Read Chang Naga MATHI 5 Bible Online

MATHI 5 - Chang Naga bible

MATHI 5

¹Mütshang hapan hao shongh to angkei. Hao setkei, hoba haoeibü eikshuong hao jungto loukei.

²Haoei haoen to hai lauko lenla khangkei:

³“Soushoua mühbü shuong olinbou, aishanga Khuthük Sangle haoeneibü.

⁴Manghaapbü shuong olinbou, aishanga haoen haksotilabü.

⁵Eaaoabü shuong olinbou, aishanga haoenei kaodak pailetlabü.

⁶Saopobü shanga mühei haibü hoba deilabü shuong olinbou, aishanga haoen senyühshemlabü.

⁷üei sanou lenbü shuong olinbou, aishanga haoenei onou haplabü.

⁸Maangpon hinseibü shuong olinbou, aishanga haoenei Mühghaü haplabü.

⁹Sangmai kümbü shuong olinbou, aishanga haoen to Mühghaü shousi shuong dogo laulabü.

¹⁰Saopobü shanga aoyou shieinangeia haoen olinbou, aishanga Khuthük Sangle haoeneibü.

¹¹“Ladang mütshuongei kü nyena kan nyikuko hakda, hoba amlangbü aukabü danko amaibü pendou jungeiko shieinangeilaje kheijinei kan olinbou.

¹²Kho tegü ong haoenei kan thedang kabü thuseibü shuongkei shieinangeikei. Olinashi, aishanga khuthüka kaneibü jongsak yaangbü ki.

¹³“Kan kaodakeibü jem. Jem ka teibü kho maualonga kho aiei teingaitila? Kho touje ailakei leshang aki; ho hakan apda hoba mütei kho nakeila leda.

¹⁴Kan kaodak ngesakbü. Shongha kibü sangnyu che huletla athük.

¹⁵Aoeikei wanthung sapan kamei küplepan aphoda, lausikei wanthung denshanga phoda, hoba khoei chembabü shuong pendou la ngesakbü kuda.

¹⁶Kho tegütham, haoenei kaneibü kümsilei maibü hapan khuthüka kibü Bou la soneikangbü kutilabü lele kaneibü ngesakbü kho mütshuong thedanga hautijan.

¹⁷“Ngo Ngühkhüm ayingsi thuseibü shuong mautila shanga loukei dogo tedam; ngo haoen mautila shanga aying lausikei khübü pentisoutila loukei.

¹⁸Ngühmaia ngei kan to lenda, khuthük si kaodak adan shongko hoba ho pendou aloushad shongko Ngühkhüm haka dolang hanboutham ayingsi pheiche ongkei ühaüthükoje adanlabü.

¹⁹Ao- youei habü Ngühkhüm ka hanboutham ongkei lulimlaje ayingsi mülakei leilutilaje, haoen to Khuthük sanglea hanboutham dogo laulabü, lausikei aoyouei khübü jungeida hoba lubü lakei jungeitida haoen to Khuthük sanglea yaangbou dogo laulabü;

²⁰aishanga ngei kan to lenda, kaneibü saopobüei Ngühkhüm lenbou shuong hoba Farisi shuongeibü mailem alimlang longa kanei khuthük sangle to üetenlabü.

²¹“Danbü jihsiphaia mütshuong to ‘Nyi müt tühaiti’ dogo laubü kanei dida; aoyouei haitilaje haoen kho matjema kilabü.

²²Ngei kan to lenda, aoei haoeibü jaisina to khauanglaje hao matjema yolabü; aoei haoeibü jaisina to ‘Shosiek’ dogo khüklaje hao Sanhedrin thedanga matjema kilabü; aoyouei ‘Ngoubüloubü’ dogo khüklaje haoenei molowan hapshaulabü.

²³Hibü tetlabüei no lemshona jongsak che lemla kümbo kia, hoba nyi kajai kanaei kakhu limbo denche shedtiakei dogo damenalongaje,

²⁴kaibü jongsak kho lemshon khünei khei phoyoshi, shaangla hauan kaibü jaisina to jiyophaiyoshi, hoba kho phaia ong louan kaibü jongsak kho lemashi.

