Read Chang Naga LUK 15 Bible Online

LUK 15 - Chang Naga bible

LUK 15

¹Khüm hebü shuong hoba asaopobü mütshuong pendou hao ngüh ditla hao jungto nyangko louko kikei.

²Farisibü shuong hoba Ngühkhüm lenbou shuong nyamnyamyoko laukei, “Ho mütei shabü shuong sungletda hoba haoen yoa shauda yungda.”

³Lausikei haoei haoen la ho ngühphatbü lenkei:

⁴“Tetlabüei kan yoa müt cheei sanlon saongao kiteikei hoba khüka che maukei. Khülonga haoei anjinngao to gü kho ushia apyoan maubou che kho ühüpshongko lamla ohauda lo?

⁵Ladang haoei kho hapda haoei olinko phaka tonda hoba chem to longeida.

⁶Hobaje haoei olinko haoeibü jenabou si lepbü shuong ngada hoba haoei haoen to lauda, ‘Kü yoa olinyokai! Ngei kü san maubou kho hapmeiakei.’

⁷Ngei kan to lenda kho tegü maangpon sepeila akhambü saopobü müt anjinngao to gü toje maangpon sepeibü shabü müt cheei khuthüka aei olinbou yinglabü.

⁸“Ayingsi tetlabüei yaksa cheei chandinam an ka che mautikei. Khülonga saoei hantin sapan kho ühüpshongko maangsangko alamda lo?

⁹Ladang saoei kho hapda saoei saoeibü nounanyu si lepbü shuong chela ngashaida hoba lauda, ‘Kü yoa olinyokai. Ngei ngei mautibü chandinam kho hapmeia.’

¹⁰Ngei kan to lenda, kho tegü maangpon sepeibü shabü müt cheei Mühghaüeibü khuthük hangangbü shuong yoa olinbü ki.”

¹¹Haoei laukei, “Müt cheei bousu shou nyi kikei.

¹²Haosi yoa nashoubouei bou to laukei, ‘Abou, peisilei yoka ngei haplabü phejan kü la kubü’; hoba haoei haoeibü nyaksinam haosi la jankukei.

¹³Chalou shijo danan phaia shou nashoubouei haoeibü peisilei pendou takshatkei hoba usa kaonyek to wakou satkei; khünei hao haoeibü nyaksinam pendou saangkhümbo apsilebü langkeia kikei.

¹⁴Ladang haoei nyaksinam khümbo meikei, kheijinei kho kaonyek pendoua mühsinou yaang longkei, hoba hao aicheküman shale phambei.

¹⁵Hibü hao haukei hoba kho kaonyek kabü müt che yoa homatlangkei, hoba hao khongthu to uk lomla hautikei.

¹⁶Haoei shi shentila shanga uk la okbü kaopak khop nyaimang sühkei, lausikei aoeikei hao la ai aku.

¹⁷Lausikei ladang hao maia phambo loukei haoei laukei, ‘Kübou yoa mulebü shuong lajuche shausiyung shauankei jouko ki, lausikei ngoje hanei nyakmühei haida!

¹⁸Ngo meimeijung kübou jungto ngailabü, hoba ngei hao to laulabü: Abou, ngei khuthük khulimbo hoba kathedanga shabü shona,

¹⁹hoba ngo touje kashou dogo laula amukei. Ngo kaibü mulebü che la yeitikai.’

²⁰Hibü hao meimeikei hoba haobou jungto loukei. Lausikei hao heebüa kijinei, jembü bouei hao hapan sanouko lotkei; hao laangjung likei hoba ngüma himbei hoba sembung to shepbei.

²¹Kheijinei shouei bou to laukei, ‘Abou, ngei khuthük khulimbo hoba kathedanga shabü shona, hoba ngo touje kashou dogo laula amukei.’

²²Lausikei bouei hao sambü shuong to laukei, ‘Hali! Neisimei maiboutham sungenashi hoba hao la lekuashi hoba haoeibü ika ikjikhap hoba youa nguok lonkuashi.

²³Masu shoushou amenbou kho koba hoba haitiashi, hoba sen shauyo yungyoko olinyoakho,

²⁴aieilausi ho küshou haian kikei hoba nyibou langkeia, hao mauan apbei hoba hapmeia.’

²⁵“Lausikei hao shou jaishoubou kho seka kiteikei, hoba hao longan chem junga sühlangjinei chia laubü hoba tombü ditkei.

²⁶Haoei sambü yoka che ngaan ai yingkeije dogo phekei.

²⁷Haoei hao to laukei, ‘Kana lousühakei, hoba kabouei amenbü masu shoushou kho haitikei, aieilausi haoei hao amauko langkei maibüa hapmeikei.’

²⁸Lausikei hao khauangkei hoba chem to alotla kausakkei. Haobou longkei hoba hao sulettkei.

²⁹Lausikei haoei hao bou to jongaikei, ‘Chüha, po hajuche ngei no khangenkei, hoba ngei ka ngühkhüm che ongkei aditko aki; lausikei ngeibü jenabou shuong yoa olinyolabü lele kü la nyi ladangkei lonshou che ongkei aku.

³⁰Lausikei ho kashou, aoei asangalanbü sao shuong yoa kaibü nyaksinam khümbo khintian chem to longaikei, nyi hao shanga amenbü masu shoushou kho haitikuda.’

³¹Haobouei hao to laukei, ‘Küshou, no ponpen kü yoa ki, hoba ngei kibü pendou kaibü.

³²Lausikei senei maanghaiko olinlabü ong kiteikei, aieilausi ho kana haian kiteikei, hoba nyibou lang kia; hao mauan kiteikei hoba hapmeiakei.’ ”