Read Chang Naga LUK 1 Bible Online

LUK 1 - Chang Naga bible

LUK 1

¹Sanoubü Theofila: Ngühlangmaibüeibü dambü shuong hoba shaangbü nyekei hapbü aukabü shuong kün la kubü tegü,

²haüthükbü kho dola shanga kün yoa müt juongei haoenei sühlangbü maibouthamei haujemyoa.

³Kho tegü büngbü khangbü ka thama ngei habü pendou ho shangashatan ki yingsije, ngeikei ho ka shanga thenkei thenko dokula maikei dogo damenkei,

⁴khei nyi ditletbü ngühlang habü ho ngühmaang hoba tükdebü dogo nyi chongchingla shanga.

⁵Jihuda Choba, Herod chaloua Abija mütli kabü ungshedbou müt che Zekharia dogo nyenan kikei. Haoyak kho Aron phang ka; saoeibü nyen Elizabet kikei.

⁶Haosi ham Mühghaü thedanga saopobü ngühkhüm hoba Bunyubouei lenbü pendou amaashikko jungeibü mütshuong kiteikei.

⁷Lausikei haosi shousi akitei; aieilausi Elizabeth kho angkongbü, hoba ham jaile noulebü ong yingan kiteikei.

⁸Ungshedbü hangeilamei ho Zekhariaeibü then yingan kiteikei, hoba hao Mühghaü junga ungshedbü kümsilei kümbo kikei; kheijinei Bunyuboueibü saopobü lemshona jenjuok-ponlem lemla shanga phaang lebü kho hao la shatkei.

⁹

¹⁰Kho jenjuok-ponlem lembü jiha mütshuong pendou khonga welauko kiteikei.

¹¹Kheijinei hao la Bunyuboueibü khuthük hangangbü che jenjuok-ponlem lemshanga mae aenei loan longan lenkei.

¹²Zekhariaei ladang kho hapbei hao mokkei hoba hatbüei shenkei.

¹³Lausikei khuthük hangangbüei hao to laukei, “Zekharia, tehüt; kaibü welau kho dida. Kayak Elizabetei kala bousu shou che bukkulabü, hoba nyi hao la Johan nyenkulabü;

¹⁴nyi olinbü hoba maanghaibü haplabü, hoba hao bukbüei müt juong olinyolabü.

¹⁵“Aishanga hao Bunyubou thedanga yaangbü che yinglabü, haoei ih ayingsi jaaklabü ai ayunglabü, hao kho bukjineithama Soushou Saopobüei shenan kilabü,

¹⁶hoba haoei Israelbü juong haoeneibü Bunyubou Mühghaü jungto sepeitilabü.

¹⁷Bousi shuongeibü maangpon shousi shuongeibü la yeiko hoba ngüha alebü shuong saopobü to, dogo sepeitila shanga, hoba Bunyubou shanga khümbomeiko lamlean kiteilabü lele mütli che lamlela shanga hao Elijaeibü soushou hoba sei bauan Mühghaü thedanga hauteilabü.”

¹⁸Zekhariaei hangangbü to laukei, “Ngei ho lai küman ngela? Ngo baushi yingkei hoba küyakkei po juong noulebü ki.”

¹⁹Hangangbüei hao to jongaikei, “Ngo Mühghaü junga lobou Gabriel ki. Ngo ka to joyola hoba ka la ngühlang maibü kula hautikei.

²⁰Kü to ditashi! Kho chalou asühshongko no ngüh angla athükko aplabü, aishanga tetenbü chaloua loushadlabü shanga ngei lenbü khübü ngüh to nyi maialem.”

²¹Mütshuong pendouei Zekharia chüheiko kikei hoba hao lemshang ka lounyu alongbü khoei haoen maangpangko kikei.

²²Ladang hao longkei hao ngühangla athükko kikei hoba haoenei haoei lemshanga mangsang cheje hapan kilabü dogo damenkei. Haoei haoen la shuokenlabü lele ong lenkei hoba haoje ngouyoyo khüpbei.

²³Hobaje ladang haoeibü khangenbü then kho wankei hao chemto ngaikei.

