Read Chang Naga MARK 14 Bible Online

MARK 14 - Chang Naga bible

MARK 14

¹Nyinyet phaia Püetbü Lem si Tokai ajinbü Wentek Lem lilabü kiteikei. Ungshedbou shuong si Ngühkhüm lenbou shuongei hao ailai kokei minoula hoba lapan haitila dogo haujembo kikei.

²Haoenei laukei, “Senei ho Lema akümjan aishanga hoei mütshuong yoa panget lelabü.”

³Hao Bethania imbou Simon chema kiteikei. Hao shaushanga setan kijinei yaksa cheei nam juongnyu mubü ponlem onang laang thungdou thupaibü chenei sungbakei. Saoei thungdou kho jangnyinkei hoba haoeibü khu to jinkukei.

⁴Lausikei atei haoen yoa khauangko laukei, “Aila onang apsileda?

⁵Ho sempak saongao sem to aeian lu yakan shalebü la kula thükakei.” Haoen sao to khauangkei.

⁶Jisuei laukei, “Sao maang letiashi. Aila kanei khonsaktida?

⁷Saoei kü shanga kümsilei maibü che küma; aishanga shalebü kan yoa ponpen kia, hoba ladang ong kanei kümmang sühlaje kheijinei kanei haoen to maibü kümenakei, lausikei ngo kan yoa ponpenje akilabü.

⁸Saoei ai thükkei kho küma; saoei ngo khünla jih asühjinei ngeibü manga onang naangkukei.

⁹Ngühmaia ngei kan to lenda, kaodak a lanei ong ho Ngühlang Maibü songlenlaje, ho yaksaei kümbü khokei sao damenko laueilabü.”

¹⁰Judas Iskhariot, Anthüknyi yoa che, hao haoen la khümbo kuan apla shanga ungshedbü shuong jungto haukei.

¹¹Haoenei kho ditan olinkei, hoba hao la nam kula thekukei; hoba haoei hao khümbo kuan apla jembü jihsiphai che chüheikei.

¹²Tokai ajinbü Wentek Lem shaangbounyet, ladang haoenei Püetbü lem san shoushou haitikei, hao eikshuongei hao to laukei, “Nyi Püetbü lem shaula yunglabü lele künla nyi lato hauan lamletimang sühda?”

¹³Haoei haoeibü eik nyi hai lauko hautikei, “Sangnyu to atashi, hoba khünei bousu che deikhu- chak künan kasi to haüyolabü. Hao phai semashi,

¹⁴hoba hao lato atlaje chembubou to lenshi, ‘Bunyubouei lauda: Ngei kü eikshuong yoa Püetbü lem shaula yunglabü lele, ngeibü yensüh chem lanei ki?.’

¹⁵“Haoei kasi la khümbo lamleettian thükkabü thangtet yaangbü che lenlabü. Sen shanga khonei lamleashi.”

¹⁶Eikshuong meimeikei hoba sangnyu to atkei; haosiei ajanjan pendou haoei laubü tegü hapbei, hoba Püetbü lem lamlekei.

¹⁷Ladang chasem sühkei, Jisu Anthüknyi yoa loukei

¹⁸hoba, haoen shaushang yungshanga setan shaujinei haoei laukei, “Ngühmaia ngei kan to lenda, kan yoa khei kü yoa shaubü cheei ngo khümbo kuan aplabü.”

¹⁹Haoenei aeibou ngangkei hoba cheei che, cheei che, dogo hao to laukei, “Maimai, kho ngo sai?”

²⁰Haoei haoen to laukei, “Kho Anthüknyi yoa kü phaua hambou che.

²¹Aishanga Müteibü Shou, Laishibaei hao shangabü lenan kibü tegü, haulabü, lausikei ao danko Müteibü Shou khümbo kuan apda, hao shanga ügütü! Kho müt shangaje hao abukbü maibou yingkhoulabü!”

²²Haoen shauji yungjinei haoei wentek sungkei, hoba haoei haükuan kho shaknyinkei hoba haoen la kuko laukei, “Ho sungashi; ho ngeibü mang ki.”

