Read Chang Naga MATHI 14 Bible Online

MATHI 14 - Chang Naga bible

MATHI 14

¹Kheijinei Herod Tetrarkei Jisu shangabü ngühlang ditkei,

²hoba hao khangenbü shuong to laukei, “Ho Johan Baptibou, hao haibü ka langngai- akei; khoei habü kümsilei haoei kümda.”

³Aiei lausi Herodei haona Filip yak Herodia laüa Johan lapan kühan thüngdanga phokei;

⁴aishanga Johanei hao to laukei, “Nyi sao lejan aying.”

⁵Hobaje haoei hao haitimang sühkei, lausikei hao noknyüh to hatkei, aishanga haoenei Johan thuseibü che dogo dambei.

⁶Lausikei Herod bukbü chalou pennyet, Herodia nouyangshouei yen thedanga tombei, hoba Herod olintikei;

⁷hibü saoei ai ong hilaje kho sao la kukho dogo haoei theletlanletko thekukei.

⁸Hobaje saoeibü nyuei thungbü jangbü danko saoei laukei, “Kü la Johan Baptiboueibü khu phau chenei labü.”

⁹Hobaje Choba kho maang ngangkei; lausikei jembü theletlanletbü hoba hao yoa shaushang yungshanga setbü shuong laüa haoei kho kula sakkukei.

¹⁰Hobaje haoei hautiko thüngdanga Johaneibü khu thetkei.

¹¹Hobaje haoeibü khu kho phau chenei sungbaan medeinyu la kukei, hoba saoei kho haonyu jungto sungbakei.

¹²Hobaje hao eikshuong louan haibü mang kho lenglangan khünkei; hoba haoenei hauan kho Jisu la lenkei.

¹³Ladang Jisuei kho ditkei, hao mütpem khüka long chenei sangliphang to kukkei. Hobaje kho noknyühei ditjinei, sangnyu ka youei hao phai sembei.

¹⁴Hobaje hao longjinei mütshang yaangbü che hapbei, hoba haoei haoen shanga sanouko daman haoen shatbü nyatbü shuong maitikei.

¹⁵Hobaje ladang chasem sühkei, eikshuong hao jungto louan laukei, “Ho sangliphang, hoba chanyu nepan apa. Sang shuong to hauan haoenei shausiyung jeklabü lele noknyüh lintiashi.”

¹⁶Jisuei haoen to laukei, “Haoen haula akhamda, kanei haoen la denche okashi.”

¹⁷Hobaje haoenei hao to laukei, “Künei hanei wentek ngao hoba ngau nyi ong ki.”

¹⁸Hobaje haoei laukei, “Khübü kho kü jungto sungba.”

¹⁹Hobaje noknyüh kho sanglaak thüka setla sakkukei. Kheijinei haoei wentek ngao hoba ngau nyi kho jungkei, hoba haoei khuthük ae chühangtikei hoba haükukei; hoba ladang haoei wentek kho shaknyinkei, haoei eikshuong la kukei.

²⁰Hobaje haoenei senyühshembo shaukei; hoba jouletbü netshouei kam anthüknyi shenko haoenei heshaikei.

²¹Hobaje shaubü yungbü shuong yaksa hoba nashousi shuong aweko bousu hajar ngao kiteikei.

²²Jisuei noknyüh lintijinei, haoei hao eikshuong long che to atan hao thedang to thi deiphei to hautikei.

²³haoei haoen sattikei hoba hao mütpem shongh to welaula angkei. Ladang chasem sühkei khünei hao mütpem kiteikei.

²⁴Tou long kho dei ka lounyu hean kiteikei, hoba kho deishouei aeibou khokeitiko kikei, aishanga yeiei thedang aeka soungaikei.

²⁵Ngeyang sem ka lak jih kanglanga hao haoen jungto deitaka paijung haukei.

²⁶Ladang eikshuongei hao deitaka paiko hapbei, haoen mokde apyokei hoba lau kei, “Ho sou yingkei”; hoba haoen hatbü ka ngekyokei.

²⁷Kheijinei Jisuei haoen to laukei, “Maang kaangashi! ngo yingkei, tehüt.”

²⁸Peterei hao to jongaikei, “Bunyubou, no yingsije ngo ka jungto deitaka loula sakkushi.”

²⁹Haoei laukei, “Kaiya.” Peter long ka lotkei hoba deitaka paiko Jisu jungto likei.

³⁰Lausikei ladang haoei yei kaangbü kho hapbei hao hatkei, hoba hao deimang to shemetlangla khangjinei haoei ngekkei, “Bunyubou, ngo püetashi.”

³¹Kheijinei Jisuei hao ik shingan hao to hatkei hoba hao to laukei, “Ka mailem latetche hankei! Aila maanga shuda?”

³²Ladang haoen long to atkei yei thakkei.

³³Longa kibü shuongei hao junga khüpetko laukei, “Maimaitham no Mühghaü Shou.”

³⁴Ladang haoenei dei khatkei haoen Genesareta sühlangkei.

³⁵Khükabü mütshuongei shenkei hoba haoenei hao kaophei pendou to hautikei, hoba haoenei hao jungto shatbü pendou leibakei.

³⁶Hobaje haoen la haoeibü neiyika ongkei meititikai dogo haoenei hao to sukeijakei. Hobaje meitibü shuong pendou maikei.