²⁴Kho phaia haoyak Elizabetei shia na künkei, hoba saoei lit ngao sühko sao lolo hai laungaiko haukei,

²⁵“Ho Bunyubouei kü shanga kümbubü kho ki! Touje haoei kü to maangshikko chühngaia hoba mütshuong yoka ngeibü himou langkua.”

²⁶Lit lakboua Mühghaü ka Gabriel hangangbü kho Galil kabü Nazaret dogo nyenbü sangnyu che to,

²⁷Dawid mütli kabü Josef nyenbou bousu cheei kanan kibü saosüngbü medei che jungto hautikei. Medeieibü nyen kho Mari.

²⁸Hao atkei hoba sao to laukei, “Salem, maangshiknyutham! Bunyubou ka yoa kia.”

²⁹Kho ngühei sao maangphanga aeibou mokkei, hoba kho salem ngüh kho ai tetlabü yingla dogo dameiko kikei.

³⁰Kheijinei hangangbüei sao to laukei, “Tehüt, Mari, no Mühghaü junga maangshiknyu.

³¹Nyi na che künlabü hoba bousu shou che buklabü hoba nyi hao la Jisu nyenkulabü.

³²Hao yaangenlabü, hao to Thükkaboueibü Shou dogo laulabü, hoba Bunyubou Mühghaüei hao la haobou Dawideibü choba setshang kulabü.

³³Haoei Jakob chemdanga ponpen shanga songdaklabü; hoba haoeibü songdak khünei thon akilabü.”

³⁴Lausikei Mariei hao to laukei, “Ho lalokche kian phaia, aieilausi ngo mo chem akankei?”

³⁵Hangangbüei sao to jongaikei, “Soushou Saopobü ka thükto lotlabü hoba Thükkabou khoei no khuileplabü. Kho danko bukla kibou na khüto Mühghaü Shou dogo nyenlabü,

³⁶tokei ka chempen Elizabeteikei sao nou lean phaia, angkongnyu dogo laubou sao khoeikei tou hoei lit lakbou bousu shou che shia künakei;

³⁷aishanga Mühghaü shanga athükaminlabü ai aki.”

³⁸Mariei laukei, “Ngo Bunyuboueibü samnyu; kü to nyi laubü tegü yingshi.” Kheijinei hangangbüei sao apyoan satkei.

³⁹Kheijinei Mari aeibou panteiko shongh kaodak kabü sangnyu Judea to haukei.

⁴⁰Sao Zekharia chem to haukei hoba Elizabet to salem ngüh joyokei.

⁴¹Ladang Elizabetei Marieibü salem ngüh ditkei na kho olinbü ka saoeibü shia saiyeikei, hoba sao kho Soushou Saopobüei shenkei.

⁴²Saoei ngüh kaangbüei ngekko laukei, “Yaksa pendou yoa maangshiknyu yingshi, hoba kaibü shi kabü hek kho haülabou yingshi.

⁴³Ngeibü Bunyuboueibü nyu kü jungto loulabü lele lai kü la haüthükkei?

⁴⁴Aishanga kaibü salem ngüh ngeibü noukhün to lotjinei naei olinbü ka ngeibü shia saiyeida.

⁴⁵Bunyuboueibü ngüh kho sao to yinglabü dogo aoei mailembei, sao kho olinbou.”

⁴⁶Hobaje Mariei laukei, “Ngeibü soushouei Bunyubou yaangenbü tang khittida,

⁴⁷hoba ngeibü soushou ngeibü Mühghaü, ngo khümenbou to olinda;

⁴⁸aishanga haoei samnyu to phangkabü thua kijinei maangshikko chüha. Tou ka jaüan meten pendouei kü tohaünyu dogo laulabü,

⁴⁹aishanga Thükenbouei kü to kümsilei yaang küma.Haoeibü nyen kho Saopobü,

⁵⁰hoba haoei hao to soumo hatbü shuong to meten meten sühko onou lenda.

⁵¹Haoei haoeibü phakei hau kiko kümena; haoei lulueibü maangpona liliko dambü shuong lintia.

