Read Chang Naga LUK 16 Bible Online

LUK 16 - Chang Naga bible

LUK 16

¹Jisuei hao eikshuong to laukei, “Keibü müt che kikei hoba haoei haoeibü nyaksinam to chühbou thükkabou ikjaibü che kiteikei. Haoei bunyueibü nyaksinam apsilekuda dogo hao attiko bunyu to lenkei.

²Hibü haoei hao ngakei hoba laukei, ‘Ngei ka shangabü ditbü kho ai? Kaibü kümsilei tedtangbü weyobü kho kubü, aieilausi no touje thükkabü ikjai lela athük.’

³Thükkabou ikjaibouei haoei lolo laungaikei, ‘Ngei tou ai kümsi maila? Ngeibü bunyuei kümsilei ngailangda. Ngo kao thula hau aki hoba ngo hishau hiyunglakei himouda.

⁴Ladang ngo thükkabou ikjai kümsilei ka sattilaje, mütshuongei haoeneibü chem to ngo leiyettilabü lele ngei ai kümlaje ngei ngeakei.’

⁵Kheijinei haoei hao bunyu la sangh thebü shuong che chea ngakei, hoba haoei shaangbou to laukei, ‘Nyi kü bunyu la shemla sangh lajuche thekei?’

⁶Haoei laukei, ‘Onang takletbü saongao.’ Thükkabou ikjaibouei hao to laukei, ‘Kaibü theyobü le sungba; hali setashi hoba anjinsem doashi.’

⁷Hobaje haoei lubü che to laukei, ‘Hobaje nyikei sangh lajuche thean ki?’ Haoei laukei, ‘Youshou takyang saongao.’ Haoei hao to laukei, ‘Kaibü theyobü le sungba hoba saolei doashi.’

⁸Bunyuei haoeibü maanglimaangsang, maangalanbou thükkabou ikjai sangkei; aishanga ngesakbü shousi shuong toje ho kaodak shousi shuong haoen jembü meten yoa aei sangboudobou.

⁹“Hobaje ngei kan to lenda, kanei kan shanga thangbou pailetla kaodak nyaksinam jungeiashi, khei yingsi ong kanei ladang kho apkhümlaje, kan thon akibü kishang to leiyetlabü.

¹⁰Ao to aeibou hanbüa maanglemenda, hao to juongnyuakei maanglemenlabü; hoba ao aeibou hanbüa ngühmaang alan, hao juongakei ngühmaang alanko ki.

¹¹Hibü ho kaodakbü maangalanbü nyaksinam jungeibüa mangkei kan to maang alemen longa, aoei tükdebü nyaksinam jaitila kan to maang lemenla?

¹²Hobaje müeibüa kan to maang alemlonga, aoei kan la kaneibü kula?

¹³Sambü aoeikei bunyu nyi khangenla athük; aishanga haoei che mangsenlabü hoba lubü kho sanoulabü, ayingsi haoei che to maangshiklabü hoba che kho nyikulabü. Kanei Mühghaü si nyaksinam akhangenen.”

¹⁴Nam to khambü Farisi shuongei khübü ngüh pendou ditan hao la nyikukei.

¹⁵Haoei haoen to laukei, “Kanei kan lolo müt thedanga janbü lela thükkei, lausikei Mühghaüei kaneibü maangpon ngekei; aishanga müt thedanga aeibou yaangenbü kho Mühghaü thedanga mangsenlabü.

¹⁶“Johan alou shongko Ngühkhüm si Thuseibü shuong kiteikei. Khüka jaüan Mühghaü Sangle Ngühlang Maibü kho songlena, hoba mütpem wekoei khüto atla haujemyoda.

¹⁷Lausikei Ngühkhüm ka dopem seijinbü hanbüshou che apbü toje müh si kaodak shemla sobou.

¹⁸“Aoei jembü yak to bangda hoba lubü ngada, haoei asangalanbü jungeida; hoba aoei laoei sattibü yaksa ngadaje haoei asangalanbü shonda.

¹⁹“Keibü müt che kikei. Haoeibü neisimei kho nakthüngle sakbü hoba inyaibü kiteikei, hoba chaangboua hao olinangko lemshou lemyaang kümbo kikei.

²⁰Hobaje Lazar nyenan mouei shenbü hishau hiyungbü che haoeibü koukhüma phoyokei,

²¹hoba haoei keiboueibü khümsok ka atbülebü nyak shaula chüheikei; yongbou keishuong louan haoeibü mou to sekei.

²²“Kheijinei hishau hiyungbü kho haikei, hoba khuthük hangangbü shuongei hao Abraham khuku to langkei. Keibou khokei haikei hoba khünkei.

²³Hobaje yemsanga hao aeibou khonkuko kijinei haoei nyek longan chühkei hoba heebüa Abraham hoba haoeibü khukua Lazar hapbei.

²⁴Haoei hao to ngakei hoba laukei, ‘Abou, Abraham, küto onoukai hoba Lazarei haoeibü ikjishou deia sheman kü lishang to sangtiko khamtikula yantikai, aishanga ngo ho wanlühei aicheküman khonsakda.’

²⁵“Lausikei Abrahamei laukei, ‘Kü shou, no lang kijinei, nyi kaibü maiboutham hapbei dogo damenashi, hoba Lazarei kho tegü amaibou hapbei; lausikei tou hao haksoa kia, hoba no khonkua ki.

²⁶Tokei khüto yoko, haka aoyou kan jungto haumang sühlaje athüklabü, hoba khüka kün jungto aokei loula athüklabü lele, kün si kan kanglanga thonshang akibü püngkhün yaangei aoakei.’

²⁷Haoei laukei, ‘Khülonga abou, hao kübou chemto hautikai dogo ngei kato sudajada,

²⁸aishanga ngei jaisina müt ngao kia, haoei haoen to aukabü kula hautikai; khei yingsi ong haoen ho khonkushang to aloulabü.’

²⁹Abrahamei laukei, ‘Haoenei Mosa hoba thuseibü Lai shuong kia; haoenei khübü to ngüha nale.’

³⁰Lausikei haoei laukei, ‘Aying, abou Abraham; lausikei haikhün ka müt che haoen jungto ngaisije haoenei maangpon sepeilabü.’

³¹Abrahamei jongaikei, ‘Haoenei Mosa hoba thuseibü shuong ngüh aditlonga, haikhün ka müt che langngaisi dogokei haoenei maialemlabü.’ ”