Read Chang Naga MATHI 21 Bible Online

MATHI 21 - Chang Naga bible

MATHI 21

¹Haoen Jerusalem nyangko sühlangkei hoba Oliv shongha kibü Bethfage to loukei. Jisuei eik nyi,

²haosi to hai lauko hautikei, “Kasi thedang kabü sang to atashi, hoba khonei gadu che phenan shoushou yoa haplabü. Khünyi sengan kü jungto leiba,

³hoba atei kasi to aiche laua longa, ‘Bunyubouei khamda’ dogo lenshi; kheijinei haoei ham hautilabü.”

⁴Ho thuseibü danko,

⁵“Zion nouyangshou to lenashi, Chühashi, ka Choba eaaoa gadu thüka, khei gadu shoushou thüka setan ka jungto louada” dogo laubü kho loushedla shanga haüthükkei.

⁶Eik nyi haukei hoba Jisuei haosi la sakkubü tegü kümbei.

⁷Haosiei gadu si shoushou kho leibakei, hoba haoeneibü neisimei khünyi thüka seikukei, hoba hao khonei setkei.

⁸Mütshang yaangbüei haoeneibü neisimei lamnyua imbukei, hoba lubü shuongei bunyu ka buham wetan lamnyua imbukei.

⁹Hao thedang to haubü hoba hao phainei yangbü noknyüh shuongei ngekko laukei, “Dawid Shou, Khümenashi! Bunyubou nyena loubü haülabü yingshi. Thükkaboua nyensang yaang yingshi!”

¹⁰Ladang hao Jerusalem to atkei, sangnyu khümbo panglangyokei. “Kho ao?” dogo haoenei laukei.

¹¹Noknyühei laukei, “Ho Galil kaodaka Nazaret kabü thuseibü Jisu.”

¹²Jisu lembü chem to atkei, hoba yakbü hoba jekbü dan pendou shian sattikei; haoei namjeibü daneibü khümsuok si dukutuk yakbü daneibü setshang khokan koutikei;

¹³hoba haoei haoen to laukei, “Laishibaei lauda, ‘Küchem to welaubü chem dogo nyenlabü’; lausikei kanei ho kokbü shuongeibü laangbob la yeitida.”

¹⁴Nyekthubü si sokebü shuong lembü chem to hao jungto loukei, hoba haoei haoen maitikei.

¹⁵Ladang ungshedbou shuong si Ngühkhüm lenbou shuongei haoei maangpanglabü kümsilei kümbü, hoba “Dawid Shou, Khümenashi!” dogo nashousi shuongei lembü chema ngekyobü hapbei haoen khauangkei,

¹⁶hoba haoenei hao to laukei, “Haoenei laubü kho nyi ditdalao?” Jisuei haoen to laukei, “Aika; ‘Nyi nasak hoba senshepbü sembung ka nyensangbü soutia’ dogo kanei ladangkei awe lo?”

¹⁷Haoei haoen apyokei, hoba sangnyu ka longan Bethani to atkei, hoba khünei thüngkei.

¹⁸Hao ngeyang ete longeijinei hao mühei haikei.

¹⁹Haoei lam- phanga bhuklong che hapan khüto lousi yik to liman ai ühüp. Haoei khüto laukei, “Tou ka jaüan ladangkei ka to mai tehek!” Hobaje bhuklong khoyam yuikei.

²⁰Eikshuongei kho hapan maang- pangkei hoba laukei, “Ailaibü bhuklong khoyam yuian apbei?”

²¹Jisuei haoen to jongaikei, “Ngühmaia ngei kan to lenda, kanei atoknokko mailemsije, bhuklong to ai kümbei, kanei khüjo ong kümla aying, lausikei kanei ho shongh to mangkei, ‘No haka tonlangan simaangto thapjung atashi’, dogo laulabü, hoba kho haüthüklabü;

²²mailembo welaubüei kanei ai ong hilaje pendou kanei haplabü.”

²³Hao lembü chem to atan songlenko kijinei, ungshedbou shuong si jaishou shuong louan hao to laukei, “Ai hauei nyi habü kümda? Aoei ka la ho hau kukei?”

²⁴Jisuei haoen to jongaikei, “Ngeikei kan ka che phelabü. Kanei kü la kho lenalonga ngeikei ai hauei habü kümsilei kümda, kho kan la lenlabü.

