Read Chang Naga LUK 14 Bible Online

LUK 14 - Chang Naga bible

LUK 14

¹Nounyet hao Farisibü songdakbü chem che to shaula yungla haukei, hoba haoenei hao lombo kikei.

²Hao thedanga mang pokko shatbü müt che kiteikei.

³Jisuei Ngühkhüm lenbou shuong si Farisibü shuong to laukei, “Nounyet maitijan si amaitijan?”

⁴Lausikei haoenei ngüh üang. Haoei hao to hatan maitikukei, hoba ngaitikei.

⁵Haoei haoen to laukei, “Kan yoa jembü gadu ayingsi masu deikhüna atetan kisi tongde Nounyetje hao asenenlabü ao ki?”

⁶Lausikei haoenei kho ajongaien.

⁷Ladang haoei ngabü shuongei thükkabü setshang ong piko hapbei, haoei khübü shuong to ngühphatbü che lenkei,

⁸“Ladang no müt cheei chemkanlem to ngada, thükkabou setshanga teset. Aingenyu lembubouei ka thükkabü yen che chian kialonga,

⁹no ngabou haosi ham louan, ‘Hao la ho setshang kuashi’, dogo laua longa, himou bauan no phangkabou setshang to ngaila meimeilabü.

¹⁰Lausikei ladang no ngadaje hauan thonbou setshanga setashi, hoba ladang no ngabou kho loulaje haoei kato, ‘Thangbou, thükaeto kaiyanga’, dogo laulabü. Kheijinei shaushang yungshanga setbü shuong pendou thedanga no soumo kilabü;

¹¹aishanga aoyouei jembü lolo yaangenlaje hao hanboula yeilabü hoba aoyouei jembü lolo hanbüla yeilaje hao tonenlabü.”

¹²Haoei chembubou to laukei, “Ladang nyi lem oknyinda kaibü jenabou yingasikei, kaibü jaisina yingasikei, ka chempen yingasikei ayingsi kaibü keibü lepbou yingasikei tenga. Haoenei no ngangaian kala shemngailabü.

¹³Lausikei ladang nyi oknyinda, shale jonglebü, yousi iksibü, sokebü hoba nyekthubü ngaashi;

¹⁴hoba no olinlabü, aieilausi haoenei kala kungaila athük; aishanga saopobü shuong langngaijinei nyi ku hapmailabü.”

¹⁵Ladang hao yoa shaushanga setbü shuong yoa cheei khübü ditkei haoei hao to laukei, “Aoei Mühghaü Sangle lema shauoula hao olinbou!”

¹⁶Jisuei hao to laukei, “Müt cheei lem yaang huiletkei hoba müt juong ngaishaikei.

¹⁷Shaulabü jihsiphaia haoei haoeibü sambü lem to chibü shuong ngala hautiko laukei, ‘Kaiya, aishanga tou ajanjan pendou lamleakei.’

¹⁸Lausikei haoen pendouei maangpon chela lean ap hila khangkei. Shaangbouei hao to laukei, ‘Ngei sek che jekakei hoba ngo khüto haula khamda. Sanoudaman kü la amai apbushi.’

¹⁹Lubüei laukei, ‘Ngei sek shapla shanga masu tang ngao jekakei hoba ngo haoen takteila hauda. Sanoudaman kü la amai apbushi.’

²⁰Lubüei laukei, ‘Ngo tou ong chem kanakei, khoei ngo alouenlabü.’

²¹Sambü kho longeian haoeibü bunyu la khübü lenkei. Kheijinei chem bunyu khau angko hao sambü to lenkei, ‘Sangnyu khongyaang hoba khong to hali hauashi, hoba shale jongle hoba, yousi iksibü, nyekthubü hoba sokebü hato leiba.’

²²Sambüei laukei, ‘Yaangbou, nyi sakkubü tegü küma, hoba tokei setshang jouakei.’

²³Bunyuei sambü to laukei, ‘Pühlam si wakou haang to hauan kü chem shentilabü lele haoen leiyetashi.

²⁴Ngei kan to lenda, ngei lem to chibü shuong ka aoeikei ngeibü lem ka ajeplabü.’ ”

²⁵Mütshang yaang hao yoa haukei, hoba haoei sepeian chühngaian haoen to laukei,

²⁶“Ao kü jungto louda hoba haobou hoba nyu hoba yak hoba shousi shuong hoba jaisina, hoba nousina, hoba jembü mangkei amangsenda, hao ngeibü eik ayeien.

²⁷Aoei haoeibü peisei apeda hoba kü phai alouda hao ngeibü eik ayeien.

²⁸Aishanga kan yoa laobou mütei laangshon lapheishon yaümang sühda, kho yeila shanga nam souko kiasi aki dogo shaang setan haoei aplabü wean achühda lo?

²⁹Aishanga haoei keshang khangan phoan wanla athükko apalonga chühbü shuongei hao la nyikuko aweasüngko

³⁰laulabü, ‘Ho mütei yaüla khangkei lausikei wantila athüklangko apakei.’

³¹Ayingsi laobou chobaei lubü choba khulimbo wapyola haujinei lakjaibü hajar anei hao khulimbo hajar saoche leibabü to shuokyola thüklasi athükla dogo shaang setan daman achühda lo?

³²Khei ayinglonga haoei athüksije, lubü choba mü kaoen heebüa kijineithama haoei toukei youkobü hautiko sangmei shanga phelabü.

³³Kho tegütham, kan yoa aoei haoei kibü pendou üpyolaje hao ngeibü eik ayeien.

³⁴“Jem maiakei; lausikei jemkei teibü mauan apalonga aiei teitila?

³⁵Ho kao si od apshang ham shanga lejim aki. Haoenei kho hakan apda. Ao noukhün yetkei haoei ditashi.”