Read Chang Naga LUK 12 Bible Online

LUK 12 - Chang Naga bible

LUK 12

¹Kho jiha, ladang mütshang hajar juong you thüka youei nakyoko onshaikei, haoei shaangla hao eikshuong to joyoko laukei, “Kanei Farisibü shuong hibüyoubü tokai to maangsangashi.

²Tang akhitlabü lele aikei küplepan aki hoba angelabü lele huan aki;

³aishanga kanei nakthüha ai ong laua kho ngesakbüa ditlabü, hoba kanei maangkabou popchem ka hakphangshoua laubü pendou chemdaka ngeklabü.

⁴“Kü thangbou shuong, ngei kan la lenda, aoyouei mang haitida, hoba khüto liman haoenei ai akümenlabü, haoen to tehüt.

⁵Ao to hatjan yingkei ngei kan to lenkho; haitian phaiakei molowan to jinlabü hau kibou Mühghaü to hatashi. Haü, ngei kan to lenda, hao to hatashi.

⁶Aunyingshishou pem ngao poisa nyi lu ayaakda lo? Kheinyu yingankei Mühghaü jungaje khübü aunyingshishou che ongkei awemaukei.

⁷Kaneibü khu kabü khulou mangkei weenakei. Tehüt; aunyingshishou juong to kei kan mu kibou.

⁸“Ngei kan to lauda: Aoyouei müt thedanga ngo theletlaje Müteibü Shouei Mühghaü khuthük hangangbü thedanga hao theletlabü.

⁹Lausikei aoei müt thedanga ngo atheletlaje, Mühghaü khuthük hangangbü thedanga hao asungletlabü.

¹⁰Aoei Müteibü Shou khulimbo laulaje hao la amai apbulabü, lausikei aoei Soushou Saopobü nyikubü ngüh laulaje kho hao la üpbulabü.

¹¹Haoenei ladang kan sinagog hoba songdakbü si khuleibü shuong thedangto leibalaje, kanei ailai jongaila ayingsi laula maang temau,

¹²aishanga kheijineitham kanei ai laula kho Soushou Saopobüei kan la lenlabü.”

¹³Noknyüh yo ka müt cheei hao to laukei, “Lenbou, küjai to küneibü phet kü to janyoashi dogo lenkukai.”

¹⁴Haoei hao to laukei, “Thangbou, aoei ngo kan thüka matjembou ayingsi janyinbou yeitikei?”

¹⁵Haoei haoen to laukei, “Maangsangashi, aeilam aeiphop phang pendou ka kan lolo senetashi, aieilausi müt cheei nyaksinam juong kibüa jembü langkei akida.”

¹⁶Haoei haoen la ngühphatbü che lenkei: “Keibü müt cheei hao sek ka nyak juongnyu künkei.

¹⁷Haoei jembü lolo maangpona laukei, ‘Ngei ai kümla? Ngei kü nyak thanla bung aki.’

¹⁸Haoei laukei, ‘Ngei ho kümlabü, ngei kü bung panlabü hoba yaangshangbou danglabü, hoba khonei kü nyak hoba peisilei pendou thanlabü;

¹⁹hoba ngei ngo lolo laungailabü: Nyi po juongnyu shanga nyaksinam juong thanshaiakei. Haksoashi, shauashi, yungashi hoba olinko kishi.’

²⁰Lausikei Mühghaüei hao to laukei, ‘Ngoubü, tautham ka langkei ka ka ngailanglabü. Nyi lamlebü nyaksinam pendou aoeibü yingla?’

²¹Hibü aoei jembü shanga nyaksinam juongnyu tanshaida hoba Mühghaü aedanga keibü aying, hao kho müt phatkei.”

²²Haoei eikshuong to laukei, “Khoei ngei kan to lenda, kanei langkei shanga kanei ai shaula, ayingsi kaneibü manga ai neila, maang temau.

²³Langkei kho shausiyung to khaibou, hoba neisimei to mang khaibou ki.

²⁴Aukhomakmak shuong shangabü daman chühashi; haoenei awenda; haoenei thanshang ayingsi bung aki; yingasikei Mühghaüei haoen samda: Aushuong to kan latetche khaibou ki!

²⁵Kan yoa aoei dameibüei haoeibü thong to iknop che jinyola thükla?

²⁶Kanei kho kümsilei hanbü athük longa aila lubü joubü shangabü maangmauda?

²⁷Leilang khüpbong lai haangda daman- chühashi; haoenei akümaleida, haoenei lei ashikda, lausikei ngei kan to lenda, Solomon hao soneikangbü pendoua habü che phatko alamle.

²⁸Hansho ong mailembü mütshuong, ai yambabü sang tat kida hoba ngiet wanlong to jinlabü ki, khübü la Mühghaüei hele hainyu lekuda longaje, haoei khüto liman kan la aletilep lo!

²⁹Kanei ai shaula hoba ai yungla dogo maangmauko adamjan.

³⁰Khübü kho küksithang mütshuongei lamda; lausikei kan shanga khübü pendou kanei khamda dogo kaneibü Bouei ngeakei.

