Read Chang Naga MARK 2 Bible Online

MARK 2 - Chang Naga bible

MARK 2

¹Ladang hao Kapernaum to chalou shijo kian phaia nyibou longeikei, hao chema kia dogo ditkei.

²Hobaje mütshuong juongnyu takshatbü ka koukhüna ongkei haoen ohau, hoba haoei haoen to songlenko kikei.

³Hobaje haoenei tuokshatei shatbü müt che müt leiei lengan hao jungto sungbakei,

⁴hoba mütshang yaangbü ka haoenei müt kho hao jungto asungbaensije haoenei hao kishang chemdak kho wayetkei. Ladang haoenei khün yettikei, haoenei tuokshatei shatbou yepan kibü yepshang kho tonyantikei.

⁵Jisuei haoeneibü mailem hapan shatbou to laukei, “Kü shou, kaibü shabü apbua.”

⁶Lausikei Ngühkhüm lenbou shuong at khünei setan kikei hoba maangpona hai dambei,

⁷“Aila ho mütei ngüh hai angda? Haoei Mühghaü nyikuda. Mühghaü to liman aoei amai apbula thükkei?”

⁸Hobaje haoenei haoeneibü maangpona daman chühyobü Jisuei ngean haoei haoen to laukei, “Aila kanei khübü shanga kaneibü maangpona daman chühda?

⁹Tuokshatei shatbou to, ‘Kaibü shabü apbua’ dogo laula sobou si ‘Laksepashi, hoba kaibü yepshang künashi hoba paiashi’ dogo laula sokei?

¹⁰Lausikei ho kaodaka Müteibü Shou la shabü apbula sei kia dogo ngei kan la lenlabü.” Kheijinei haoei tuokshatei shatbou to laukei,

¹¹“Ngei kato lenda, pienashi, ka yepshang tonenashi hoba chemto ngaiashi.”

¹²Hao pienkei, hao yepshang peenkei hoba haoen pendouei hapbo satkei; khoei pendou maangpangkei hoba Mühghaü la soneikangbü kuko laukei, “Künei ladangkei ho tegü ühüpbei.”

¹³Jisu nyibou yungko to haukei. Mütshang pendou hao jungto loukei hoba haoei haoen la lenkei.

¹⁴Hobaje hao haujinei haoei Alfia shou Levi, khüm heshang chema setan hapbei, hoba haoei hao to laukei, “Kü phai semashi.” Hao loenkei hoba hao phai sembei.

¹⁵Jisu Levi chema shaushang yungshanga setan kikei hoba khüm hebü hoba shabü mütshuong juongnyu hao hoba hao eikshuong yoa setkei. Aishanga kho tegübü mütshuong juongei hao yoa yangkei.

¹⁶Hobaje Ngühkhüm lenbou Farisibü shuong yoa atei hao phai sembei. Hao asaopobü hoba khüm hebü shuong yoa shauko yungko hapan haoeibü eikshuong to laukei, “Aila haoei khüm hebü si asaopobü müt yoa shauda?”

¹⁷Jisuei kho ditkei hoba haoen to laukei, “Ashat anyatbü shuong shanga daktar akhamda, lausikei shatbü shanga kümsilei. Ngo saopobü ngala aying lausikei shabü shuong ngala loukei.”

¹⁸Johaneibü eik si Farisi eikshuong mühei nyengko kikei. Mütshuong louan hao to laukei, “Aila Johan eik si Farisi eikshuongeije mühei nyengda lausikei ka eikshuongei anyengda?”

¹⁹Jisuei haoen to laukei, “Chemkanbou haoen yoa kijinei chemkanbou thangbou shuongei mühei nyengla thükkei sai? Chemkanbou haoen yoa ki shongko haoenei nyengla athük.

²⁰Lausikei haoen yo ka chemkanbou ngailanglabü jihsiphai che sühlanglabü; kho phaia haoenei nyenglabü.

²¹Aoeikei nei haanbü neisimei hangbüa athipda; khei kümsije nei haanbü khoei hangbü ka jitlangda, hoba khoei thipmo aei amaibou yeitida.

²²Hobaje aoeikei ih haanbü phekhon shongmok hangbüa atakda; khei kümsije ih khoei phekhon shongmok kho thalabü, hoba ih si phekhon ham mauto janlabü. Ih haanbü phekhon shongmok haanbüa takda.”

²³Nounyet hao whet laak danko paiko kiteikei, hoba hao eikshuongei dantoyoko youman yetkei.

²⁴Farisi shuongei hao to laukei, “Haoen to chühshi! Aila haoenei Nounyet ngühkhüm tuda?”

²⁵Haoei haoen to laukei, “Dawid hoba hao yoa kibü shuong khamjinei, hoba mühei haijinei, haoei ai jungeikei, kanei ladangkei wean achüh lo?

²⁶Abiathar thükkabou ungshedbou kijinei hao Mühghaü Chem to atkei, hoba Mühghaü thedanga phobü Wentek, laobou ungshedbou to liman lubüei shaujan aying, kho shaukei hoba hao yokabü shuonglakei kukei.”

²⁷Jisuei haoen to laukei, “Nounyet kho müt shanga kümbei hoba Nounyet shanga müt aküm.

²⁸Hibü Müteibü Shou kho Nounyetkei Bunyubou ki.”