Read Chang Naga LUK 13 Bible Online

LUK 13 - Chang Naga bible

LUK 13

¹Kheijineitham müt at loukei hoba Galilbü at haoeneibü lembü kuko kian Pilatei haitibü shangabü Jisu la lenkei.

²Haoei haoen to jongaikei, “Khübü Galilbü kheinyu khonsaktisi, Galilbü pendou to haoen shabü aei jungeibü shuong dogo kanei damda lo?

³Ngei lauda, aying; lausikei kan maangpon asepei longa kankei pendou haoen tegü shemlabü.

⁴Ayingsi Siloama lapheishon laangshon tuongbüei müt anthükset haitisi, Jerusalema kibü pendou to haoen shedbü aei shonbü shuong dogo kanei damda lo?

⁵Ngei lauda, aying; lausikei kan maangpon asepei longa kankei pendou haoen tegü shemlabü.”

⁶Haoei haoen la ho ngühphatbü lenkei: “Müt cheei haoeibü semlühlaaka bhuklong che kekei, hoba hao loukei hoba mai lambei lausikei aikei akitei.

⁷Haoei semlühlaak moubou to laukei, ‘Chü- hashi, tou po sem sühko ngei ho bhuklong ka mai lambo louda, lausikei ai ühüpda. Ho akan koutiashi. Hoei aila kaomai letila?’

⁸Lausikei haoei hao to jongaikei, ‘Yaangbou, toupo shangakei khei phoyoashi. Ngei chungthem kaijembo kao thuan kaomai jinkho.

⁹Hoei ngiempo mai heksije thumaibou, lausikei ehek longa chengan koutishima.’”

¹⁰Nounyet hao sinagog chenei songlenko kikei.

¹¹Khünei yaksa che po anthükset athükaminbü soushou kiteikei; sao komattham kikei hoba ai jihdangakei shingan achüh.

¹²Ladang Jisuei sao hapbei haoei sao hao jungto ngakei hoba sao to laukei, “Yaksa, kaibü athükamin ka no senglitia”;

¹³hoba haoei sao to hatkei. Kheijinei sao phühde tangshaitham loenkei hoba Mühghaü la soneikangbü kula khangkei.

¹⁴Jisuei Nounyet maitisije, sinagog bunyuei khau angko shuong to laukei, “Kümlaleila shanga chalou lak kia; hibü Nounyet ayingko khübü chaloua louashi hoba maitikuashi.”

¹⁵Jisuei hao to jongaiko laukei, “Hibüyoubü shuong, kan pendouei Nounyet kaneibü masu ayingsi gadu nyaishang ukhong ka sengletan dei inla shanga leian ohauda lo?

¹⁶Hobaje ho sao Abraham nouyangshou yingsije hoba Satanei po anthükset sühko khühan kisije kho khühbü ka sao Nounyet sengkulabü janbü aying lo?”

¹⁷Haoei laujinei haoeibü dangbou pendou himou bautikei hoba noknyüh pendou hao soneikangbü kümsileiei olinyokei.

¹⁸Haoei laukei, “Mühghaü Sangle ai phatkei, hoba ngei ho ai to takteiyola?

¹⁹Ho müt cheei haoeibü bamanga yongkoshik lang sungjung hauan phinbü phatkei; ho chingkei hoba bunyu la yeikei, hoba mühkabü aushuong kho bheka laangkei.”

²⁰Toukei haoei laukei, “Ngei Mühghaü Sangle ai to takteiyola?

²¹Ho yaksa cheei tokai sungan wenchak sema totan pendou pujung along shongko phobü phatkei.”

²²Hao Jerusalem to haujinei sangnyu sangshou pendoua songlenko dankei.

²³Hobaje müt cheei hao to laukei, “Yaangbou, khümenbü shuong shijo ong si ai?”

²⁴Haoei haoen to laukei, “Koukhün nyonyembü to atla aeibou haujemashi, aishanga ngei kan to lenda, juongnyuei atla aeibou haujemlabü lausikei athüklabü.

²⁵Chem bunyu che laksepan kou khinngailanga longa, hoba kanei tangaenei, ‘Yaangbou, kün la ipbu’ dogo lauko kuokeiasikei haoei ‘Ngei kan angekei; kan laka loukei?’ dogo haoei jongailabü.

²⁶Kheijinei kanei laulabü, ‘Kün ka yoa shaukei yungkei hoba nyi kün la khongnyua songlenkei.’

²⁷Lausikei haoei kan to laulabü, ‘Ngei kan angekei; kan laka loukei? Kan amaibü kümbü shuong pendou kü jungka kukashi.’

²⁸Mühghaü Sanglea kanei Abraham hoba Isak hoba Jakob hoba thuseibü shuong pendou haplabü lausikei ladang kanje nongbüa tekan apan haplaje kheijinei haapyobü hoba hauh uyobü kilabü.

²⁹Chaang hoba chanep ka, yungkük hoba yungthang ka mütshuong loulabü hoba Mühghaü Sangle lema yolabü.

³⁰Maimaitham, phaibü shuong shaanglabü, hoba shaangbü shuong phailabü.”

³¹Kho jihsiphaia Farisibü at hao jungto loukei hoba laukei, “Haka satan apashi hoba wakou meimeiashi. Herodei no haitimang sühda.”

³²Haoei haoen to laukei, “Hauashi, hoba kho selong to lenashi, ‘Tat si ngiet ngei shabü sou shuong shian sattida hoba mütshuong maitikuda, hoba sembounyet ngei ngeibü kümsilei wanlabü.’

³³Lankei, tat hoba ngiet hoba jenyet ngo ngeibü wakou haulabü, aieilausi thuseibü che kho Jerusalem to liman lubünei amaujan.

³⁴“O Jerusalem, Jerusalem, thuseibü shuong haitibü, hoba ka jungto hautibü shuong laangei sonettibou, aunyuei jembü shou kakphanga leisheian paklepbü tegü, ngei ladüngnei ka shousi shuong leisheimang sühkei, lausikei kanei maang üang!

³⁵Chühashi, kaneibü chem kan la litham apyokulabü. Ngei kan to lenda, kanei ‘Bunyubou nyena ao louda, Hao haübou’, dogo alau shongko kanei ngo ühüplabü.”