Read Chang Naga MATHI 8 Bible Online

MATHI 8 - Chang Naga bible

MATHI 8

¹Hobaje ladang hao shongh ka louyenkei, noknyüh yaangbü che hao phai sembei.

²Hobaje chühashi, hao jungto imbü che louan hao thedanga lembo laukei, “Yaangbou, nyi maangangsije nyi ngo saüenkula thükkei.”

³Hobaje Jisuei haoeibü ik shingan hao to meitiko laukei, “Ngei maangangda; no saüenashi.” Kheijineitham haoeibü imshat ka saüenkei.

⁴Jisuei hao to laukei, “Chühashi, nyi aotokei telen; lausikei hauashi hoba no lolo ungshedbou la lenashi, hoba no maia dogo haoen to aukabü künla shanga Mosaei sakkubü jongsak lemashi.”

⁵Hobaje ladang hao Kapernaum to atkei, Saongao thükkabou che hao jungto louan hao to sukojako laukei,

⁶“Yaangbou, kü sambü tuokshatei shatko, aeibou khon kuko chema phetetnyu yepakei.”

⁷Hobaje haoei hao to laukei, “Ngo loulabü hoba hao maitilabü.”

⁸Lausikei Saongao thükkabouei jongaikei, “Yaangbou, no ngeibü chemsophang to lotla ngei amukei, lausikei ngüh kho ong lauashi hoba kü sambü mailabü.

⁹Aishanga kü phanga lakjaibü shuong phoan, ngokei songdak hau phanga kibü müt che ki. Hobaje ngei khüto lauda, ‘Khou’, hoba hao hauda; hoba lubü to, ‘Kaiya’, dogo lauda, hoba hao louda; hoba ngei ngeibü sambü to, ‘Ho kümashi’ dogo lauda, hoba haoei kho kümda.”

¹⁰Hobaje ladang Jisuei kho ditkei, hao maangpangkei hoba phaisembü shuong to laukei, “Ngühmaia ngei kan to lenda, ho tegübü mailem yaangbü Israel yoa ngei aineikei ühüp.

¹¹Ngei kan to lenda, chaang hoba chanep ka juongnyu loulabü hoba Abraham hoba Isak hoba Jakob yoa setshanga khuthüka setlabü;

¹²lausikei Sangleeibü püshi shuongje nongbü nakthüha aplabü; khonei haapbü hoba hauh uyobü kilabü.”

¹³Hobaje Jisuei Saongao thükkabou to laukei, “Hauashi, nyi mailembü tegü kho shanga kümlabü.” Hobaje sambü kho kho jih khünei maian apbei.

¹⁴Hobaje ladang Jisu Peter chem to loukei, haoei Peter yakeibü nyu mangpokei shatko shena lengan hapbei.

¹⁵Hobaje Bunyubouei saoeibü ika jungkei hoba mangpokei sao apyokei, hoba sao laksepbei hoba hao la nongnaekukei.

¹⁶Hobaje ladang chasem sühkei haoenei hao jungto shabü souei lapbü juongnyu leibakukei. Hobaje haoei shabü sou shuong kho welausansanbü ngüh cheei shian sattikei, hoba shatsinyat pendou maitikei.

¹⁷Kho Isaia thuseibüei, “Haoei sen athükamin langkukei, hoba seneibü shatsinyat thonglangkukei” dogo laubü ngüh loushedtila yingan kiteikei.

¹⁸Ladang Jisuei hao kaijembo noknyüh yaangbü che hapbei, haoei dei thidang to khatla ngühkhüm kukei.

¹⁹Hobaje Ngühkhüm lenbou che loukei hoba hao to laukei, “Lenbou, no lae to haulaje ngei kaphai semlabü.”

²⁰Hobaje Jisuei hao to laukei, “Selong shuongei laangbob ki hoba mühkabü au shuongei hap kia; lausikei Müteibü Shouje hao khu nongshang aki.”

²¹Haoeibü eik cheei hao to laukei, “Yaangbou, ngo shaang hauan kübou khünla sakkubü.”

²²Lausikei Jisuei hao to laukei, “Kü phai semashi, hoba haibü shuong la haoen haibü khünla phoyoashi.”

²³Hobaje ladang hao long che to atkei hao eikshuongei haophai sembei.

²⁴Hobaje chühashi, thim khonei yeishik yaang lotkei, khoei long kho deishouei danglepbo yeikei. Lausikei Jisu je yepan kiteikei.

²⁵Hobaje haoen hao jungto loukei hoba pitiko laukei, “Bunyubou, kün püetashi, kün shemetda.”

²⁶Hobaje haoei haoen to laukei, “Kan aila hatda, mailem hanbü shuong?” Kheijinei hao laksepkei, hoba yei si deishou to kaang hakkei, hoba jemetshouko kikei.

²⁷Hobaje mütshuongei maangpangkei hoba laukei, “Yei si deiei mangkei hao ngüha lelabü ho ailaibü müt?”

²⁸Hobaje hao yungko thidang to Gadara kaonyek to loukei, hoba shabü souei lapbü müt nyi heelaak ka longbüei hao to haüyokei. Haosi aeibou sekbülakbü yingsije aoeikei kho lam to adan.

²⁹Hobaje chühashi, haosiei ngekko laukei, “Mühghaü Shou, nyi aila kün peksekda? Jih asühko kün khonkutila no hato loukei lo?”

³⁰Haoen ka tuisho hean uk shuong che lamshauko kiteikei.

³¹Shabü sou shuongei hao to sukojako laukei, “Nyi kün shian sattisije, kün ukshuong yoto hautikai.”

³²Jisuei haoen to laukei, “Hauashi.” Hobaje haoen longkei hoba ukshuong to atkei; hoba ukshuong pendou laanglip to nyuyoko yungnyu to atkei hoba deia shemetkei.

³³Hobaje uklombü shuong satyokei hoba sangnyu to haukei. Khünei haoenei kongnyu leko shabü souei lapbü shangabü hoba haüthükbü ajanjan pendou lenkei.

³⁴Hobaje chühashi, sangnyubü shuong pendou Jisu to haüyola longkei, hoba ladang haoenei hao hapbei, haoeneibü kaophei apyola shanga haoenei hao to sukeijakei.