²⁵“Haoei no matjembü la kuan ap, hoba matjembüei thüngdang lombü la ku, hoba lombou khoei thüngdanga khinan apsi amaibüla, kaibü matbubou to kasi lamoua chela paiko kijinei jenabou lamenashi.

²⁶Ngühmaia ngei kan to lenda, kanei poisa che kho ashem shongko khüka asatenlabü.

²⁷“Kanei ho laubükei dida, ‘Nyi asangalanbü ajungeilabü.’

²⁸Lausikei ngei kan to lenda aoei yaksa che to dühko chühda haoei maangpona je sao to asangalanbü shona.

²⁹Kaibü mae nyekei ka la shabü shontialongaje, kho sungenashi hoba tekan apashi, aishanga mang pemtolo molowan to haukhoulabü khantoje kaibü küksihuo ka cheei aonbü kho khaibou.

³⁰Hobaje kaibü mae ikei no shabü shontialonga, kho danan apashi, aishanga kaibü mang pemtolo molowan to haukhoulabü kantoje kaibü küksihuo cheei aonbü kho ka shanga khaibou.

³¹“Hokei laukei, ‘Aoyouei jembü yak bangtilaje sao la bangbü ngühchung le kujan.’

³²Lausikei ngei kan to lenda, alanbüa ayinglongaje aoei haoyak sattida haoei sao la shabü shontida, hoba aoei sattibü yaksa kho ngada hao lakei shabü shontida.

³³“Tokei kanei danbü jihsiphaia mütshuong to ho lenko dida, ‘Nyi kaibü thebülanbü aleilulabü, lausikei nyi kaibü thebülanbü kho Bunyubou thedanga loushedtijan.’

³⁴Lausikei ngeije kan to lenda, ho Mühghaüeibü Choba setshangbü dogo khuthük phongko,

³⁵ayingsi ho haoeibü younakshangbü dogo kaodak nyen phongko, ayingsi ho Choba Yaangboueibü sangnyubü dogo Jerusalem phongko yingsi dogokei aikei athealanlabü;

³⁶ayingsi nyi khulou che ongkei thupaitila ayingsi nakhütila athükkeibü dogo kaibü khu phongko yingsikei aikei athe- alanlabü.

³⁷Kaibü ngüh kho ‘Haü’ longa ‘Haü’ hoba ‘Ji’ longa ‘Ji’ dogo yingshi. Kho to liman lubü khoje Amaibou ka longbü ngüh ki.

³⁸“Kanei ho laubükei dida, ‘Nyek jeila nyek, hoba hauh jeila hauh.’

³⁹Ngei kan to lenda, amaibou to teshekei lausikei atei kaibü mae om to ipa longa hao la ji aedangkei thokuashi.

⁴⁰Müt cheei ka to liko matjemshang to haumang sühsije hoba kaibü mangkabü neisimeikei lemang sühalongaje hao la tangkabou mangshokei yoan kuashi.

⁴¹Müt cheei no sekphai che hautimang sühalonga hao yoa sekphai nyi paiashi.

⁴²Ka ka hibou la kuashi, hoba ka ka lotmang sühbou ka the tesepei.

⁴³“Kanei ho laubükei dida, ‘Nyi kaibü lepbou to sanouashi hoba dangbou to mangsenashi.’

⁴⁴Lausikei ngei kan to lenda kaibü dangbou shuong to sanouashi hoba no shieikoebü shuong shanga welaukuashi.

⁴⁵Khei yingsije kan kho khuthüka kibü kaneibü boueibü shousi shuong yinglabü, aishanga haoei amaibülakei maibülakei chanyu longtikuda hoba saopobü hoba asaopobü lakei lang yantikuda.

⁴⁶Aishanga nyi ka to sanoubü dan to ong sanoua longa, kaneibü jongsak ai ki? Khüm hebü shuongeikei khei kümda ji si?

⁴⁷Hobaje nyi kaibü jaisinasi shuong to ong maang shika longaje, nyi lubü ai aei jungeida? Küksithang shuongeikei kho jeteibü jungeida ji si?

⁴⁸Hibü kaneibü khuthükkabou Bou lai penan souan ki, kho tegü kankei penan souan kishi.”