Read Chang Naga MARK 15 Bible Online

MARK 15 - Chang Naga bible

MARK 15

¹Lang ngebüyam, ungshedbü shuongei jaishou shuong si Ngühkhüm lenbou shuong hoba Thükkabü Kambü to ngühthang chela yenkei. Haoenei Jisu khühan leilangkei, hoba Pilat la khümbomeiko kuan apbei.

²Pilatei hao to phekei, “No Jihudabü Choba sai?” Haoei hao to jongaikei, “Kho nyi lauda.”

³Thükkabü ungshed shuongei hangsilam juongnyua hao attikei.

⁴Pilatei nyibou hao to phekei, “Nyi ajongailep lo? Haoenei kakhu limbo shedbü sungbada chühashi.”

⁵Jisuei aikei ajongai, khoei Pilat maangpangkei.

⁶Tou songei Lem chaloua müt shuongei phebü tegü thüngdanga kibü yo ka müt che haoen la litikulabü kiteikei.

⁷Baraba nyenan müt che, sangkhu limbo khüpyojinei haoenei müt haitibü aoa khüpyobü dan yoa thüngdanga lapan jinan kiteikei.

⁸Noknyüh angan Pilat to haoei nyishou kümbü tegü haoen shanga kümbula phekei.

⁹Haoei haoen to jongaikei, “Ngei kan la Jihudabü Choba kho litikula kanei maangangda lao?”

¹⁰Aishanga theshoubüei ungshedbü shuongei hao khümbo kukei dogo haoei ngekei.

¹¹Lausikei Baraba ong haoei haoen la nalitikula shanga ungshedbü shuongei noknyüh pühnyintikei.

¹²Pilatei haoen to jongaikei, “Kanei Jihudabü Choba dogo laubou to ngei ai kümtimang sühda?”

¹³Haoenei, “Hao peiseia thüngashi!” dogo ngekyokei.

¹⁴Pilatei haoen to laukei, “Aila, haoei ai amaibü kümbei?” Haoenei aei kaangbou ngekkei, “Hao peiseia thüngashi!”

¹⁵Pilatei noknyüh maang haitimang sühla Baraba litikei, hoba Jisu to lühthepei semtian phaia peiseia thüngla shanga hao khümbo kuan apbei.

¹⁶Sepai shuongei hao governor choba chem khongmang to leian atkei; hoba sepai san pendou ngashaikei.

¹⁷Haoenei hao la nakthüngan sakbü nei neikukei, hoba jakei choba khun che yikan hao la hankukei

¹⁸hoba salem kuko laukei, “Maisho kishi, Jihudabü Choba!”

¹⁹Haoenei haoeibü khu to lijuei setkei hoba hao to eokei thuokkei; hoba haoenei hao thedanga youkükei thungetko lembei.

²⁰Haoenei hao nyikuan phaia, haoenei hao ka nakthüngan sakbü nei kho sungngaikei hoba hao la jembü neisimei neikukei. Haoenei hao peiseia thüngla leilangkei;

²¹hoba haoenei kaonyek ka louko kiteibü danto haübü müt che, Alexander si Rufa bou, Kurinibü Simon la Jisueibü peisei tukosekko petikei.

²²Haoenei Jisu Golgotha, laobou to “Khulo Kaoen” dogo lauda kho kaoen to leibakei;

²³hoba haoenei hao la semlüh ih khauekbü to kheian kukei, lausikei haoei asunglet.

²⁴Haoenei hao peiseia thüngkei, hoba mütpem wekoei ai haülaje dogo phaang pakan chühko haoeibü neisimei haoen yoa jankei.

²⁵Haoenei hao nge- yang angh güa peiseia thüngkei.

²⁶Hao attibü ngüh, “JIHUDABÜ CHOBA” dogo dokei.

²⁷Haoenei hao yoa kokbü müt nyi che haoeibü maenei hoba che nanaenei dogo thüngkei.

²⁸(Hobaje Laishibaei, “Hobaje hao ngühkhüm lulimbü yoa pakyokei” dogo laubü loushedkei.)

²⁹Danbü phaibü shuongei haoeneibü khu yetko hao khulimbo nyikuko laukei, “Akhai dogo! No, lembüchem leilutian chalou semnyeta dangngailabü kho

³⁰peisei ka kaiyena hoba no lulu püetashi!”

³¹Kho tegütham ong thükkabü ungshedbü shuongeikei Ngühkhüm lenbou shuong yoan haoen yoa nyikuko laukei, “Haoei mü püetkei! Hobaje haoei hao lulu püetla athükda.

³²Künei hapan mailemlabü lele, Israelbü Choba, Khrista, tou peisei ka lotashi.” Hobaje hao yoa peiseia thüngbü shuongeikei hao la nyikukei.

³³Ladang chajihbou onkei, angh sem asühshongko kaodak khümbo nakthühei küplepbei.

³⁴Angh sem jiha Jisuei ngüh yaangbüei ngekkei, “Eloi, Eloi, lema sabakthani?”, laobou tetlabü, “Kü Mühghaü, kü Mühghaü, nyi aila ngo apyokei?”

³⁵Ladang nyangko kibü shuongei ditkei, haoenei laukei, “Chühashi, haoei Elija ngada.”

³⁶Cheei langjung hauan, od che haijepbü dei shenko haman, phodong chenei kho lonan, hao la yungla kuko laukei, “Khei phokushi. Elija louyenan hao sungleda saoje senei chühkho.”

³⁷Jisuei kaang ngekkei hoba soushou satkei.

³⁸Hobaje Lembüchema peithetbü nei kui ka kaoa sühko penyila jitnyinkei.

³⁹Ladang hao thedanga loan kibou saongao thükkabouei hao khei haiko hapbei, haoei laukei, “Maimaitham ho müt Mühghaü Shou yinga!”

⁴⁰Hobaje yaksa shuongeikei saabü ka chühko kiteikei. Haoen yoa Mari Magdalin, Jakob nashoubou si Jose nyu Mari, hoba Salome,

⁴¹aoyouei hao Galila kijinei hao phai sembei hoba hao thuikei; hoba lubü yaksa juong hao yoa Jerusalem to loubü haoen yoa yoan kiteikei.

⁴²Ladang chasem sühkei, hoba kho Lamlebü chalou yingsije, khei ngiet kho Nounyet kiteisije,

⁴³Arimathiabü Josef, damanchühbou yaangenbü che, aoei Mühghaü Sangle chüheiko kikei, hao loukei. Hao maang yaangngeian Pilat jungto haukei hoba Jisueibü mang hikei.

⁴⁴Pilatei Jisu haia saima dogo maangpangkei, hoba haoei saongao thükkabou ngaan hao mudonga haiasai dogo phekei.

⁴⁵Ladang Pilatei saongao thükkabou ka khei yingakei dogo ditletkei, haoei Josef la haibü mang kho kukei.

⁴⁶Haoei inyaibü nei jekkei, hoba hao tonletan khonei shokei, hoba laanga haübü hee chenei hao phokei; hoba haoei heekhün thüka laang che tongjung hauan küplepbei.

⁴⁷Hobaje Mari Magdalin si Jose nyu Mariei hao khünshang hapbei.