Read Chang Naga MARK 10 Bible Online

MARK 10 - Chang Naga bible

MARK 10

¹Hao khüka meimeijung Jihuda kaophei hoba Jordan thidang to loukei. Tokei noknyüh hao jungto yoshaikei, hoba hao hanghangbü tegü haoei haoen la lenkei.

²Farisibü shuongei louan hao takteila phekei, “Bousuei jembü yak to bangjan sai?”

³Haoei jongaikei, “Mosaei kan la ai sakkuda?”

⁴Haoenei laukei, “Bangbü le dokuan sattila sakkukei.”

⁵Jisuei haoen to laukei, “Kan maangpon kaangsije haoei kan la ngühkhüm ho dokukei.

⁶Lausikei kaopakbü ka jaüan Mühghaüei bousu hoba yaksa kümbei.

⁷Ho aukabüa bousuei haonyu si haobou apyolabü hoba jembü yak to maanghaiko kilabü,

⁸hoba nyi kho che la yeilabü. Hibü haosi touje nyi aying lausikei che ong.

⁹Mühghaüei ai chela thangjamtikei, kho mütei tebangti.”

¹⁰Ladang haoen nyibou chema shaikei, kheijinei eikshuongei hao to kho shangabü phekei.

¹¹Haoei haoen to laukei, “Aoyouei jembü yak sattian lubü ngalaje, haoei sao khulimbo asangalanbü shonda;

¹²hoba sao aoei jembü lao to bangan lubü chem to haudaje saoei asangalanbü shonda.”

¹³Hao la meititila mütshuongei hao jungto nashou hanbü shuong leibako kikei, lausikei eikshuongei haoen to hakkei.

¹⁴Ladang Jisuei kho hapbei hao aeibou khauangkei hoba haoen to laukei, “Nashousi shuong kü jungto loutikai. Haoen teshilet, aishanga Mühghaü Sangle kho habü tegübü shanga ki.

¹⁵Ngühmaia ngei kan to lenda, nashou cheei tegü kanei Mühghaü Sangle asunglet longa haoei khüto üetenlabü.”

¹⁶Haoei haoen to ikei jungkei hoba haoen to shangetko haükukei.

¹⁷Hao lama paiko kijinei müt che hao jungto langjung loukei. Haoei hao thedanga khüpetkei hoba hao to phekei, “Lenbou maibou, Ponpen langkei phet phanla ngei ai kümjan?”

¹⁸Jisuei hao to laukei, “Nyi aila kü to maibou dogo lauda? Mühghaü to liman aokei maibü aki.

¹⁹Nyi ngühkhüm shuong ngeakei: Tühaiti, asangalan tejungei, tekok, amlangbü aukabü tüt, ailam aeiphopbo tesunglet, kanyu si kabou to soumo hatashi.”

²⁰Müt khoei hao to laukei, “Lenbou, khübü pendou ngei nashouathama jungeia.”

²¹Jisuei hao to tangko chühkei hoba hao to sanouko dambei. Haoei laukei, “No cheei aonkei. Ngaiashi hoba nyi kibü pendou yakashi hoba yakletbü kho shalebü la kuashi, hoba nyi khuthüka nyaksinam kilabü; hoba kaiya hoba kü phai semashi.”

²²Kho laubüei müt kho thekhümbei hoba ngangko satan apbei, aishanga hao nyaksinam juong kiteikei.

²³Jisuei kaijembo chühkei hoba hao eikshuong to laukei, “Keibüei Mühghaü Sangle to atla lai sekkei”;

²⁴kho ngüh ditan hao eikshuong maangpangkei. Jisuei haoen to nyibou la lenkei, “Nashousi shuong, nyaksinam to maanglembü keibü shuongei Mühghaü Sangle to atla lai sekkei!

²⁵Keibüei Mühghaü Sangle to atbü toje nidku khün ka ut shedlangbü sobou.”

²⁶Haoen aeiche maangpangkei hoba haoen si haoen lauyokei, “Khülonga ao ong khümenla?”

²⁷Jisuei haoen to chühkei hoba laukei, “Müt shanga athükaminlabü, lausikei Mühghaü shangaje aying, aishanga Mühghaüeije pendou thükkei.”

²⁸Peterei hao to laukei, “Kün shanga lai? Künei pendou apyoa hoba ka phai sema.”

