Read Chang Naga MATHI 22 Bible Online

MATHI 22 - Chang Naga bible

MATHI 22

¹Jisuei nyibou haoen to ngühphatbüei lenko laukei:

²“Khuthük Sangle Choba cheei haoshou shanga chemkanlem oknyinbü phatkei.

³Haoei hao sambü shuong lem to chibü shuong ngala hautikei, lausikei haoenei loumang asüh.

⁴“Nyibou haoei lubü sambü shuong hautiko laukei, ‘Chian kibü shuong to lenashi, Chühashi, kü shausiyung lamleakei, ngeibü masu pongsu hoba amenbü samkeisamuk haitiakei, hoba ajanjan khümbo lamleakei. Chemkanlem to kaiya.’

⁵Lausikei haoenei maang akuko lulu haang to, che haoeibü sek to, hoba lubü che namyakshang to, dogo linkei.

⁶Joubü shuongei hao sambü shuong lapan himou bauko jungeikei hoba haoen haitikei.

⁷Choba khau angkei; hoba haoei hao sepai shuong hautian khübü müt haitibü shuong shemtikei, hoba haoeneibü sangnyu thekei.

⁸Kheijinei haoei hao sambü shuong to laukei, ‘Chemkanlem lamleakei, lausikei chibü shuong amu.

⁹Hibü kan khongyaang lambhek to hauashi, hoba kanei ladüng haplaje pendou chemkanlem to ngashi.’

¹⁰Sambü shuong lambhek to aakei, hoba haoenei hapbü maibü amaibü pendou leishaikei; hoba chemkan chem yenei shenkei.

¹¹“Lausikei Chobaei yenbou shuong to chühla lotjinei haoenei khünei chemkan nei aneibü che hapbei.

¹²Haoei hao to laukei, ‘Jena, no hato chemkan nei aneiko lai lotkei?’ Lausikei haoei ngüh üang.

¹³Kheijinei Choba sambü shuong to laukei, ‘Hao youa ika khühashi, hoba hao tangaenei nakthühbüa tekan apashi. Khünei haapbo hauh uyolabü;’

¹⁴aishanga juongnyu ngada lausikei shijo ong pienda.”

¹⁵Kheijinei Farisi shuongei hauan hao ngüh sunga lai mintila huon kümbei.

¹⁶Haoenei haoeneibü eikshuong Herodeibü eikshuong yoa liko hao jungto hautikei hoba haoenei laukei, “Lenbou, no ngühmaang lanbü, hoba nyi ngühmaia Mühghaü lam lenda, hoba ao to ühütda dogo künei ngekei; aishanga nyi müt the to achühda.

¹⁷Hibü, kün to lenbü; nyi ai damda? Kaisar la khümnam kujan si akujan?”

¹⁸Lausikei Jisuei haoen amaibü chühenkei hoba laukei, “Hibüyoubü dan, kanei aila ngo huonda?

¹⁹Khümnam kho kü la lenbü.” Haoenei sempak che hao la sungbakei,

²⁰hoba haoei haoen to laukei, “Ho aoeibü noksa hoba nyendobü?”

²¹Haoenei laukei, “Kaisareibü.” Kheijinei Jisuei haoen to laukei, “Yingalonga ai Kaisareibü kho Kaisar la kuashi hoba ai Mühghaüeibü kho Mühghaü la kuashi.”

²²Ladang haoenei kho ditkei haoen maangpangkei, hoba haoenei hao apyoan satkei.

²³Khünyet haibü shuong alangngaida dogo laubü Saduki shuong hao jungto loukei hoba hao to pheko

²⁴laukei, “Lenbou, Mosaei laukei, ‘Müt che shousi akiko haialonga, haoenei latnyu kho leiyetlabü hoba haojai shanga youyik longtilabü.’

²⁵Kün yoa jaisinasi nyet kikei. Shaangbou kho chem kanan haikei; hoba youyik akiko haoyak haona la phoyokukei.

²⁶Kho tegü ong nyiboubü, hoba semboubü, hoba nyetboubüa sühko haüthükkei.

²⁷Pendou to thonla yaksa kho haikei.

²⁸Hibü langngaijinei nyet yo khünei sao ao yak yingla? Aishanga pendouei sao yakla lekei.”

²⁹Jisuei haoen to jongaikei, “Kan satan apashi, aieilausi kanei Laishiba ayingsi Mühghaü sei angekei.

³⁰Aishanga langngaijinei haoenei chem akanda, ayingsi laolamla ohautida, lausikei haoen khuthüka khuthük hangangbü shuong tegü ki.

³¹Lausikei haibü ka langngaibü shangabü Müghaüei kan to,

³²‘Ngo Abraham Müghaü, Isak Mühghaü hoba Jakob Müghaü’ dogo laubü wean achüh lo? Hao haibü shuong Mühghaü aying lausikei langkeibü Mühghaü ki.”

³³Ho ditjinei noknyüh haoei lenbüa maangpangkei.

³⁴Ladang haoei Sadukibü shuong ngüh alongko jangtibü ditkei, Farisi shuong che la takshatkei.

³⁵Haoen yo kabü Ngühkhüm lenbou cheei hao huonko phekei,

³⁶“Lenbou, Ngühkhüma sakkubü pendou to laobou yaangkei?”

³⁷Haoei hao to laukei, “Ka maangpon pendouei, ka soushou pendouei, hoba kaibü sensimaang pendouei nyi Bunyubou ka Mühghaü sanouashi.”

³⁸Ho kongnyubou hoba shaangbou ngühkhüm ki.

³⁹Ho phatko thenkabou ho ki: “Nyi ka lepbou to jembü tegü sanoujan.”

⁴⁰Habü sakkubü nyi honei Ngühkhüm hoba Thuseibü shuong ngüh khümbo nongakei.

⁴¹Farisibü pendou yoshaian kijinei Jisuei haoen to phekei,

⁴²“Kanei Khrista shangabü ai damda? Hao aoshou?” Haoenei hao to laukei, “Dawid shou.”

⁴³Haoei haoen to laukei, “Kholonga ailai küman, Dawid Soushouei jungeiko hao to,

⁴⁴‘Bunyubouei ngeibü Bunyubou to lenkei, Ngei kaibü dangbou shuong ka you phanga aphoku shongko kü maenei setshi,’ dogo lauko, ‘Bunyubou’ dogo ngada?

⁴⁵Dawidei hao to ‘Bunyubou’ dogo ngaa longaje ailai küman hao hao shou yingla?”

⁴⁶Aoeikei hao to ngühpem che ongkei ajongaien, hoba khünyet ka jaüan touje aoeikei hao to phebü phela maang ayaangen.