Read Chang Naga MATHI 16 Bible Online

MATHI 16 - Chang Naga bible

MATHI 16

¹Farisi hoba Saduki shuong loukei, hoba hao takteiko khuthük ka haoen la amaaphilabü che lenbü dogo phekei.

²Haoei haoen to jongaikei, “Ladang chasem sühdaje kanei lauda, ‘Chalou mailabü, aieilausi müh sakteiakei.’

³Hobaje ngeyang, ‘Tat yeinak loulabü, aieilausi müh saklangle sangmei shangakei.’ Kanei mühnyu tetenda; khülonga kanei jihsiphaieibü amaaphilabü alenenda si?

⁴Amaibü hoba asangalanbü metenei amaaphelabü lamda, hoba Jona amaphelabü to liman lubü ai amaaphelabü akulabü.” Hobaje Jisuei haoen apyoan satkei.

⁵Eikshuong thi yungko sühkei hoba haoenei wentek künla makei.

⁶Jisuei haoen to laukei, “Maangsangashi! Farisi si Saduki shuong tokai to maangsangashi.”

⁷Haoen si haoen kanglanga joyoko laukei, “Senei wentek asungba.”

⁸Jisuei kho ngekei hoba laukei, “Kaneibü mailem latetche hankei! Kanei aila tükdebü wentek akünbü shanga lauyoda?

⁹Kanei tou sühko ashuokda lo? Hobaje kanei wentek ngao müt hajar ngao la shombuan tokei kanei kam ladüng heshaikei kho kanei adamenda lo?

¹⁰Hobaje wentek nyet müt hajar lei la shombuan kanei kam ladüng heshaikei?

¹¹Ngei kan la wentek shangabü alen dogo kanei lai aditenda? Lausikei Farisi si Saduki shuong tokai to maangsangashi.”

¹²Kheijinei haoenei haoei haoen to wentek shanga jungeibou tokai aying, lausikei Farisi si Saduki shuong lenbü to maangsangla shanga laukei dogo shuokkei.

¹³Ladang Jisu Kaisariaa Filipi kaophei to loukei haoei hao eikshuong to phekei, “Mütshuongei Müteibü Shou to ao dogo lauda?”

¹⁴Haoenei laukei, “Atei, ‘Johan Baptibou’; atei, ‘Elija’; hoba atei, ‘Jeremia’ ayingsi ‘thuseibü yoa che’ dogo lauda.”

¹⁵Haoei haoen to laukei, “Lausikei kanei ngo ao dogo lauda?”

¹⁶Simon Peterei jongaikei, “No langkei Mühghaü Shou, Khrista.”

¹⁷Jisuei hao to jongaikei, “Jona shou Simon, no haübou; aishanga khuthüka kibü Kübou to liman kaodakbü aoeikei ho ka to tang akhitti.

¹⁸“Tokei ngei ka to lenda, ‘No Peter’, (tetlabü Laangdak) hoba ho laang thüka ngei kü lashong huonglabü, hoba haibüei kho athüklanglabü.

¹⁹Ngei ka la Khuthük Sangle koukhin kulabü, hoba nyi ai ong kaodaka khühlaje kho khuthüka khühlabü, hoba nyi kaodaka ai ong sengkulaje kho khuthüka sengkulabü.”

²⁰Kheijinei hao Khrista yingkei dogo aolakei alenla shanga haoei hao eikshuong to kaangkosekko lenkei.

²¹Kho jih ka jaüan hao Jerusalem to haujan, hoba jaishou shuong, hoba ungshedbou shuong hoba Ngühkhüm lenbou shuong ka khonku juong hapjan, hoba haitijan, hoba sembounyet langngaijan, dogo Jisuei jembü eikshuong la lenla khangkei.

²²Peterei hao leilangkei hoba hakeiko laukei, “Bunyubou, Mühghaüei kho lothetshi! Kho ka to aloushadlabü!”

²³Hao sepeikei hoba Peter to laukei, “kü phaito kukashi, Satan! No kü shanga phaiyetshang ki, aishanga nyi Mühghaü aedang ka ayingko müt aedang ka damda.”

²⁴Kheijinei Jisuei hao eikshuong to laukei, “Atei kü phai loumang sühsije haoei jembü lolo hanjan, hoba jembü peisei pean, kü phai semashi.

²⁵Aishanga müt cheei hao langkei püetmang sü- halonga haoei kho maulabü, lausikei aoei kü nyen laüa jembü langkei maulaje kho hapmeilabü!

²⁶Aishanga mütei kaodak khümbo pailetan jembü langkei maualonga haoei ai pailetla? Ayingsi mütei jembü langkei jeila ai kula?

²⁷Aishanga Müteibü Shou jembü Bou soneikangbüa khuthük hangangbü yoa loulabü, hoba kheijinei haoei müt weko la jembü kümsilei thüng pailetbü kulabü.

²⁸Ngühmaia ngei kan to lenda, hanei loan kibü shuong yoa atei Müteibü Shou haoeibü Sanglea aloushongko haibü jepan achühlabü.”