²⁹Jisuei laukei, “Ngühmaia ngei kan to lenda, aoei chem yingasikei, jaisina yingasikei, nousina yingasikei, nyu yingasikei, bou yingasikei, shousi shuong yingasikei ayingsi kao yingasikei kü shanga hoba Ngühlang Maibü shanga apyoa,

³⁰haoei tou ho jihsiphaia saongao onko chem shuongkei, jaisinasi shuongkei, nousinasi shuongkei, nyu shuongkei, shousi shuongkei hoba kao shuongkei hoba shieikoekei yoan haplabü, hoba loulabü kaodaka ponpen langkei haplabü.

³¹Lausikei shaangbü shuong juongnyu phaila yeilabü, hoba phaibü shuong shaanglabü.”

³²Haoen Jerusalem to angko kikei, hoba Jisu haoen thedanga hauko kiteikei. Hobaje haoeibü eikshuong maangpangkei hoba hao phainei sembü shuong hatkei. Haoei nyibou Anthüknyi kho leilikei hoba hao to loushadlabü kümsilei shuong haoen la lenkei.

³³Haoei laukei, “Ditashi, sen Jerusalem to angda hoba Müteibü Shou ungshedbü shuong hoba Ngühkhüm lenbou shuong la khümbomeiko kuan aplabü. Haoenei hao haitilabü lele shedbü kulabü hoba Küksithang shuong la kuan aplabü.

³⁴Hao to nyikulabü, eokei thuoklabü hoba haitilabü. Hobaje chalou sem phaia hao langngailabü.”

³⁵Zebedi shounyi, Jakob si Johan, hao jungto louan laukei, “Lenbou, küsiei kato ai phelaje nyi kümtimang sühda.”

³⁶Haoei haosi to laukei, “Kasiei küla kasi shanga ai kümtimang sühda?”

³⁷Haosiei hao to laukei, “No soneikangjinei Küsi che kaibü maenei hoba che nanaenei dogo settikai.”

³⁸Jisuei haosi to laukei, “Kasiei ai phedaje kho kasiei angekei. Ngei yungbü thung kasiei yungenlep lo? Ayingsi ngo ainei baptian ki khonei kasi baptienlep lo?”

³⁹Haosiei hao to laukei, “Küsiei thükakei.” Jisuei haosi to laukei, “Kasiei maimaitham ngei yungko kibü thung yunglabü, hoba ngo ai baptibüei baptian ki khoei kasi baptilabü;

⁴⁰lausikei kü maenei ayingsi kü nanaenei setlabü khoje ngei kulabü ji, lausikei kho aoyou shanga lamlekukei hao shanga ki.”

⁴¹Ladang anei kho ditkei, haoen Jakob si Johan to khauangkei.

⁴²Jisuei haoen ngakei hoba haoen to laukei, “Aoyouei haoen lolo phangshuong thüka songdakda dogo damda, haoenei bunyu pida, hoba haoeneibü yaangenbü shuongei haoen thüka songdakda, dogo kanei ngeakei.

⁴³Lausikei kan yoaje khei aying, lausikei kan yoa aoei yaangmang sühda hao kan khangenbou yingjan,

⁴⁴hoba kan yoa ao shaangmang sühda, hao pendoueibü sambü yingjan.

⁴⁵Aishanga Müteibü Shou mangkei khangentila aying lausikei khangenla, hoba juongnyu angla shanga hao langkei kula loukei.”

⁴⁶Haoen Jerikho to loukei. Hao, hao eikshuong si noknyüh yoa Jerikho ka angjinei, Timia shou, Barthima, nyekthubü hishau hiyungbü che, lamkoa setan kiteikei.

⁴⁷Ladang haoei ho Nazaretbü Jisu dogo ngekei haoei ngekko laukei, “Dawid shou, Jisu, kü to onoukai.”

⁴⁸Müt juongei sangsemashi dogo hao to hakkei, lausikei aei kaangbou ngekkei, “Dawid shou, kü to onoukai.”

⁴⁹Jisu tangshaitham lokei hoba laukei, “Hao ngaba.” Haoenei hao ngako laukei, “Maangkaangashi! Pienashi; haoei no ngada.”

⁵⁰Haoei neisimei hangletnyu apan toman shatko lokei hoba Jisu jungto loukei.

⁵¹Jisuei hao to phekei, “Nyi küla ka shanga ai kümtimang sühda?” Nyekthubouei hao to laukei, “Lenbou, ngei hapmang sühda.”

⁵²Jisuei hao to laukei, “Ngaiashi, ka mailemei no maia.” Kheijineitham hao nyek khitkei hoba lama hao phai sembei.