Read Chang Naga LUK 17 Bible Online

LUK 17 - Chang Naga bible

LUK 17

¹Haoei eikshuong to laukei, “Müt shabüa phaiyettilabü kho louphangphang, lausikei ao danko khübü haüthüklaje hao shanga ügütü!

²“Hao shangaje, habü hanbü shuong yo ka che ongkei phaiyettibü khantoje, ngünjin laang che ngüma yakan si mangto tekan attibü khaibou.

³Maangsangashi! Kaibü jaisinaei shedbü shona longa, hao to hakashi, hoba hao maangpon sepeisije, hao la amai apbushi.

⁴Haoei chalou chenei kakhu limbo nyetnei shedbü shona longa, hoba ka jungto nyetnei longeian hao maangpon kümeda dogo kato laua longaje, nyi hao la ap kujan.”

⁵Youkoikjai anthüknyi khoei Bunyubou to laukei, “Kün la mailem aei yaangtikai.”

⁶Jisuei laukei, “Kan to mailem yongkoshiklang tetche ongkei kisije, kanei kho pilong to laulabü, ‘Pheienashi hoba sia keashi’, hoba khoei kan ngüha lelabü.

⁷“Tetlabüei kan yoa müt cheei sek moutiko ayingsi san shuong lomtiko sambü che kia. Ladang hao sek ka lunglaje haoei hao to, ‘Toutham kaiya hoba shaula yungla setashi’ dogo lauda lao?

⁸Aeiko haoei hao to bouje, ‘Nyak peiashi hoba ngo shauji yungjinei shombü jinkula lamleashi; kho phaia nyi lolo shaushi’, dogo alauda si?

⁹Hao la kümla nongkubü kümbü shanga haoei sambü nyen sangda lao?

¹⁰Kho tegü kaneikei, ladang kan la kümla nongkubü pendou kümsemlaje kanei hai laujan, ‘Kün sambü shuong; kün nyen sanglabü ai aki. Künei ai kümjan kiteikei kho künei küma.’ ”

¹¹Hao Jerusalem to haujinei haoei Samaria si Galil kanglang ka dankei.

¹²Hao sang che to haujinei imbü müt anei hao haüyokei. Haoenei tuisho hauan lokei

¹³hoba ngekkei, “Jisu! Bunyubou! Kün to onoukai!”

¹⁴Ladang haoei haoen hapbei, haoei laukei, “Hauashi hoba kan lolo ungshedbü shuong to lenashi.” Haoen haujineitham haoen maian apbei.

¹⁵Haoen yoa müt che, hao maingaibü hapan, ngüh yaangei Mühghaü la soneikangbü kuko longeikei;

¹⁶hoba Jisueibü you junga khüpetkei hoba hao nyen sangkei. Hao Samariabü kikei!

¹⁷Jisuei laukei, “Müt an pendou saüenkei ji si? Müt güje lan ki?

¹⁸Ho küksithang che hato liman Mühghaü la soneikangbü kungaila longeibü lubü ao akitei lo?”

¹⁹Hobaje haoei hao to laukei, “Pienashi hoba hauashi. Kaibü mailemei no maitia.”

²⁰Ladang Farisibüei hao to Mühghaü Sangle ladang loula dogo phekei, haoei haoen to jongaikei, “Mühghaü Sangle kho kanei haiyeibüei alouda.

²¹Haoenei, ‘Chüha, hanei kia!’ ayingsi ‘Khünei kia!’ dogo alaulabü. Aieilausi Mühghaü Sangle kho kan yoa kia.”

²²Haoei eikshuong to laukei, “Kanei Müteibü Shou chalou shuong ka che ongkei hapmang sühko waanglabü jihsiphai che lousühlabü.

²³Haoenei kan to laulabü, ‘Chühashi, hao khünei kia!’ ayingsi ‘Hao hanei kia!’ Tohau, haoen phai telang;

²⁴aishanga langpon ponsi lai ji mühthon ka jinei sühko ngesakda, kho tegü Müteibü Shou haoeibü chaloua yinglabü.

²⁵Lausikei shaangla hao aeibou khonkujan hoba ho metenei wailetlabü.

²⁶Hobaje Noa chaloua yingbü tegü, Müteibü Shou chalouakei kho tegütham kilabü;

²⁷Noa longchem to atbü chalou asühshongko hoba yungsen loukouan haoen pendou ashem shongko, haoenei shaukei yungkei, haoenei leiyetkei hoba haoenei laolam yaknga kuyoko loukei.

²⁸Kho tegü ong, Lot chaloua kibü tegü yinglabü: mütshuongei shaukei hoba yungkei, jekkei hoba yaakkei, kekei ongkei hoba chem dangko kikei;

²⁹lausikei Lot Sodom ka satnyet khuthük ka wan hoba wanlong lotkei hoba haoen pendou shembei.

³⁰Kho tegü ong Müteibü Shou tang khitlabü chalouakei kilabü.

³¹Kho chaloua müt che chemdaka kialonga hoba haoeibü peisilei chemanga kialonga, haoei khübü sungla ayanjan, hoba kho tegü ong ao seka khüpan kilaje haokei khüpeian toung.

³²Loteibü yak damenashi.

³³Ao mütei haoeibü langkei püetla haujemdaje kho maulabü, lausikei aoei jembü langkei maulaje haoei kho püetlabü.

³⁴Ngei kan la lenda, khüyou yepshang chenei müt nyi kilabü, che leilanglabü, lubü che kho phoyolabü.

³⁵Yaksa nyi chela shem shiko kilabü; che leilanglabü, hoba che kho phoyolabü.

³⁶(Müt nyi sek chenei kilabü; che leilanglabü hoba lubü che kho phoyolabü.)”

³⁷Haoenei hao to jongaikei, “Lanei, Bunyubou?” Haoei haoen to laukei, “Lanei haibü mang ki khünei hogon shuong takshatlabü.”