, Jakob si Josef hoba Simon si Juda aying lo?

⁵⁶Hobaje haona yaksa shuong pendou sen yoa aki lo? Khei yinga longa haoei ho pendou laka hapbei?”

⁵⁷Hobaje haoenei hao to phaiyetkei. Jisuei haoen to laukei, “Jembü kaodak si jembü chema to liman thuseibü asangko aki.”

⁵⁸Haoen to mailem akibü danko haoei khünei seiei kümsilei aküm.