²³Haoei thung che sungan nyensang kukei, hoba kho haoen la kukei; hoba haoen pendouei khüka yungkei.

²⁴Haoei haoen to laukei, “Ho kü sii thebülanbü ki, laobou juongnyu shanga koukei.

²⁵Ngühmaia ngei kan to lenda: Ngei Mühghaü Sanglea semlühdei haanbü ajenshongko, touje semlüh hek mai ngei ayunglabü.”

²⁶Haoenei chia che laukei, hoba Oliv Shongh to haukei.

²⁷Jisuei haoen to laukei, “Kan pendou phaiyetlabü, aishanga Laishibaei lauda, ‘Ngei sanlombou to ngümlabü hoba san shuong aalabü’,

²⁸lausikei ngo langngeian phaia ngo kan to shaang Galil to haulabü.”

²⁹Peterei hao to laukei, “Pendouei apyosikei ngei no üpyolabü.”

³⁰Jisuei hao to laukei, “Ngühmaia ngei ka to lenda, tat, khei tao maimai, aunakei nyinei akoutoua, nyi ngo semnei atheletlabü.”

³¹Lausikei haoei aeibou kaangkosekko laukei, “Ngo ka yoa hailabü kiasikei ngei no üpyolabü.” Hobaje lubü shuongeikei pendouei khei laukei.

³²Haoen Gethsemen dogo laubü kaoen che to loukei, hoba haoei hao eikshuong to laukei, “Ngei welautoua hanei setteiashi.”

³³Haoei Peter, Jakob hoba Johan hao yoa leikei. Hao maangmauei shiettikei hoba aicheküman khonkula khangkei,

³⁴hoba haoei haoen to laukei, “Kü soushou haila tegütham shaleda. Kan hanei kishi, hoba pialemashi.”

³⁵Hobaje hao thedang ae tuisho lian kaoa khüpetkei hoba thükalonga jihsiphai kho hao ka kuktiashi dogo welaukei,

³⁶hoba haoei laukei, “Aba, Abou, ka thedanga pendou thüklabü. Ho thung kü ka ngailangkushi; lausikei kü maang aying ka maang.”

³⁷Hao loukei hoba haoen yepan kibü hapan, Peter to laukei, “Simon, no yepan apda lo? Nyi angh che pianleman akienda lo?

³⁸Kan takteibüa üatetla pialemashi hoba welauashi. Maimaitham soushouei maangtakda, lausikei phea hau aki.”

³⁹Hao nyibou ngaikei hoba jeteibü ngüh lauko welaukei.

⁴⁰Nyiboukei hao loukei hoba haoen yepan hapbei, aishanga haoeneibü nyek aeibou yuian kiteikei, hoba haoenei hao to ai ong jongailaje angeko mangan apbei.

⁴¹Hao semboukei longeikei hoba haoen to laukei, “Kan tou sühko yepda, hoba haksoda lo? Soua! Jih lousüha! Chühashi, Müteibü Shou shabü shuongeibü ikmangto khümbo kuan apa.

⁴²Loenashi, sen hauakho. Chü- hashi, ngo yaakshaubou chunga kia.”

⁴³Kheijinei hao ngüh joyoko kijinei, Judas, Anthüknyi yo kabü che lousühkei; hoba hao yoa, ungshedbü shuong, Ngühkhüm lenbou shuong hoba jaishou shuongei hautibü, in si juthep lamlean jungan mütshang che seman kiteikei.

⁴⁴Hao khümbo kuan apbou khoei haoen la hai lenko amaaphilabü che kuan kiteikei, “Ngei aoto sembung sheplaje kho hao. Hao lapashi hoba lombü shuong phanga leilangashi.”

⁴⁵Hao loukei, hoba tangshaitham hao jungto hauan laukei, “Lenbou”, hoba hao to sembung shepbei.

⁴⁶Haoenei hao to ik shatkei hoba lapbei.

⁴⁷Nyangko loan kibü yoa cheei in che setenan thükkabou ungshedbou sambü che to wapbei hoba haoeibü nou shipan apbukei.