²⁵Johan Baptikubü laka loukei, khuthük ka si müt ka?” Haoen si haoen wetyoko laukei, “ ‘Khuthük ka’, dogo senei laualonga, ‘Khülonga aila kanei hao to maialem?’ dogo haoei sen to laulabü.

²⁶Senei ‘Müt ka’, dogo laualonga senei noknyüh to hatda; aishanga pendouei Johan kho thuseibü che dogo sungletda.”

²⁷Haoenei Jisu to jongaikei, “Künei angekei.” Haoei haoen to laukei, “Ngei ai hauei habü kümsilei kümda kho ngei kan to telenkho.”

²⁸“Kanei ai damda? Müt cheei shousi müt nyi kikei, haoei shaangbou jungto hauan laukei, ‘Kü shou, hauashi hoba tat semlühlaaka kümaleiashi.’

²⁹Haoei jongaikei, ‘Ngo akoulabü.’ Kho phaia haoei haoeibü maang kümetkei hoba koukei.

³⁰Haoei nyiboubü jungto hauan jeteibü ngüh kho ong laukei. Haoei jongaikei, ‘Koukho, yaangbou’; lausikei hao akou.

³¹Khünyi yo ka bouei maangangbü laobouei kümbei?” Haoenei laukei, “Shaangbouei.” Jisuei haoen to laukei, “Ngühmaia ngei kan to lenda, khüm hebü shuong si suonlamnyu shuong kan to shaang Khuthük Sangle to atda.

³²Aishanga Johan kan jungto louan saopobü lamnyu lenkei hoba kanei hao to maialem; lausikei khüm hebü shuong si suonlamnyu shuongei hao to mailembei. Kanei kho hapbei, lausikei phaito ongkei maangpon sepeian hao to maialem.”

³³“Lubü ngühphatbü che ditashi: Sekbubou che kikei, haoei semlühlaak lekei, hoba kho kaiko ba lekei, hoba khonei nitshang thukei, hoba lapheishon che shekei. Haoei kho moubü shuong la apyoan kaonyek saabü che to satkei.

³⁴Ladang mai kheilabü jih lousühkei haoei jembü mai hapla shanga sekmoubü shuong jungto jembü sambü shuong koutikei.

³⁵Sekmoubü shuongei hao sambü shuong lapbei, che to ngümbei, lubü che haoenei haitikei, hoba lubü che haoenei laangei tetetkei.

³⁶Nyiboukei haoei shaangbou to juongbou lubü sambü shuong koutikei, hoba haoenei kho tegü ong haoen to jungeikei.

³⁷Phaila haoei haoen jungto haoshou koutiko laukei, ‘Haoenei küshou to soumo hatlabü.’

³⁸Lausikei ladang sekmoubü shuongei shou kho hapbei haoen yoa joyoko laukei, ‘Phetphanlabou kho ho yingkei. Kaiya, senei hao haitikho, hoba haoeibü peisilei sungkho.’

³⁹Haoenei hao lapbei, hoba semlühlaak ka hao shian sattikei, hoba hao haitikei.

⁴⁰Hibü ladang sekbubou loulaje haoei khübü sekmoubü shuong to ai kümla?”

⁴¹Haoenei hao to laukei, “Haoei khübü amaibü shuong kho aonouko mautilabü, hoba jih sühbüa sekmoubü aoyouei hao la mai kula, kheibü sekmoubü la haoei semlühlaak kho thounoutilabü.”

⁴²Jisuei haoen to laukei, “Kanei Laishibaa: ‘Chemdangbü shuongei laobou laang ale, kho chemnyek laang la yeikei; ho Bunyubouei kümbei hoba sen thea maangpanglabü ki’, dogo laubü kho ladangkei wean achühkei lo?

⁴³Hibü ngei kan la lenda, kan ka Mühghaü Sangle langlabü, hoba mai hekbü phang che la kulabü.

⁴⁴(Aoyou kho laang thüka atetlaje hao netla yeilabü, hoba ho ao thükto lotlaje hao thamngu la yeiko ngünnyinlabü.)”

⁴⁵Ungshedbü shuong hoba Farisi shuongei haoeibü ngüh- phatbü ditjinei, haoei haoen shangabü lauda dogo haoenei shuokkei,

⁴⁶hoba haoenei hao lapla komeiko kiasikei haoenei noknyüh to hatkei, aieilausi noknyühei hao thuseibü dogo dambei.