⁵²Haoei songdakbü shuong lulueibü choba setshang ka sungyana, hoba haoei phangkabü shuong thük to tonena.

⁵³Haoei mühbünoubü shuong maibüei phottia, hoba haoei keibü yaangbü shuong ikkong ngaitia.

⁵⁴Haoei seneibü bousi shuong la thekubü tegü hao haoeibü sambü Israel to thuila loua; haoei Abraham jungto hoba haoeibü thensilen to thon akibü onou shanga dambuko kiteia.”

⁵⁵

⁵⁶Mari Elizabet yoa lit sem thüng thüngkei hoba chem to ngaikei.

⁵⁷Elizabeteibü jih sühkei hoba saoei bousu shou che bukkei.

⁵⁸Saoeibü lepbü shuong hoba chempen shuongei Bunyubouei sao to onou yaang lenbü ditkei hoba haoenei sao to liko olinyokei.

⁵⁹Hobaje sembounyet haoenei hao la kipbumang sühkei hoba haoenei hao la haoboueibü nyenphaito Zekharia dogo nyenkumang sühkei.

⁶⁰Lausikei haonyuei laukei, “Aying, hao Johan nyenlabü.”

⁶¹Haoenei sao to laukei, “Kan chempen aokei khei nyenbüje aki.”

⁶²Haoenei haobou to haoei hao la ai ngenkumang sühdaje shuokenlabü lele phekei.

⁶³Haoei dojin hikei hoba haoeibü nyen “Johan” dogo dokei. Kheijinei pendou maang- pangkei.

⁶⁴Mangde ong haoeibü ngühang longeikei hoba haoei atoknokko Mühghaü nyen sangko joyokei.

⁶⁵Lepbü shuong pendou hatko yeikei, hoba Judea shongh kaodak pendoua mütshuongei habü haüthükbü shangabü lau- yokei.

⁶⁶Kho ditbü shuong mütpem wekoei lulueibü maang- phanga hai lauko thankei, “Ho nashou hoei ailaibü müt la yeilama lo?” Aishanga maimaitham Bunyuboueibü ik hao thüka kiteikei.

⁶⁷Haobou Zekharia Soushou Saopobüei shenkei hoba hai tetenko laula khangkei,

⁶⁸“Israel Mühghaü Bunyubou sangashi, aishanga haoei hao mütli pean chühkei hoba haoen püetkei.

⁶⁹Haoei sen shanga haoeibü sambü Dawid chemdang ka Khümenbou che longtia.

⁷⁰(Kho haoei shangiednyu haoeibü saopobü thuseibü shuong danko thekuakei.)

⁷¹Haoei sen dangbou ka hoba sen to mangsenbü shuong ikmang ka khümenlabü.

⁷²Hobaje ho seneibü bousi shuong to lenbü onou haüthüktila hoba haoeibü saopobü thesilan damentila shanga kümbei.

⁷³Hobaje seneibü bou Abraham to theyolanyobü,

⁷⁴laobou seneibü dangbou ikmang ka khümenla hoba seneibü langkei sünga saopobü si tangshaibüa ai ühütko hao khangenla thüktila shanga haoei kho kümbei.

⁷⁵

⁷⁶No, nashoukei, Thükkaboueibü thuseibü dogo nyenlabü, aishanga no haoeibü lam lamlela shanga Bunyubou thedangto hauteilabü.

⁷⁷Seneibü Mühghaüei haoeibü maanglemenbü hoba sanoubüa haoeneibü shabü lai apbuda kho lenko hao mütli la khümenbü phinthonkulabü.

⁷⁸Kho tegü thük ka changeei nakthühbü hoba haibü yeme phanga setan kibü shuong la kho ngesak longbü ngetila shanga hoba sangmai to seneibü youyaü leila shanga sen pheian chühlabü.”

⁷⁹

⁸⁰Na kho chingkei hoba soushoua hau kiko yeikei. Hobaje Israel la khümbo kuko longan lenbü chalou asühshongko hao kho yamlamanga ong kiteikei.