³¹Aeiko haoeibü Sangle lamashi, hoba khübü kho kan la jinyokulabü.

³²“Tehüt, tan hanbou; aishanga kan la Sangle kho kula kaneibü Bouei maanganga.

³³“Kan kibü yakashi, hoba amlang kuashi. ühangbü namphot khuthüka thon akibü nyaksinam lao to kokbü anyangda ayingsi phetei aleilutida, kheibü namphot kanei jembü shanga lamleashi.

³⁴Aishanga lanei kaneibü nyaksinam ki khünei kaneibü maangponkei kilabü.

³⁵“Kaneibü shembenei homashi, hoba kaneibü wanthung jikan kiashi;

³⁶hoba ladang mütshuongei haoeneibü bunyu chemkan lem ka longeian kuokeida, kheijinei haoenei phühde hao la ipbulabü shanga lamlean kiteibü tegü kishi.

³⁷Sambü shuong aoyouei bunyu loujinei lombo kian hapda haoen olinbou. Ngei kan to ngühmaia lenkho, haoei jembü lolo shembei kailabü, haoen shaushang yungshanga settilabü hoba louan haoen khangenlabü.

³⁸Hao metuphanga ayingsi ngeyang ete loua longa, hoba haoen khei hapsije, khübü sambü shuong olinbou.

³⁹Lausikei ho ngeashi, bunyuei ai jiha kokbü loula kho ngekei tegüje haoei lombo kikhoulabü, hoba haoei hao chem tekhuokyettikhoulabü.

⁴⁰Kankei lamlean kishi, aieilausi nyi adambü jihsiphai chenei Müteibü Shou loulabü.”

⁴¹Peterei laukei, “Bunyubou, ho ngühphatbü nyi kün to lenda si, müt pendou shanga lenda?”

⁴²Jisuei laukei, “Bunyuei hao sambü shuong la haoen phejan shausiyung phokula shanga haoen thüka ikjai letilabü maanglemenbü hoba songsido kibü sambü ao yingkeije kü la lenbü.

⁴³Haoeibü bunyu loujinei sambü aoei khei kümbo haplaje hao olinbou.

⁴⁴Ngei kan to maimaitham lenda haoei haoeibü peisilei pendou thüka hao ikjai letilabü.

⁴⁵Lausikei ao sambüei hao lolo maangpona, ‘Kü bunyu loula phaida’ dogo damda hoba sambü si sambü sao shuong ngümeila khangda, hoba shauda, yungda hoba ihei jaakda,

⁴⁶haoei adambü chalou hoba angebü jihsiphai chenei samboueibü bunyu kho loulabü, hoba hao tekan aplabü, hoba hao la maang alemenbü dan yoa phejan haptilabü.

⁴⁷“Sambü aoei haoeibü bunyuei maangangbü ngean alamle, ayingsi haoei maang- angbü tegü aküm, haoei ong ikok juong hapshaulabü;

⁴⁸lausikei aoei bunyu maangangbü ange, hoba ikok hapshaula muko kümenkei, haoei ikok shibou hapshaulabü. Ao la juong kukei hao ka juong hilabü; hoba ao ika haoei juong thanan phokukei, hao ka aei juongbou hilabü.

⁴⁹“Ngo kaodak to wan longtikula loukei, hoba kho longan apan kikei tegüje lai maikhoulabü!

⁵⁰Ngo baptibü cheei baptijan, hoba awanshongko ngo lai khonkuda!

⁵¹Kanei ngo kaodak to sangmai sungbala loukei dogo damda lo? Ngei kan to lenda, aying, lausikei janyinbü longtila bouje loukei!

⁵²Tou ka jaüan chemdang chenei ngao kialonga semei nyi hoba nyiei sem khulimbo janyinbü longlabü;

⁵³bouei shou khulimbo hoba shouei bou khulimbo; nyuei nouyangshou khulimbo hoba nouyangshouei nyu khulimbo; laoeibü nyuei shoueibü yak khulimbo hoba yakei laoeibü nyu khulimbo janyinbü longlabü.”

⁵⁴Hobaje noknyüh to haoei laukei, “Ladang kanei chanep aenei sangmei shangan haplaje, kanei phühde, ‘Lang loula kümda’ dogo lauda, hoba khei loushatda.

⁵⁵Hobaje ladang kanei yungthang aenei yei soubü haplaje, ‘Ho lemala kümda’ dogo kanei lauda, hoba kho loushatda.

⁵⁶Hibüyoubü dan, kanei kaodak si mühnyu haang lenenda; lausikei kanei lai toubü jihsiphai lenenla angeda?

⁵⁷“Ai tükdebü ki kho aila kan lolo matjem akuenda?

⁵⁸Aishanga no matbubou to matjemla haujinei lamoua nyi hao to jilaphaila haujemashi. Khei ayinglonga haoei no matjembou ik to leian jinkulabü hoba matjembouei no thüngbou ik maangto khümbo kulabü, hoba thüngbouei no thüngdang to jinlabü.

⁵⁹Ngei kan to lenda, nyi thonbou poisa che ashemphem shongko no khüka alonglabü.”