⁴⁸Jisuei haoen to laukei, “Kanei kokbü khulimbo loubü tegütham in si juthep jungan ngo lapla louda si?

⁴⁹Kan to lembü chema chalou angbüa lenkei, hoba kanei ngo alap. Lausikei Laishiba loushadjan.”

⁵⁰Haoen pendouei hao apyokei hoba satkei.

⁵¹Heshou che mang konga inyaibü nei che ong sean haophai sembo kiteikei, hoba haoenei hao to japbei.

⁵²Lausikei inyaibü nei kho ong phainei hangletnyu phokuan mütkong satkei.

⁵³Haoenei Jisu thükkabou ungshedbou jungto leian haukei, hoba ungshedbü shuong hoba Ngühkhüm lenbou shuong takshatkei.

⁵⁴Peterei thükkabou ungshedbou khongmang sühko heeko heeko haophai sembei. Hao khusabü shuong yoa wana kham sepbo setan kikei.

⁵⁵Ungshedbü shuong hoba Khukabü Kambü pendouei Jisu haitila hao khulimbo aukabü lambei, lausikei haoenei che ongkei ühüp.

⁵⁶Aishanga juongei amlangbü aukabü kukei, lausikei haoeneibü aukabü aji.

⁵⁷At loan hao khulimbo amlangbü aukabü atko laukei,

⁵⁸“Künei maimai, ‘Ngei ho ikei kümbü Lembüchem leilulabü, hoba chalou sem phaia ngei lubü ikei akümbü Lembüchem danglabü’ dogo lauko ditkei.”

⁵⁹Kheinyu kümasikei haoeneibü aukabü aji.

⁶⁰Thükkabü ungshedbou haoen thedanga lokei hoba Jisu to pheko laukei, “Nyi ajongailep lo? Habü shuongei kakhu limbo sungbabü habü aukabü shuong ho ai?”

⁶¹Lausikei hao semele kikei, hoba ai ajongai. Thükkabou ungshedbouei laukei, “No Haüboueibü Shou Khrista sai?”

⁶²Jisuei laukei, “Ngo hao; hoba kanei Müteibü Shou Thükkabou Mühghaü maenei setan kibü hoba mühkabü sangmei yoa loubü haplabü.”

⁶³Thükkabou ungshedbouei haoeibü neisimei jitnyinkei hoba laukei, “Senei aila aukabü aei khamla?

⁶⁴Mühghaü nyikubü kanei dida. Kanei ai damda?” Haoen pendouei hao haila muakei dogo shedbü kukei.

⁶⁵Atei hao to eokei thuokkei, hoba haoeibü thenyek yuklepbukei hoba ikei ipbei, hoba laukei, “Tetenashi”, hoba khusabü shuongei leian ngümeikei.

⁶⁶Peter leinei sangchimanga kijinei thükkabou ungshedboueibü sambüsao che loukei

⁶⁷hoba Peter kham sepbo hapbei. Saoei hao to chühkei hoba laukei, “Nokei Nazaret kabü Jisu yoa kiteikei.”

⁶⁸Lausikei haoei hao atheletko laukei, “Ngei angekei ayingsi nyi ai laudaje ashuokda.” Hao khongto angkei hoba aunakei koukei.

⁶⁹Sambüsaoei hao nyiboula hapbei hoba chunga lobü shuong to laukei, “Ho müt haoen yo kabü che.”

⁷⁰Lausikei haoei nyiboukei hao athelet. Longche kian phaia nyangko loan kibü shuongei Peter to laukei, “Maimaitham no haoen yo kabü che yingkei, aishanga no tükde Galilbü.”

⁷¹Haoei khükkeiuokkei hoba thelet lanletko laukei, “Kanei ao shangabü laudaje kho müt ngei angekei.”

⁷²Kheijinei aunakei nyiboula koukei; hoba, “Aunakei nyibou akoutoua nyi ngo semnei atheletlabü,” dogo Jisuei laubü ngüh Peterei damenkei. Hobaje hao maang leilukei hoba haapbei.